ಮತ್ತೊಮ್ಮೆ ರಾಜಮೌಳಿ ಸಿನಿಮಾದಲ್ಲಿ ನಟನೆ
ಸದ್ಯ ರಾಜಮೌಳಿ ನಿರ್ದೇಶನದಲ್ಲಿ ಸಿದ್ಧವಾಗುತ್ತಿರುವ ಬಹುನಿರೀಕ್ಷಿತ ಸಿನಿಮಾ 'ಆರ್‌ಆರ್‌ಆರ್‌'ಗೆ ಭರದಿಂದ ಶೂಟಿಂಗ್ ನಡೆಯುತ್ತಿದೆ. ರಾಮ್‌ ಚರಣ್‌ ಮತ್ತು ಜೂ. ಎನ್‌ಟಿಆರ್ ಮೊದಲ ಬಾರಿಗೆ ಈ ಸಿನಿಮಾದಲ್ಲಿ ಒಟ್ಟಿಗೆ ನಟಿಸುತ್ತಿದ್ದು, ಈ ಚಿತ್ರದಲ್ಲಿ 'ಕಿಚ್ಚ' ಸುದೀಪ್ ಅವರಿಗೂ ಮಹತ್ವದ ಪಾತ್ರ ಇರಲಿದೆಯಂತೆ!
ಖಾಕಿ ತೊಟ್ಟು ಮಿಂಚಲಿದ್ದಾರಾ ಕಿಚ್ಚ?
ಮೂಲಗಳ ಪ್ರಕಾರ, 'ಆರ್‌ಆರ್‌ಆರ್‌'ನಲ್ಲಿ ಬರುವ ಪ್ರಮುಖ ಪೊಲೀಸ್ ಅಧಿಕಾರಿ ಪಾತ್ರವೊಂದಕ್ಕೆ ಕಿಚ್ಚ ಬಣ್ಣ ಹಚ್ಚುವ ಸಾಧ್ಯತೆಗಳಿವೆಯಂತೆ. ಸಿನಿಮಾದಲ್ಲಿ ಇದು ಬಹಳ ಮುಖ್ಯ ಪಾತ್ರವಾಗಿರುವುದರಿಂದ, ಸುದೀಪ್ ಅವರಿಂದಲೇ ಮಾಡಿಸಬೇಕು ಎಂಬುದು ಚಿತ್ರತಂಡ ಅಭಿಲಾಷೆಯಂತೆ.
'ಬಾಹುಬಲಿ'ಯಲ್ಲಿ ಫ್ಯಾನ್ಸ್ ಬೇಸರ
ಮೆಗಾ ಹಿಟ್ ಸಿನಿಮಾ 'ಬಾಹುಬಲಿ'ಯಲ್ಲಿ 'ಕಿಚ್ಚ' ಸುದೀಪ್ ಅಸ್ಲಾಂ ಖಾನ್ ಎಂಬ ಶಸ್ತ್ರಾಸ್ತ್ರ ವ್ಯಾಪಾರಿ ಪಾತ್ರದಲ್ಲಿ ಕಾಣಿಸಿಕೊಂಡಿದ್ದರು. ಕೆಲವೇ ನಿಮಿಷ ಇದ್ದರೂ, ಬಹಳ ಪರಿಣಾಮಕಾರಿಯಾಗಿ ಆ ಪಾತ್ರ ಮೂಡಿಬಂದಿತ್ತು. ಅಲ್ಲದೆ, 'ಬಾಹುಬಲಿ 2'ನಲ್ಲಿ ಆ ಪಾತ್ರದ ಅವಧಿ ಇನ್ನೂ ಹೆಚ್ಚು ಇರಲಿದೆ ಎಂದೇ ಎಲ್ಲರೂ ಭಾವಿಸಿದ್ದರು. ಆದರೆ, ಹಾಗೇ ಆಗಲಿಲ್ಲ. ಪಾರ್ಟ್ 2ರಲ್ಲಿ ಸುದೀಪ್ ಇರಲಿಲ್ಲ. ಇದು ಅಭಿಮಾನಿಗಳಿಗೆ ಬೇಸರ ತಂದಿತ್ತು.
'ಈಗ' ನೀಡಿತ್ತು ದೊಡ್ಡ ಜನಪ್ರಿಯತೆ
ರಾಜಮೌಳಿ ನಿರ್ದೇಶನದ 'ಈಗ' ಸಿನಿಮಾದಲ್ಲಿ ಸುದೀಪ್ ವಿಲನ್ ಪಾತ್ರ ಮಾಡಿದ್ದರು. ಆ ಸಿನಿಮಾದಿಂದ ಅವರಿಗೆ ದೊಡ್ಡ ಜನಪ್ರಿಯತೆ ಸಿಕ್ಕಿತ್ತು. ಬಹುಭಾಷೆಯಲ್ಲಿ ಸಿನಿಮಾ ಮೂಡಿಬಂದಿದ್ದರಿಂದ ಎಲ್ಲೆಡೆ ಸುದೀಪ್ ನಟನೆಗೆ ಮೆಚ್ಚುಗೆ ವ್ಯಕ್ತವಾಗಿತ್ತು. ಅಲ್ಲದೆ, ಸಾಕಷ್ಟು ಪ್ರಶಸ್ತಿಗಳು ಅವರಿಗೆ ಲಭಿಸಿದ್ದವು.
ಅಧಿಕೃತ ಮಾಹಿತಿ ಇನ್ನೂ ಹೊರಬಿದ್ದಿಲ್ಲ!
ಈ ಸುದ್ದಿ ಟಾಲಿವುಡ್‌ ಅಂಗಳದಲ್ಲಿ ಬಿರುಸಿನಿಂದ ಓಡಾಡುತ್ತಿದೆ. ಆದರೆ, ಈ ಬಗ್ಗೆ ಯಾರೊಬ್ಬರು ಅಧಿಕೃತ ಮಾಹಿತಿ ನೀಡಿಲ್ಲ. ಅಲ್ಲದೆ, ಸುದೀಪ್ ಈಗ ಸಿಕ್ಕಾಪಟ್ಟೆ ಬ್ಯುಸಿ ಇದ್ಧಾರೆ. ಇತ್ತೀಚೆಗಷ್ಟೇ ಅವರ 'ಕೋಟಿಗೊಬ್ಬ 3' ಚಿತ್ರದ ಮೋಷನ್‌ ಪೋಸ್ಟರ್‌ ರಿಲೀಸ್ ಆಗಿದ್ದು, ಟ್ರೆಂಡಿಂಗ್‌ನಲ್ಲಿದೆ.