ನಾನು ನಟಿಯೇ ಹೊರತೂ ಸಾರ್ವಜನಿಕ ಸ್ವತ್ತಲ್ಲ: ನಟಿ ಶುಭ್ರ ಅಯ್ಯಪ್ಪ

"ನಾನು ಒಬ್ಬಳು ನಟಿ. ನಾನು ಮಾಡೆಲ್ ಸಹ ಆಗಿದ್ದೆನೆ. ನಾನು ಸಾರ್ವಜನಿಕರ ದೃಷ್ಟಿಯಲ್ಲಿಇರಬೇಕು ಎಂದು ಬಯಸಿದವಳು. ಆದರೆ, ನಾನು ಸಾರ್ವಜನಿಕ ಆಸ್ತಿಯಲ್ಲ" ಎಂದು ನಟಿ, ಮಾಡೆಲ್ ಶುಭ್ರ ಅಯ್ಯಪ್ಪ ಅವರು ತಮ್ಮ ಸೋಷಿಯಲ್ ಮೀಡಿಯಾ ಪೇಜ್‌ನಲ್ಲಿ ಬರೆದುಕೊಂಡಿದ್ದಾರೆ. ಶುಭ್ರ ಅಯ್ಯಪ್ಪ ಅವರು ಸಿಂಪಲ್‌ ಆಗಿ ಬರೆದುಕೊಂಡಿದ್ದಾರೆ ಎಂದು ಹೇಳಿಕೊಳ್ಳುವುದಕ್ಕಿಂತ ಅವರು ತುಂಬಾ ನೋವಿನಿಂದ ಹೀಗೆ ಬರೆದುಕೊಂಡಿದ್ದಾರೆ ಎನ್ನುವುದು ಹೆಚ್ಚು ಸೂಕ್ತ ಎನ್ನಬಹುದು.

ಹೌದು, ಇತ್ತೀಚೆಗೆ ನಟಿ ಶುಭ್ರ ಅಯ್ಯಪ್ಪ ಅವರು ತಮ್ಮ ಸೋಷಿಯಲ್ ಮೀಡಿಯಾದಲ್ಲಿ ನೋವಿನಿಂದ ಸುದೀರ್ಘವಾದ ಲೆಟರ್ ಬರೆದುಕೊಂಡಿದ್ದಾರೆ. "ನಾನು ರಜೆಯ ಮಜವನ್ನು ಸಾಮಾನ್ಯ ಮನುಷ್ಯಳಂತೆ ಅನುಭವಿಸಿದರೆ ಬೇರೆಯವರಿಗೆ ತೊಂದರೆಯೇನು? ನಾನು ರಸ್ತೆಯಲ್ಲೇನು ಬಿಕಿನಿ ಹಾಕಿಕೊಂಡು ಓಡಾಡಿಲ್ಲ. ಬೀಚ್‌ನಲ್ಲಿ ನಾನು ಬಿಕಿನಿ ಹಾಕಿಕೊಂಡು ಓಡಾಡಿದರೆ ತಪ್ಪೇ? ನಾನು ಎಂಜಾಯ್ ಮಾಡಿದ ಕ್ಷಣಗಳನ್ನು ನನ್ನ ಸೋಷಿಯಲ್ ಮೀಡಿಯಾದಲ್ಲಿ ಹಾಕಿದರೆ ಅದಕ್ಕೆ ಏನೇನೋ ಕೆಟ್ಟ ಕಾಮೆಂಟ್‌ಗಳನ್ನು ಹಾಕಿದರೆ ನನ್ನ ಮನಸ್ಸಿಗೆ ನೋವಾಗುವುದಿಲ್ಲವೇ?

