ಐಎಎಸ್ ಕನಸು ಕಂಡಿದ್ದ ಸೋನು ಗೌಡ

ಐಎಎಸ್‌ ದಂಪತಿಗಳಾದ ಶಾಲಿನಿ ಮತ್ತು ರಜನೀಶ್‌ ಜೀವನ ಕತೆಯನ್ನಾಧರಿಸಿದ ಚಿತ್ರ ಐಎಎಸ್‌ ಶಾಲಿನಿ. ಐಎಎಸ್‌ ದಂಪತಿಯ ಕನಸುಗಳು ಎಂಬ ಪುಸ್ತಕವನ್ನಾಧರಿಸಿ ಸಿನಿಮಾ ಮಾಡಲಾಗುತ್ತಿದೆ. ನಿಖಿಲ್‌ ಮಂಜು ಚಿತ್ರಕ್ಕೆ ಆ್ಯಕ್ಷನ್‌ ಕಟ್‌ ಹೇಳಿದ್ದಾರೆ. ಸೋನು ಗೌಡ ಶಾಲಿನಿ ಪಾತ್ರದಲ್ಲಿ ನಟಿಸುತ್ತಿದ್ದಾರೆ. ಚಿತ್ರದಲ್ಲಿ ಐಎಎಸ್‌ ಅಧಿಕಾರಿಯ ಪಾತ್ರದಲ್ಲಿ ವಿಭಿನ್ನ ರೀತಿಯಲ್ಲಿ ಭಾವನೆಗಳನ್ನು ವ್ಯಕ್ತಪಡಿಸಬೇಕಾಗುತ್ತೆ ಎಂದಿದ್ದಾರೆ ಸೋನು ಗೌಡ.

'ಕಮರ್ಷಿಯಲ್‌ ಚಿತ್ರಗಳಲ್ಲಿ ಬೋಲ್ಡ್‌ ಹುಡುಗಿಯಾಗಿ ಅಥವಾ ಮುಗ್ಧ ಹುಡುಗಿಯಾಗಿ ನಟಿಸುವಾಗ ಫ್ಲೆಕ್ಸಿಬಿಲಿಟಿ ಇರುತ್ತೆ. ಆದರೆ, ಐಎಎಸ್‌ ಅಧಿಕಾರಿಯ ಪಾತ್ರದಲ್ಲಿ ನಟಿಸುವಾಗ ಮುಖಭಾವವನ್ನು ಹೇಗೆಂದರೆ ಹಾಗೆ ತೋರಿಸೋಕೆ ಆಗೋಲ್ಲ. ಬಹಳ ಕಂಟ್ರೋಲ್ಡ್‌ ಆಗಿ ನಟಿಸಬೇಕು. ಹೆಚ್ಚು ಭಾವನೆಗಳನ್ನು ವ್ಯಕ್ತಪಡಿಸುವಂತಿಲ್ಲ. ಮನಸ್ಸಿನಲ್ಲಿರುವುದನ್ನು ವ್ಯಕ್ತಪಡಿಸದೆ, ಎಕ್ಸ್‌ಪ್ರೆಷನ್‌ ಕೊಡಬೇಕು' ಎಂದಿದ್ದಾರೆ. ಶಾಲಿನಿಯವರ ಹಾವಭಾವವನ್ನು ತಾವು ಅನುಕರಣೆ ಮಾಡಿಲ್ಲ ಎಂದಿದ್ದಾರೆ ಅವರು. 'ಒಬ್ಬ ಮಹಿಳಾ ಐಎಎಸ್‌ ಕೆಲಸ ಮಾಡುವಾಗ ತನ್ನ ಸಿಬ್ಬಂದಿಯವರೊಂದಿಗೆ ಹೇಗೆ ನಡೆದುಕೊಳ್ತಾರೆ, ಅವರ ಹಾವಭಾವ ಹೇಗಿರುತ್ತೆ ಎನ್ನುವುದನ್ನು ಶಾಲಿನಿಯವರ ಜತೆ ವಿಧಾನಸೌಧಕ್ಕೆ ಹೋಗಿ ನೋಡಿದೆ. ಆದರೆ, ಆ ಜಾಗದಲ್ಲಿ ನಾನಿದ್ದರೆ ನನ್ನ ಹಾವ ಭಾವ ಹೇಗಿರುತ್ತೋ ಹಾಗೇ ನಾನು ಕಾಣಿಸಿಕೊಂಡಿದ್ದೇನೆ. ಇಲ್ಲಿ ಪಾತ್ರ ಮಾತ್ರ ಶಾಲಿನಿ ಮೇಡಂ ಅವರದ್ದು. ಆ ಪಾತ್ರ ನಾನಾಗಿದ್ದೇನೆ' ಎನ್ನುತ್ತಾರೆ.

ಇಂಥ ಪಾತ್ರ ಸಿಗೋದು ಅಪರೂಪ ಎಂದಿರುವ ಅವರು, 'ಚಿತ್ರದಲ್ಲಿ ಐಎಎಸ್‌ ದಂಪತಿಗಳ ಕತೆ ಇದೆ. ಹಾಗಾಗಿ ಒಂದು ವಿಚಾರದ ಬಗ್ಗೆ ಅವರಿಬ್ಬರಿಗೆ ಇರುವ ಭಿನ್ನ ಅಭಿಪ್ರಾಯಗಳನ್ನೂ ಚಿತ್ರದಲ್ಲಿ ತೋರಿಸಲಾಗಿದೆ' ಎಂದಿದ್ದಾರೆ.