ಸನ್ನಿ ಲಿಯೋನ್ ಬೇಕೆಂದು ದಿಲ್ಲಿ ವ್ಯಕ್ತಿಗೆ ನಿತ್ಯ 150 ಫೋನ್ ಕಾಲ್ಸ್

ಸಿನಿಮಾದ ಸನ್ನಿವೇಶ ಒಂದರಲ್ಲಿ ಹೇಳಿದ ಫೋನ್ ನಂಬರ್‌ ನಿಜವಾಗಿಯೂ ಬಾಲಿವುಡ್ ತಾರೆ ಸನ್ನಿ ಲಿಯೋನ್‌‌ದು ಎಂದುಕೊಂಡ ಕೆಲವರು ಆ ಸಂಖ್ಯೆಗೆ ಮುಗಿಬಿದ್ದು ಕರೆ ಮಾಡುತ್ತಿರುವ ಘಟನೆ ಬಳಕಿಗೆ ಬಂದಿದೆ.

ಬಾಲಿವುಡ್ ತಾರೆಗಳಾದ ದಿಲ್ಜಿತ್ ದೋಸಾಂಜ್, ವರುಣ್ ಶರ್ಮಾ, ಕೃತಿ ಸನನ್ ಮುಖ್ಯ ಭೂಮಿಕೆಯಲ್ಲಿರುವ ಸಿನಿಮಾ 'ಅರ್ಜುನ್ ಪಟಿಯಾಲಾ' ಬಿಡುಗಡೆಯಾಗಿ ಯಶಸ್ವಿಯಾಗಿ ಪ್ರದರ್ಶನ ಕಾಣುತ್ತಿದೆ. ಈ ಸಿನಿಮಾದಲ್ಲಿ ಸನ್ನಿ ಲಿಯೋನ್ ಅತಿಥಿ ಪಾತ್ರ ಪೋಷಿಸಿದ್ದು ಸ್ಪೆಷಲ್ ಸಾಂಗ್‌ನಲ್ಲಿ ಸೊಂಟ ಬಳುಕಿಸಿದ್ದಾರೆ.

ಇದೇ ಜುಲೈ 26ರಂದು ತೆರೆಕಂಡ ಈ ಸಿನಿಮಾಗೆ ಪ್ರೇಕ್ಷಕರಿಂದ ಉತ್ತಮ ಪ್ರತಿಕ್ರಿಯೆ ವ್ಯಕ್ತವಾಗಿದೆ. ಈ ಚಿತ್ರದ ಸನ್ನಿವೇಶವೊಂದಾಲ್ಲಿ ಸನ್ನಿ ಲಿಯೋನ್ ತನ್ನ ಫೋನ್ ನಂಬರ್‌ರನ್ನು ದಿಲ್ಜಿತ್‌ಗೆ ನೀಡುತ್ತಾರೆ. ಆದರೆ ಆ ಫೋನ್ ನಂಬರ್ ದಿಲ್ಲಿ ಮೂಲದ 27 ವರ್ಷದ ಯುವಕ ಪುನೀತ್ ಅಗರ್ವಾಲ್‍ಗೆ ಸೇರಿದ್ದು ಇದೀಗ ಆ ಸಂಖ್ಯೆಗೆ ಸಿಕ್ಕಾಪಟ್ಟೆ ಫೋನ್ ಕರೆಗಳು ಬರುತ್ತಿವೆಯಂತೆ. [ಸನ್ನಿ ಲಿಯೋನ್ ಧರಿಸಿರುವ ಈ ಬಟ್ಟೆ ಬೆಲೆ ಅಷ್ಟೇನಾ?]

ವೀಡಿಯೊ ಕಾಲ್ ಮಾಡಿ ಅಂತ ಪೀಡಿಸುತ್ತಿದ್ದಾರೆ, ಅಸಭ್ಯ ರೀತಿಯಲ್ಲಿ ಮಾತನಾಡುತ್ತಿರುವುದಾಗಿ ಪುನೀತ್ ಮಾಧ್ಯಮಗಳಿಗೆ ತಿಳಿಸಿದ್ದಾರೆ. ಈ ಹಿನ್ನೆಲೆಯಲ್ಲಿ ಬೇಸತ್ತ ಅವರು 'ಅರ್ಜುನ್ ಪಟಿಯಾಲಾ' ಸಿನಿಮಾ ನಿರ್ಮಾಪಕರ ವಿರುದ್ಧ ಪ್ರಕರಣ ದಾಖಲಿಸಲು ಮುಂದಾಗಿದ್ದಾರೆ. ದಿನಕ್ಕೆ ಏನಿಲ್ಲವೆಂದರೂ 100 ರಿಂದ 150 ಕರೆಗಳು ಬರುತ್ತಿವೆಯಂತೆ. ತನಗೆ ಮಾನಸಿಕ ಹಿಂಸೆ ನೀಡುತ್ತಿದ್ದಾರೆಂದು ನೋವು ತೋಡಿಕೊಂಡಿದ್ದಾರೆ ಪುನೀತ್.

ಸಾಮಾನ್ಯವಾಗಿ ಸಿನಿಮಾಗಳಲ್ಲಿ ತೋರಿಸುವ, ಹೇಳುವ ಫೋನ್ ನಂಬರ್‌ಗಳು ಬಳಕೆಯಲ್ಲಿ ಇಲ್ಲದ ಅಥವಾ ಪ್ರಚಾರಕ್ಕಾಗಿ ಬಳಸುತ್ತಿರುತ್ತಾರೆ. ಆದರೆ ಈ ಸಿನಿಮಾ ವಿಚಾರದಲ್ಲಿ ಮಾತ್ರ ವ್ಯಕ್ತಿಯೋರ್ವ ಉಪಯೋಗಿಸುತ್ತಿರುವ ಸಂಖ್ಯೆ ನೀಡಿರುವ ಕಾರಣ ಸಮಸ್ಯೆ ಎದುರಾಗಿದೆ. ಈ ಬಗ್ಗೆ ಚಿತ್ರದ ನಿರ್ಮಾಪಕರು ಏನು ಹೇಳುತ್ತಾರೋ ಕಾದು ನೋಡಬೇಕು.