ಮೊದಲನೆಯದಾಗಿ ನಾನೊಬ್ಬಳು ಹೆಣ್ಣು. ನಾನೂ ಸಹ ಮಗಳು, ತಂಗಿ, ಅಕ್ಕ ಎಲ್ಲವೂ. ನನಗೂ ಸಹ ವೈಯಕ್ತಿಕ ಬದುಕಿದೆ. ನಾನು ಸಹ ಎಲ್ಲರಂತೆ ಕೆಲಸ ಮಾಡುತ್ತೇನೆ, ಊಟ, ನಿದ್ದೆ ಎಲ್ಲವೂ ಎಲ್ಲರಂತೆಯೇ. ನನ್ನ ವೃತ್ತಿಗೆ ಅನುಕೂಲಕರ ಬಟ್ಟೆ ತೊಡುತ್ತೇನೆ. ನನಗೆ ಬೇಕಾದಂತೆ ಇರುತ್ತೇನೆ. ಆದರೆ, ನನ್ನ ಕೆಲವು ಫೋಟೋಗಳನ್ನು ನೋಡಿ ನಾನು ಸಂಸ್ಕೃತಿ ಇಲ್ಲದವಳು ಎಂಬಂತೆ ನೋಡಿದರೆ ಹೇಗೆ? ಈಜುವಾಗ ಯಾರೂ ಹೆಚ್ಚು ಬಟ್ಟೆ ತೊಡುವುದಿಲ್ಲ. ಅವರ ಫೋಟೋಗಳನ್ನು ಯಾರೂ ನೋಡುವುದಿಲ್ಲ. ಆದರೆ ನಾನು ಸೆಲೆಬ್ರೆಟಿ ಎನ್ನವು ಕಾರಣಕ್ಕೆ ನನ್ನ ಫೋಟೋ ನೋಡಿ ನನ್ನ ಬಗ್ಗೆ ಕೆಟ್ಟ ಕಾಮೆಂಟ್‌ಗಳನ್ನು ಹಾಕಿದರೆ ನನಗೆ ತುಂಬಾ ನೋವಾಗುತ್ತದೆ.

ನನ್ನನ್ನು ಅರ್ಥ ಮಾಡಿಕೊಂಡವರಿಗೆ ನಾನು ಕೃತಜ್ಞತೆ ಹೇಳುತ್ತೇನೆ. ನನ್ನ ಪರವಾಗಿ ನಿಂತವರಿಗೆ ನಾನು ಎಂದೂ ತಲೆ ತಗ್ಗಿಸುವಂತೆ ಮಾಡುವುದಿಲ್ಲ. ಆದರೆ, ನನ್ನ ಫೋಟೋ ನೋಡಿ ಕೆಟ್ಟದಾಗಿ ಕಾಮೆಂಟ್ ಮಾಡುವವರಿಗೆ, ನನ್ನ ಸಿನಿಮಾ ಪಾತ್ರವನ್ನು ನೋಡಿ ನನ್ನನ್ನು ನಿಂದಿಸುವವರಿಗೆ ನಾನು ಇನ್ಮುಂದೆ ಯಾವುದೇ ಉತ್ತರ ಕೊಡಲು ಹೋಗುವುದಿಲ್ಲ.

ನಾನು ನನ್ನ ಪ್ರೀತಿ ಪಾತ್ರರಿಗೆ ಇಷ್ಟವಾಗುವಂತೆ ನಡೆದುಕೊಂಡರೆ ಸಾಕು ಎಂದುಕೊಂಡಿದ್ದೇನೆ. ಆದರೆ, ನನ್ನ ಬಗ್ಗೆ ಕೆಟ್ಟದಾಗಿ ಮಾತನಾಡುವ ಮೂಲಕ ನನಗೆ ನೋವು ಕೊಡವವರನ್ನು ಸಾಧ್ಯವಾದಷ್ಟು ದೂರವಿಡಲು ಪ್ರಯತ್ನಿಸುವೆ" ಎಂದು ತಮ್ಮ ನೋವು ತೋಡಿಕೊಂಡಿದ್ದಾರೆ.