ಸಂಕಷ್ಟಕರ ಗಣಪತಿ ಟ್ರೇಲರ್‌ಗೆ ಫಿದಾ ಆದ ಕಿಚ್ಚ

*ಶರಣು ಹುಲ್ಲೂರು

Vijaya Karnataka Web

ಸಂಕಷ್ಟಕರ ಗಣಪತಿ ಚಿತ್ರದ ಟ್ರೇಲರ್‌ ಎಲ್ಲೆಡೆ ಸದ್ದು ಮಾಡುತ್ತಿದ್ದು, ನಟ ಸುದೀಪ್‌ ಅವರು ಅದನ್ನು ನೋಡಿ ಮೆಚ್ಚುಗೆ ವ್ಯಕ್ತಪಡಿಸಿದ್ದಾರೆ. ಸ್ವತಃ ಟ್ವಿಟ್‌ ಮಾಡಿ ಚಿತ್ರತಂಡಕ್ಕೆ ಶುಭ ಹಾರೈಸಿದ್ದಾರೆ.

ಸುದೀಪ್‌ ಅವರು ಟ್ರೇಲರ್‌ ನೋಡಿ ಮೆಚ್ಚಿಕೊಂಡಿದ್ದಕ್ಕೆ ನಮ್ಮ ತಂಡಕ್ಕೆ ಆನೆಬಲ ಬಂದಿದೆ. ಚಿತ್ರರಂಗದ ಕಲಾವಿದರು ಮತ್ತು ತಂತ್ರಜ್ಞರು ಈಗಾಗಲೇ ರಿಲೀಸ್‌ ಆಗಿರುವ ಫಸ್ಟ್‌ಲುಕ್‌ ಮತ್ತು ಟ್ರೇಲರ್‌ ಬಗ್ಗೆ ಪ್ರಂಶಸೆ ವ್ಯಕ್ತಪಡಿಸಿದ್ದಾರೆ. ಬೇರೆ ಬೇರೆ ಸಿನಿಮಾ ರಂಗಗಳ ತಂತ್ರಜ್ಞರು ಕೂಡ ಕನ್ನಡ ಚಿತ್ರದ ಬಗ್ಗೆ ಪ್ರತಿಕ್ರಿಯೆ ನೀಡಿದ್ದಾರೆ. ಸಹಜವಾಗಿಯೇ ನಮ್ಮ ತಂಡಕ್ಕೆ ಹೆಮ್ಮೆ ತಂದಿದೆ' ಅಂತಾರೆ ಈ ಸಿನಿಮಾದ ನಾಯಕ ಲಿಖಿತ್‌ ಶೆಟ್ಟಿ.

ಸಿನಿಮಾದ ಸ್ಟೋರಿ ಕೂಡ ವಿಭಿನ್ನವಾಗಿದೆ. ಆತ ಯುವ ವ್ಯಂಗ್ಯಚಿತ್ರಕಾರ. ಚಿತ್ರಬಿಡಿಸಲು ಬೇಕಾದ ಕೈಗಳೇ ಅವನ ಮಾತು ಕೇಳದಂತಾಗುತ್ತವೆ. ಅಂದರೆ, ಆತ ಏಲಿಯನ್‌ ಹ್ಯಾಂಡ್‌ ಸಿಂಡ್ರೋಮ್‌ನಿಂದ ಬಳಲುತ್ತಿರುತ್ತಾನೆ. ನೂರಾರು ಕನಸು ಕಟ್ಟಿರುವ ಈ ಚಿತ್ರಕಾರನ ಬದುಕು ಯಾವ ಹಾದಿ ಹಿಡಿಯುತ್ತದೆ ಎನ್ನುವುದೇ ಸಿನಿಮಾದ ಸ್ಟೋರಿ. ಪನ್ಮಂಡಿ ಎಂಬ ಕಿರುಚಿತ್ರವನ್ನು ಈಗಾಗಲೇ ನಿರ್ದೇಶಿಸಿರುವ ಎಸ್‌.ಅರ್ಜುನ್‌ ಕುಮಾರ್‌ ಈ ಚಿತ್ರಕ್ಕೆ ಆ್ಯಕ್ಷನ್‌ ಕಟ್‌ ಹೇಳಿದ್ದಾರೆ.

ವ್ಯಕ್ತಿಗೆ ಕೈಮೇಲೆ ಹಿಡಿತವೇ ಇಲ್ಲದಿದ್ದರೆ ಏನೆಲ್ಲ ಅನಾಹುತಗಳು ಆಗುತ್ತವೆ ಎನ್ನುವ ಸೂಕ್ಷ್ಮ ವಿಚಾರವನ್ನು ಹಾಸ್ಯ ರೂಪದಲ್ಲಿ ಹೇಳುವ ಪ್ರಯತ್ನ ಸಿನಿಮಾದಲ್ಲಿ ಆಗಿದೆ. ಈಗಾಗಲೇ ತುಳು ಚಿತ್ರಗಳಲ್ಲಿ ನಟಿಸಿರುವ ಲಿಖಿತ್‌ ಶೆಟ್ಟಿ ಈ ಚಿತ್ರದ ನಾಯಕ. ಟಿ.ವಿ.ಯಲ್ಲಿ ನಿರೂಪಕರಾಗಿದ್ದ ಅವರಿಗೆ ನಾಯಕನಾಗಬೇಕೆಂಬುದು ಹಲವು ವರ್ಷಗಳ ಕನಸಂತೆ. ಈಗದು ಈಡೇರಿದೆ. ಈ ಪಾತ್ರ ಮಾಡುವುದಕ್ಕಾಗಿಯೇ ಲಿಖಿತ್‌ ಏಲಿಯನ್‌ ಹ್ಯಾಂಡ್‌ ಸಿಂಡ್ರೋಮ್‌ನಿಂದ ಬಳುತ್ತಿರುವ ಇಬ್ಬರು ವ್ಯಕ್ತಿಗಳನ್ನು ಭೇಟಿ ಮಾಡಿದ್ದಾರಂತೆ.