ಕಾಲಿವುಡ್‌ನಿಂದ ಯೂ ಟರ್ನ್ ತೆಗೆದುಕೊಂಡು 'ರುದ್ರ ಪ್ರಯಾಗ'ಕ್ಕೆ ಬಂದ ಶ್ರದ್ಧಾ ಶ್ರೀನಾಥ್

ಕಾಲಿವುಡ್‌ನಲ್ಲೇ ಬಹುತೇಕ ಸೆಟ್ಲ್ ಆದಂತೆ ಕಂಡಿದ್ದ ನಟಿ ಶ್ರದ್ಧಾ ಶ್ರೀನಾಥ್‌ ಈಗ ಮತ್ತೆ ಸ್ಯಾಂಡಲ್‌ವುಡ್‌ಗೆ ಬರುತ್ತಿದ್ದಾರೆ. ರಿಷಭ್‌ ಶೆಟ್ಟಿ ನಿರ್ದೇಶನದ 'ರುದ್ರ ಪ್ರಯಾಗ' ಚಿತ್ರದಲ್ಲಿ ಮುಖ್ಯ ಪಾತ್ರದಲ್ಲಿ ನಟಿಸಲಿದ್ದಾರೆ.

ಈ ಚಿತ್ರದಲ್ಲಿ ಅನಂತನಾಗ್‌ ಹೀರೊ ಆಗಿ ನಟಿಸುತ್ತಿದ್ದು, ಲೀಡಿಂಗ್‌ ಲೇಡಿ ರೋಲ್‌ ಯಾರು ಮಾಡುತ್ತಾರೆ ಎಂಬ ಕುತೂಹಲ ಎಲ್ಲರಲ್ಲಿತ್ತು. ಈಗ ಚಿತ್ರದ ನಾಯಕಿ ಸಿಕ್ಕಿದ್ದಾರೆ. ರುದ್ರ ಪ್ರಯಾಗ ಚಿತ್ರದಲ್ಲಿ ನಟಿಸಲು ಶ್ರದ್ಧಾ ಶ್ರೀನಾಥ್‌ ಓಕೆ ಎಂದಿದ್ದಾರೆ. ಚಿತ್ರದಲ್ಲಿ ಮುಖ್ಯವಾದ 9 ಪಾತ್ರಗಳಿವೆ ಎಂದಿದ್ದಾರೆ ನಿರ್ದೇಶಕ ರಿಷಭ್‌ ಶೆಟ್ಟಿ. ತೆಲುಗಿನಲ್ಲಿ ಸಖತ್ ಮಿಂಚುತ್ತಿರುವ ಶ್ರದ್ಧಾ ಶ್ರೀನಾಥ್!

ಶ್ರದ್ಧಾ ಪಾತ್ರವೂ ವಿಭಿನ್ನವಾಗಿದೆಯಂತೆ. ಸಾಮಾನ್ಯವಾಗಿ ಸಿನಿಮಾಗಳಲ್ಲಿ ಕಾಣಿಸುವ ನಾಯಕಿ ಪಾತ್ರಕ್ಕಿಂತ ಡಿಫರೆಂಟ್‌ ಆಗಿ ಹೊಸ ರೀತಿಯಲ್ಲಿ ಕ್ಯಾರೆಕ್ಟರೈಸೇಷನ್‌ ಮಾಡಲಾಗಿದೆಯಂತೆ. ಉಳಿದ ಪಾತ್ರಗಳಿಗೆ ನಟ ಆಯ್ಕೆ ಪ್ರಕ್ರಿಯೆ ನಡೆದಿದೆ.

ಯೂ ಟರ್ನ್‌ ಚಿತ್ರ ರಿಲೀಸ್‌ ಆಗುತ್ತಿದ್ದಂತೆ ಕಾಲಿವುಡ್‌ಗೂ ಕಾಲಿಟ್ಟ ಶ್ರದ್ಧಾ, ಕಳೆದ 3 ವರ್ಷಗಳಲ್ಲಿ ತಮಿಳು ಚಿತ್ರಗಳಲ್ಲೇ ಹೆಚ್ಚಾಗಿ ನಟಿಸಿದ್ದರು. ಇದುವರೆಗೆ ಅವರ ನಟನೆಯ 6 ತಮಿಳು ಚಿತ್ರಗಳು ರಿಲೀಸ್‌ ಆಗಿವೆ. ಕನ್ನಡದಲ್ಲಿ ಆಪರೇಷನ್‌ ಅಲಮೇಲಮ್ಮ, ರುಸ್ತುಂ ಚಿತ್ರಗಳಲ್ಲಿ ನಟಿಸಿದ ನಂತರ ಎರಡು ವರ್ಷಗಳಿಂದ ಬೇರೆ ಯಾವುದೇ ಕನ್ನಡ ಸಿನಿಮಾಗೆ ಸಹಿ ಮಾಡಿರಲಿಲ್ಲ.

ಈಗ ರುದ್ರ ಪ್ರಯಾಗದ ಮೂಲಕ ಮತ್ತೊಮ್ಮೆ ಕನ್ನಡ ಸಿನಿಮಾದಲ್ಲಿ ಪ್ರಮುಖ ಪಾತ್ರದಲ್ಲಿ ನಟಿಸಲಿದ್ದಾರೆ. ಇದರ ಬೆನ್ನಲ್ಲೇ ತಮಿಳಿನ ಜನಪ್ರಿಯ ನಟ ವಿಶಾಲ್‌ ಜತೆ ನಾಯಕಿಯಾಗಿ ನಟಿಸಲಿರುವ ಸುದ್ದಿ ಹೊರಬಿದ್ದಿದೆ.