ಸ್ಪೈಡರ್‌ಮ್ಯಾನ್ ಸಹ ಸೃಷ್ಟಿಕರ್ತ ಸ್ಟೀವ್ ಡಿಟ್ಕೋ ನಿಧನ

ಸೂಪರ್ ಹೀರೋ ಸ್ಪೈಡರ್ ಮ್ಯಾನ್ ಪಾತ್ರದ ಸಹ ಸೃಷ್ಟಿಕರ್ತ ಸ್ಟೀವ್ ಡಿಟ್ಕೋ (90) ನಿಧನರಾಗಿದ್ದಾರೆ. ಅವರು ಇನ್ನಿಲ್ಲ ಎಂಬ ಸುದ್ದಿ ಸ್ವಲ್ಪ ತಡವಾಗಿ ಬೆಳಕಿಗೆ ಬಂದಿದೆ. ನ್ಯೂಯಾರ್ಕ್‌ನ ತನ್ನ ಅಪಾರ್ಟ್‌ಮೆಂಟ್‌ನಲ್ಲಿ ಜೂನ್ 29ರಂದು ಮೃತಪಟ್ಟಿದ್ದರು ಎಂದು ಪೊಲೀಸರು ತಿಳಿಸಿದ್ದಾರೆ.

ಅದಕ್ಕೂ ಎರಡು ದಿನಗಳ ಮೊದಲೇ ಅವರ ಪ್ರಾಣಪಕ್ಷಿ ಹಾರಿಹೋಗಿತ್ತು ಎಂದು ಭಾವಿಸಿದ್ದಾರೆ. ಅವರ ಸಾವಿಗೆ ನಿಖರವಾದ ಕಾರಣ ಏನು ಎಂಬುದು ಗೊತ್ತಾಗಿಲ್ಲ. ಒಂಟಿತನ ತಾಳಲಾರದೆ ಅವರು ಆತ್ಮಹತ್ಯೆಗೆ ಶರಣಾಗಿರಬಹುದು ಎಂದು ಅನುಮಾನಿಸಿದ್ದಾರೆ ಪೊಲೀಸರು.

1961ರಲ್ಲಿ ಮಾರ್ವೆಲ್ ಕಾಮಿಕ್ಸ್ ಪ್ರಧಾನ ಸಂಪಾದಕ ಸ್ಟಾನ್‌ ಲೀ ಜತೆಗೆ ಕೈಜೋಡಿಸಿ ಸ್ಪೈಡರ್‌ಮ್ಯಾನ್ ಪಾತ್ರವನ್ನು ಸೃಷ್ಟಿಸಿದರು. ಆ ಕ್ರೆಡಿಟ್ ಅವರಿಗೇ ಸಲ್ಲಿದರೂ ಸ್ಪೈಡರ್‌ಮ್ಯಾನ್ ಕಾಸ್ಟ್ಯೂಮ್, ವೆಬ್ ಶೂಟರ್ಸ್, ವಿನ್ಯಾಸ ಹೀಗೆ ಎಲ್ಲವೂ ಡಿಟ್ಕೋ ಆಲೋಚನೆಯಲ್ಲಿ ಮೂಡಿದಂತಹವು.

ಮೊದಲು ಕಾಮಿಕ್ ರೂಪದಲ್ಲಿ ಬಂದ ಸ್ಪೈಡರ್‌ಮ್ಯಾನ್‌ಗೆ ಅದ್ಭುತ ಪ್ರತಿಕ್ರಿಯೆ ಸಿಕ್ಕಿದ ಬಳಿಕ ಸಣ್ಣಪುಟ್ಟ ಬದಲಾವಣೆಗಳನ್ನು ಮಾಡಿ ಆ್ಯನಿಮೇಟೆಡ್ ಸೀರೀಸ್ ಆಗಿ ಮಾರ್ಲೆವ್ ಕಾಮಿಕ್ಸ್ ಸೃಷ್ಟಿಸಿದರು.

ಸ್ಪೈಡರ್‌ಮ್ಯಾನ್ ಜತೆಗೆ ಆ ಸೀರೀಸ್‍ನ ವಿಲನ್ ಪಾತ್ರಗಳಾದ ಗ್ರೀನ್ ಗೋಬ್ಲಿನ್, ಡಾಕ್ಟರ್ ಆಕ್ಟೋಪಸ್, ಸಾಂಡ್‍ಮ್ಯಾನ್, ದಿ ಲಿಜರ್ಡ್ ಎಲ್ಲವನ್ನೂ ಡಿಸೈನ್ ಮಾಡಿದರು. ಇವುಗಳ ಜತೆಗೆ 1963ರಲ್ಲಿ ಡಾಕ್ಟರ್ ಸ್ಟ್ರೇಂಜ್ ಪಾತ್ರವನ್ನೂ ಅವರು ಸೃಷ್ಟಿಸಿದರು.

ಬಳಿಕ ತನ್ನ ಸಹಚರ ಸ್ಟಾನ್ ಲೀ ಜತೆಗೆ ಭಿನ್ನಭಿಪ್ರಾಯಗಳ ಕಾರಣ ಮಾರ್ವೆಲ್ ಕಾಮಿಕ್ಸ್‌ಗೆ ಗುಡ್ ಬೈ ಹೇಳಿದ ಡಿಟ್ಕೋ ಮುಂದೆ ಡಿಸಿ ಕಾಮಿಕ್ಸ್, ಚಾರ್ಲ್‌ಟೋನ್, ಇನ್ನಷ್ಟು ಸ್ವತಂತ್ರ ಪ್ರಕಾಶಕರ ಜತೆಗೆ ಕೆಲಸ ಮಾಡಿದರು. ಮತ್ತೆ 1979ರಲ್ಲಿ ಮಾರ್ವೆಲ್‌ಗೆ ಮರಳಿದ ಅವರು ಮೆಷಿನ್ ಮ್ಯಾನ್, ಮೈಕ್ರೋನಟ್ಸ್‌ನಂತಹ ಪಾತ್ರಗಳನ್ನು ಸೃಷ್ಟಿಸಿದರು. 1992ರಲ್ಲಿ ಸ್ವ್ಕಿರಿಲ್ ಗರ್ಲ್ ಅವರು ಸೃಷ್ಟಿಸಿದ ಕೊನೆಯ ಪಾತ್ರ. ಡಿಟ್ಕೋ ನಿಧನಕ್ಕೆ ಹಾಲಿವುಡ್ ಕಣ್ಣೀರು ಮಿಡಿದಿದೆ.