ಸುದೀಪ್ ದಾಂಪತ್ಯದಲ್ಲಿ ಮತ್ತೆ ಮೂಡಲಿದೆ ನವರಾಗ?

2015ರಲ್ಲಿ ಸುದೀಪ್ ಕುಟುಂಬ ಜೀವನದಲ್ಲಿ ವಿಚ್ಚೇದನ ಎಂಬ ಬಿರುಗಾಳಿಯ ಅಲೆ ಎದ್ದಿತು. ಆ ಸುದ್ದಿ ಹೊರ ಬೀಳುತ್ತಿದ್ದಂತೆ ಸುದೀಪ್‌ರ ಸುಂದರ ಕುಟುಂಬ ನೂರು ಕಾಲ ಒಟ್ಟಾಗಿ ಬಾಳಲಿ ಎಂದು ಅವರ ಅಭಿಮಾನಿಗಳು ಹಾಗೂ ಹಿತೈಷಿಗಳು ಆಶಿಸಿದ್ದರು. ಇದೀಗ ಸುದೀಪ್‌ ದಂಪತಿ ನಡೆದುಕೊಳ್ಳುತ್ತಿರುವ ರೀತಿಯೂ ಅವರ ಹಿತೈಷಿಗಳಿಗೆ ಖುಷಿ ತಂದಿದೆ.

ಇವರ ವಿಚ್ಛೇದನ ಅರ್ಜಿಯು ಬೆಂಗಳೂರಿನ ಕುಟುಂಬ ನ್ಯಾಯಾಲಯದಲ್ಲಿದ್ದು ವಿಚಾರಣೆಗೆ ಸುದೀಪ್ ದಂಪತಿ ಸೋಮವಾರ ನ್ಯಾಯಾಲಯಕ್ಕೆ ಬರಬೇಕಾಗಿತ್ತು. ಆದರೆ ಸುದೀಪ್ ಮತ್ತು ಅವರ ಪತ್ನಿ ಪ್ರಿಯಾ ಆಗಲಿ ವಿಚಾರಣೆಗೆ ಹಾಜರಾಗಲಿಲ್ಲ.

ಕಹಿ ಘಟನೆಗಳನ್ನು ಮರೆತು ತಮ್ಮ ಮಗಳು ಸಾನ್ವಿಗೋಸ್ಕರ ಮತ್ತೆ ಒಂದಾಗಿ ಬಾಳಲಿದ್ದಾರೆ ಎಂಬ ಸುದ್ದಿ ಕೇಳಿ ಬಂದಿತ್ತು. ಇತ್ತೀಚೆಗೆ ಪರೋಕ್ಷವಾಗಿ ಸುದೀಪ್ ನಡೆದುಕೊಳ್ಳುತ್ತಿರುವ ರೀತಿಯಿಂದಲೂ ಸುದೀಪ್ ವಿಚ್ಛೇದನ ನಿರ್ಧಾರದಿಂದ ಹಿಂದೆ ಸರಿದಿರುವಂತೆ ಇದೆ.

'ವೀಕೆಂಡ್ ವಿಥ್ ರಮೇಶ್' ಕಾರ್ಯಕ್ರಮದಲ್ಲಿ ಪತ್ನಿಗೆ ಥ್ಯಾಂಕ್ಸ್ ಹೇಳಿದ್ದರು. ಪತ್ನಿಯ ಹೆಸರಿನಲ್ಲಿರುವ ಕಂಪನಿ ಸ್ಟೇಜ್ 360 ಡಿಗ್ರಿಯ ವಾರ್ಷಿಕ ಸಮಾರಂಭದ ದಿನದಂದು ಪತ್ನಿಯನ್ನು ಹೊಗಳಿ ಟ್ವೀಟ್ ಮಾಡಿದ್ದರು.

ಕೆಲವೊಂದು ಕಾರ್ಯಕ್ರಮಗಳಲ್ಲೂ ಅವರು ಜೊತೆಯಾಗಿ ಕಾಣಿಸಿಕೊಂಡಿದ್ದರು. ಸಂಸಾರ ಎಂದ ಮೇಲೆ ಕಷ್ಟ-ಸುಖ ಸಾಮಾನ್ಯ. ಈ ದಂಪತಿ ಮತ್ತೆ ಒಂದಾಗಿ ನೂರು ಕಾಲ ಸಂತೋಷವಾಗಿ ಬಾಳಲಿ ಅನ್ನುವುದೇ ಅವರ ಅಭಿಮಾನಿಗಳ ಆಶಯ.