ಸಿಂಪಲ್‌ ಸುನಿ ನಿರ್ದೇಶನದ ಆಪರೇಷನ್‌ ಅಲಮೇಲಮ್ಮ ಚಿತ್ರದ ಪ್ರಮೋಷನಲ್‌ ಸಾಂಗ್‌ನಲ್ಲಿ ಶ್ರದ್ಧಾ ಶ್ರೀನಾಥ್ ಬಿಂದಾಸ್‌ ಡ್ಯಾನ್ಸ್‌ ಮಾಡಿದ್ದಾರೆ. ಚಿತ್ರದಲ್ಲಿ ಶ್ರದ್ಧಾ ಶ್ರೀನಾಥ್‌ದು ಗೌರಮ್ಮನ ಪಾತ್ರ. ಪಕ್ಕಾ ಟ್ರೆಡಿಷನಲ್‌ ಲುಕ್‌ನಲ್ಲಿ ಕಾಣಿಸಿಕೊಂಡಿದ್ದಾರೆ. ಅನನ್ಯ ಎಂಬ ಟೀಚರ್‌ ಪಾತ್ರ ಅವರದು. ಆದರೆ, ಚಿತ್ರದ ಪ್ರಮೋಷನಲ್‌ ಸಾಂಗ್‌ನಲ್ಲಿ ಇದಕ್ಕೆ ತದ್ವಿರುದ್ಧ ಎಂಬಂತೆ ಸಿಕ್ಕಾಪಟ್ಟೆ ಗ್ಲಾಮರಸ್‌ ಆಗಿ ಡ್ಯಾನ್ಸ್‌ ಮಾಡಿದ್ದಾರೆ. ಮೊದಲ ಬಾರಿಗೆ ಶ್ರದ್ಧಾ ಡ್ಯಾನ್ಸ್‌ ಮಾಡುತ್ತಿರುವುದು.
ಇದಕ್ಕೂ ಮೊದಲು ಯಾವ ಚಿತ್ರದಲ್ಲೂ ಅವರು ಡ್ಯಾನ್ಸ್‌ ಮಾಡಿಲ್ಲ. ಟಪ್ಪಾಂಗುಚಿ ಸ್ಟೈಲ್‌ನ ಕಾಸ್ಟ್ಯೂಮ್‌ ಹಾಕಿಕೊಂಡು ಕುಣಿದಿದ್ದಾರೆ ಎಂದು ಗೊತ್ತಾಗಿದೆ. ಇದರ ಜತೆ ಸಿನಿಮಾದಲ್ಲಿ ಸೀರೆ ಉಟ್ಟು, ಮೂಗುಬಟ್ಟು ಹಾಕಿಕೊಂಡು ಟೀಚರ್‌ ಆಗಿ ಕಾಣಿಸಿಕೊಂಡಿರೋದು ಇನ್ನೊಂದು ವಿಶೇಷ. ಚಿತ್ರದಲ್ಲಿ ನಾಯಕ ನಟ ರಿಷಿ ತರಕಾರಿ ಮಾರುವವನ ಪಾತ್ರದಲ್ಲಿ ನಟಿಸಿದ್ದಾರೆ.
'ಚಿಕ್ಕಂದಿನಿಂದ ಭರತನಾಟ್ಯ ಕಲಿತಿದ್ದರೂ ಈ ಡ್ಯಾನ್ಸ್‌ ಮಾಡುವುದು ನನಗೆ ಚಾಲೆಂಜಿಂಗ್‌ ಆಗಿತ್ತು. ಹಿಂದೆಂದೂ ಈ ರೀತಿಯ ಡ್ಯಾನ್ಸ್‌ ನಾನು ಮಾಡಿರಲಿಲ್ಲ' ಎಂದಿದ್ದಾರೆ ಶ್ರದ್ಧಾ.ನಟನೆ ಯಾವಾಗಲೂ ನನಗೆ ಇಂಟರೆಸ್ಟಿಂಗ್‌ ಆಗಿತ್ತು. ಈಗ ಡ್ಯಾನ್ಸ್‌ ಇನ್ನೊಂದು ಹೆಜ್ಜೆ ಮುಂದಕ್ಕೆ ನನ್ನನ್ನು ಕರೆದೊಯ್ದಿದೆ. ಈ ಹಾಡು ಚೆನ್ನಾಗಿ ಮೂಡಿ ಬಂದಿದೆ ಅಂದುಕೊಂಡಿದ್ದೇನೆ' ಎಂದಿದ್ದಾರೆ.
ಹಾಡಿಗೆ ಜುಡಾ ಸ್ಯಾಂಡಿ ಸಂಗೀತ ಸಂಯೋಜನೆ ಮಾಡಿದ್ದಾರೆ. ಚಿತ್ರದ ಕತೆಯೊಳಗೆ ಈ ರೀತಿಯ ಹಾಡನ್ನು ತರೋದು ನಿರೂಪಣೆಗೆ ಹೊಂದುವುದಿಲ್ಲ ಎಂಬ ಕಾರಣಕ್ಕೆ ಪ್ರಮೋಷನಲ್‌ ಸಾಂಗ್‌ ಆಗಿ ಸಿದ್ಧಪಡಿಸಿದ್ದೇವೆ ಎಂದಿದ್ದಾರೆ ನಿರ್ದೇಶಕರು. ಅಭಿಷೇಕ್‌ ಕಾಸರಗೋಡು ಛಾಯಾಗ್ರಹಣ ಮಾಡಿದ್ದಾರೆ.