ಅಭಿಷೇಕ್ 'ಅಮರ್ ಟೀಸರ್': ಅಂಬರೀಷ್ ನೆನೆದ ಸುಮಲತಾ

ರೆಬಲ್ ಸ್ಟಾರ್ ಅಂಬರೀ‍ಷ್ ಮಗ ಅಭಿಷೇಕ್ ನಾಯಕತ್ವದ 'ಅಮರ್' ಟೀಸರ್ ನಾಳೆ, 14 ಫೆಬ್ರವರಿ 2019ರಂದು 'ಯೂ ಟ್ಯೂಬ್‌ನಲ್ಲಿ ಬಿಡುಗಡೆಯಾಗಲಿದೆ. ಈಗಾಗಲೆ ಈ ಚಿತ್ರದ ಬಗ್ಗೆ ಭಾರೀ ನಿರೀಕ್ಷೆ ಮೂಡಿದೆ. ನಾಳೆ ಬಿಡುಗಡೆ ಆಗಲಿರುವ 'ಅಮರ್' ಟೀಸರ್‌ಗೆ ಶುಭಾಶಯ ಕೋರಿ ಈಗಾಗಲೇ ಕಿಚ್ಚ ಸುದೀಪ್ ಹಾಗೂ ದರ್ಶನ್ ತೂಗುದೀಪ ಅವರು ಅಭಿಷೇಕ್‌ಗೆ ಟ್ವೀಟ್ ಮಾಡಿದ್ದಾರೆ.

ಮಲೇಶಿಯಾದಲ್ಲಿ ಮಗ ಅಭಿಷೇಕ್ ಜೊತೆ ಇರುವ ಅಂಬರೀಷ್ ಪತ್ನಿ ಸುಮಲತಾ ಅವರು ಈ ಸಮಯದಲ್ಲಿ ಅಗಲಿರುವ ತಮ್ಮ ಗಂಡ ಅಂಬಿಯನ್ನು ನೆನೆದು ಟ್ವೀಟರ್ ಖಾತೆಯಲ್ಲಿ "ಯಾವತ್ತೂ ನಾವು ಅವರ ಗೈಡೆನ್ಸ್ ಮತ್ತು ಆಶೀರ್ವಾದವನ್ನು ಎದುರು ನೋಡುತ್ತೇವೆ.. ಅವರು ಮೇಲಿನಿಂದಲೇ ನಿನ್ನನ್ನು ನೋಡಿ 'ಮಗ್ನೇ, ಆಲ್ ದಿ ಬೆಸ್ಟ್..' ಎಂದಿರುತ್ತಾರೆ" ಎಂದು ಹೇಳಿದ್ದಾರೆ. ಮುಂದುವರಿದ ಸುಮಲತಾ ಅವರು "ಅಭೀ, ಅಮರ್ ಚಿತ್ರಕ್ಕೆ ನಮ್ಮ ಆಶೀರ್ವಾದಗಳು.." ಎಂದು ಟ್ವೀಟ್ ಮಾಡಿದ್ದಾರೆ.

ಅಂಬರೀಷ್ ಅವರು ತೀರಿಕೊಳ್ಳುವ ಮೊದಲು ತಮ್ಮ ಏಕ ಮಾತ್ರ ಪುತ್ರ ಅಭಿಷೇಕ್ ಅವರ 'ಅಮರ್' ಚಿತ್ರದ ಕೆಲವು ದೃಶ್ಯಗಳನ್ನು ತರಿಸಿಕೊಂಡು ನೋಡಿ ಖುಷಿ ಪಟ್ಟಿದ್ದರಂತೆ. ತಾವು ಚಿತ್ರ ಬಿಡುಗಡೆ ವೇಳೆ ಇರುವುದಿಲ್ಲ ಎಂದು ಮೊದಲೇ ತಿಳಿದಿದ್ದವರಂತೆ ಅಂಬರೀಷ್ ಅವರು 'ತಮ್ಮ ಮಗನ ಮೊದಲ ಚಿತ್ರ 'ಅಮರ್' ಹೇಗೆ ಮೂಡಿ ಬಂದಿದೆ' ಎಂಬುದನ್ನು ನೋಡಿ ಅರಿತಿದ್ದರು. ಆದರೂ ಈ ಚಿತ್ರದ ಟೀಸರ್, ಟ್ರೇಲರ್ ಹಾಗೂ ಸಿನಿಮಾ ವೇಳೆಯಲ್ಲಿ ಪತ್ನಿ ಸುಮಲತಾ ಹಾಗೂ ಮಗ ಅಭಿಷೇಕ್ ಅವರಿಗೆ 'ಅಂಬರೀಷ್' ನೆನಪಾಗುವುದು ಸಹಜ.