ಟಾಲಿವುಡ್ 'ಬಿಗ್ ಬಾಸ್' ಹೋಸ್ಟ್ ಆಗಲಿರುವ ನಟಿ ಅನುಷ್ಕಾ ಶೆಟ್ಟಿ!

ಕನ್ನಡತಿ ನಟಿ ಅನುಷ್ಕಾ ಶೆಟ್ಟಿ ಅವರು ಇಡೀ ಸೌತ್ ಇಂಡಿಯಾದಲ್ಲಿ ಮಿಚುತ್ತಿರುವ ಸ್ಟಾರ್ ನಟಿ. ಇತ್ತೀಚಿನ ನಾಯಕಿ ಪ್ರಧಾನ ಸಿನಿಮಾಗಳಿಗೆ ಹೇಳಿ ಮಾಡಿಸಿದ ನಟಿ ಅನುಷ್ಕಾ ಶೆಟ್ಟಿ. ಆರಡಿ ಕಟೌಟ್ ಸ್ಟಾರ್ ಹೀರೋಗಳಿಗೆ ಪರ್ಫೆಕ್ಟ್ ಪೇರ್ ಎನ್ನಬಹುದಾದ ನಟಿ ಅನುಷ್ಕಾ ಶೆಟ್ಟಿ.

ಅರುಂಧತಿ, ದೇವಸೇನಾ, ಭಾಗಮತಿ ಮುಂತಾದ ಐತಿಹಾಸಿಕ ಚಿತ್ರಗಳೇ ಇರಲಿ, ಅಥವಾ 'ಝೀರೋ' ತರಹದ ವಿಭಿನ್ನ ಕಾನ್ಸೆಪ್ಟ್‌ ಆಗಿರಲಿ, ನಟಿ ಅನುಷ್ಕಾ ಶೆಟ್ಟಿ ಅದ್ಭುತವಾಗಿ ಪಾತ್ರಕ್ಕೆ ಜೀವ ತುಂಬಬಲ್ಲರು. ಅಂಥ ನಟಿ ಅನುಷ್ಕಾ ಶೆಟ್ಟಿ ಅಭಿಮಾನಿಗಳಿಗೆ ಈಗ ಹೊಸ ಸಂತೋಷದ ಸುದ್ದಿಯಿದೆ.

ಹೌದು, ಇಂಡಿಯಾದ ಜನಪ್ರಿಯ ರಿಯಾಲಿಟಿ ಶೋ ಹೋಸ್ಟ್ ಆಗಿ ನಟಿ ಅನುಷ್ಕಾ ಬರಲಿದ್ದಾರೆ ಎನ್ನಲಾಗುತ್ತಿದೆ. ಈಗಾಗಲೇ ಅನುಷ್ಕಾ ಶೆಟ್ಟಿ ಜೊತೆ ಮಾತುಕತೆ ನಡೆದಿದ್ದು, ಈ ಸುದ್ದಿ ಅಧಿಕೃತವಾಗುವುದಷ್ಟೆ ಬಾಕಿ ಎನ್ನಲಾಗಿದೆ. ಒಮ್ಮೆ ಈ ಸುದ್ದಿ ನಿಜವಾದರೆ ಜಗತ್ತಿನಾದ್ಯಂತ ಇರುವ ಅನುಷ್ಕಾ ಅಭಿಮಾನಿಗಳ ಸಂತೋಷಕ್ಕೆ ಮೇರೆಯೇ ಇಲ್ಲದಂತಾಗುತ್ತದೆ.

ಹಾಲಿವುಡ್‌ನಿಂದ ಸ್ಯಾಂಡಲ್‌ವುಡ್‌ ತನಕವೂ ಸೂಪರ್ ಸಕ್ಸಸ್ ಕಂಡಿರುವ ಅತಿದೊಡ್ಡ ರಿಯಾಲಿಟಿ ಶೋ ಬಿಗ್ ಬಾಸ್ ಎಂಬುವುದರಲ್ಲಿ ಸಂದೇಹವೇ ಇಲ್ಲ. ಬಾಲಿವುಡ್‌ನಲ್ಲಿ ಸಲ್ಮಾನ್ ಖಾನ್, ಸ್ಯಾಂಡಲ್‌ವುಡ್‌ನಲ್ಲಿ ಕಿಚ್ಚ ಸುದೀಪ್ ಹಲವು ವರ್ಷಗಳಿಂದ ಬಿಗ್ ಬಾಸ್ ಶೋ ನಿರೂಪಣೆ ಮಾಡುತ್ತಿದ್ದಾರೆ.

ತೆಲುಗಿನಲ್ಲಿ ಜ್ಯೂನಿಯರ್ ಎನ್‌ಟಿಆರ್ ಬಿಗ್‌ ಬಾಸ್‌ನ ಫಸ್ಟ್ ಸೀಸನ್ ನಡೆಸಿಕೊಟ್ಟಿದ್ದಾರೆ. ನಟ ನಾನಿ ಸೆಕೆಂಡ್ ಸೀಸನ್‌ಅನ್ನು ಯಶಸ್ವಿಯಾಗಿ ನಡೆಸಿಕೊಟ್ಟಿದ್ದು, ಇದೀಗ 3ನೇ ಸೀಸನ್‌ ಬರಲಿದೆ. ಮುಂಬರುವ ಮೂರನೇ ಸೀಸಸ್‌ಗೆ ಭರ್ಜರಿ ತಯಾರಿ ಶುರುವಾಗಿದ್ದು, ಹೋಸ್ಟ್ ಆಗಿ ಅನುಷ್ಕಾ ಶೆಟ್ಟಿಯನ್ನು ಕರೆ ತರುವ ಪ್ರಯತ್ನ ನಡೆಯುತ್ತಿದೆ.

ತೆಲುಗಿನ ಸ್ಟಾರ್ ನಟರಾದ ವಿಕ್ಟರಿ ವೆಂಕಟೇಶ್, ನಾಗಾರ್ಜುನ, ರಾಣಾ ದಗ್ಗುಬಾಟಿ, ವಿಜಯ್ ದೇವರಕೊಂಡ ಸೇರಿದಂತೆ ಹಲವರು ಹೆಸರುಗಳು ಈಗಾಗಲೇ ಕೇಳಿ ಬಂದಿದ್ದರೂ, ಅನುಷ್ಕಾ ಶೆಟ್ಟಿ ಹೆಸರೇ ಫೈನಲ್ ಆಗಲಿದೆ ಎನ್ನಲಾಗುತ್ತಿದೆ. ಏಕೆಂದರೆ, ಸದ್ಯಕ್ಕೆ ಲೇಡಿ ಸೂಪರ್ ಸ್ಟಾರ್ ಅಂದರೆ, ಅದು ಬೇರೆ ಯಾರೂ ಅಲ್ಲ, ನಟಿ ಅನುಷ್ಕಾ ಶೆಟ್ಟಿ ಎನ್ನಲಾಗುತ್ತಿದೆ. ಹೀಗಾಗಿ, ಶೋದ ಸಂಪೂರ್ಣ ಟೀಮ್ ನಟಿ ಅನುಷ್ಕಾ ಶೆಟ್ಟಿಯವರ 'ಗ್ರೀನ್ ಸಿಗ್ನಲ್‌'ಗಾಗಿ ಎದುರು ನೋಡುತ್ತಿದೆ ಎನ್ನಲಾಗಿದೆ.