ಶ್ರುತಿ ಹರಿಹರನ್‌ಗೆ ಮದುವೆ ಆಗಿದೆ ಎಂಬ ಸಂಗತಿ ದೂರಿನಲ್ಲಿ ಬಹಿರಂಗ

ನಟಿ ಶ್ರುತಿ ಹರಿಹರನ್ ಅವರಿಗೆ ಮದುವೆ ಆಗಿದೆಯೇ ಇಲ್ಲವೇ ಎಂಬ ಸಂಗತಿ ಇಷ್ಟು ದಿನಗಳ ಕಾಲ ಗುಟ್ಟಾಗಿತ್ತು. ಆದರೆ ಇದೀಗ #MeToo ಅಭಿಯಾನದ ಭಾಗವಾಗಿ ಅವರು ಅರ್ಜುನ್ ಸರ್ಜಾ ವಿರುದ್ಧ ಲೈಂಗಿಕ ದೌರ್ಜನ್ಯ ಆರೋಪ ಮಾಡಿದ್ದಾರೆ. ಈ ವಿಚಾರವಾಗಿ ಅತ್ತ ಅರ್ಜುನ್ ಸರ್ಜಾ ಸಹ ಕೋರ್ಟ್ ಮೆಟ್ಟಿಲೇರಿದ್ದಾರೆ.

ಇದೀಗ ಶ್ರುತಿ ಹರಿಹರನ್ ಸಹ ಅರ್ಜುನ್ ಸರ್ಜಾ ವಿರುದ್ಧ ಕಬ್ಬನ್ ಪಾರ್ಕ್ ಪೊಲೀಸ್ ಠಾಣೆಯಲ್ಲಿ ಶನಿವಾರ (ಅಕ್ಟೋಬರ್ 27) ದೂರು ನೀಡಿದ್ದಾರೆ. ದೂರಿನ ಪ್ರತಿಯಲ್ಲಿ ಅರ್ಜುನ್ ಸರ್ಜಾ ವಿರುದ್ಧ ಅನೇಕ ಆರೋಪಗಳನ್ನು ಮಾಡಿದ್ದಾರೆ.

ನವೆಂಬರ್ 2015ರಲ್ಲಿ ತಾನು 'ವಿಸ್ಮಯ' ಎಂಬ ಚಿತ್ರದಲ್ಲಿ ರಂಜಿತ್ ಕಾಳಿದಾಸ್‌ಗೆ (ಅರ್ಜುನ್ ಸರ್ಜಾ) ಪತ್ನಿಯಾಗಿ ಅಭಿನಯಿಸಿದ್ದೇನೆ. ಹೆಬ್ಬಾಳದ ಪ್ರೆಸಿಡೆನ್ಸಿ ಕಾಲೇಜು ಸಮೀಪದ ಬಂಗಲೆಯಲ್ಲಿ ಚಿತ್ರೀಕರಣ ನಡೆಯುತ್ತಿತ್ತು. ಆಗ ಏನೆಲ್ಲಾ ನಡೆಯಿತು ಎಂಬುದನ್ನು ದೂರಿನಲ್ಲಿ ವಿವರವಾಗಿ ಬರೆದಿದ್ದಾರೆ ಶ್ರುತಿ.

ಇನ್ನೊಂದು ವಿಶೇಷ ಎಂದರೆ ಇಷ್ಟು ದಿನ ಶ್ರುತಿ ಹರಿಹರನ್ ಅವರಿಗೆ ಮದುವೆಯಾಗಿಲ್ಲ ಎಂದೇ ಎಲ್ಲರೂ ಭಾವಿಸಿದ್ದರು. ದೂರಿನ ಪ್ರತಿಯಲ್ಲಿ ಅವರ ಪತಿ ಹೆಸರು ರಾಮ್ ಕುಮಾರ್ ಎಂದು ನಮೂದಿಸಿದ್ದಾರೆ. ಒಟ್ಟಾರೆ ಅವರಿಗೆ ಮದುವೆಯಾಗಿದೆ ಎಂಬ ಸಂಗತಿ ಇದೀಗ ಬಹಿರಂಗವಾಗಿದೆ.

ವಿಸ್ಮಯ ಚಿತ್ರದ ರಿಹರ್ಸಲ್ ಸಮಯದಲ್ಲಿ ಡೈಲಾಗ್ ಮುಗಿದ ಬಳಿಕ ಅರ್ಜುನ್ ನನ್ನನ್ನು ತಬ್ಬಿಕೊಂಡರು. ಆದರೆ ನನ್ನ ಒಪ್ಪಿಗೆ ಇಲ್ಲದೆ ಅವರ ಕೈ ನನ್ನ ಬೆನ್ನ ಮೇಲೆ ಮೇಲಿಂದ ಕೆಳಗೆ ಅಸಹವಾಗಿ ಸ್ಪರ್ಶಿಸಿದರು. ಬಳಿಕ ಬರಸೆಳೆದು ಬಿಗಿಯಾಗಿ ಅಪ್ಪಿದರು. ಫೋರ್‌ಪ್ಲೇ ಸನ್ನಿವೇಶದಲ್ಲಿ ಇದನ್ನು ಬಳಸೋಣವೇ ಎಂದು ನಿರ್ದೇಶಕರಿಗೆ ಹೇಳಿದ್ದಾಗಿ ದೂರಿನಲ್ಲಿ ತಿಳಿಸಿದ್ದಾರೆ. ಅರ್ಜುನ್ ಅವರ ವರ್ತನೆಯಿಂದ ನನಗೆ ಬೇಸರವಾಗಿ ಬಳಿಕ ರಿಹರ್ಸಲ್‍ಗೆ ಬರಲ್ಲ ಎಂದು ಹೇಳಿ, ನೇರವಾಗಿ ಶೂಟಿಂಗ್‌ಗೆ ಬರುತ್ತಿದ್ದೆ ಎಂದಿದ್ದಾರೆ.

ಅರ್ಜುನ್ ಸರ್ಜಾ ವಿರುದ್ಧ ಭಾರತೀಯ ದಂಡ ಸಂಹಿತೆಯ ಸೆಕ್ಷನ್ 354 (ಮಾನಭಂಗ), 354ಎ (ಲೈಂಗಿಕ ದೌರ್ಜನ್ಯ), 509 (ಅಸಭ್ಯ ವರ್ತನೆ) ಪ್ರಕರಣಗಳನ್ನು ದಾಖಲಿಸಿಕೊಳ್ಳಬೇಕು ಎಂದು ಪೊಲೀಸರಿಗೆ ನೀಡಿರುವ ದೂರಿನಲ್ಲಿ ತಿಳಿಸಿದ್ದಾರೆ.