ಮಂಗಳಮುಖಿ ಜತೆ ಸಮಂತಾ 'ಡಿಂಗ್ ಡಾಂಗ್' ವೀಡಿಯೋ ವೈರಲ್

ದಕ್ಷಿಣದಲ್ಲಿ ಸಾಕಷ್ಟು ಕುತೂಹಲ ಮೂಡಿಸಿರುವ ಸಿನಿಮಾ 'ಸೂಪರ್ ಡಿಲಕ್ಸ್'. ಈ ಚಿತ್ರದಲ್ಲಿ ಖ್ಯಾತನಾಮರು ಅಭಿನಯಿಸಿರುವುದು ಒಂದು ವಿಶೇಷವಾದರೆ, ಇದೇ ಮೊದಲ ಬಾರಿಗೆ ಬಾಹುಬಲಿ ಸಿನಿಮಾದ ಶಿವಗಾಮಿ ಖ್ಯಾತಿಯ ರಮ್ಯಾ ಕೃಷ್ಣ ಲೈಂಗಿಕ ಕಾರ್ಯಕರ್ತೆಯಾಗಿ ಕಾಣಿಸಿಕೊಂಡಿದ್ದಾರೆ.

ಇದೀಗ ಈ ಸಿನಿಮಾಗೆ ಸಂಬಂಧಿಸಿದ ಡಿಂಗ್ ಡಾಂಗ್ ಪ್ರೊಮೊ ರಿಲೀಸ್ ಆಗಿದ್ದು ಭಿನ್ನ ಶೈಲಿ ಮೂಲಕ ಗಮನಸೆಳೆದಿದೆ. ಈ ಪ್ರೊಮೊನಲ್ಲಿ ಸಂಭಾಷಣೆಗೆ ಹಾಡಿನ ರೂಪ ನೀಡಿರುವುದು ಗಮನಾರ್ಹ. ಈ ಚಿತ್ರದಲ್ಲಿ ವಿಜಯ್ ಸೇತುಪತಿ ಮಂಗಳಮುಖಿಯಾಗಿ ಕಾಣಿಸಿಕೊಂಡಿದ್ದಾರೆ. ಫಹಾದ್ ಫಾಸಿಲ್ ಮತ್ತು ಸಮಂತಾ ಅಕ್ಕಿನೇನಿ ಸಹ ತಾರಾಗಣದಲ್ಲಿರುವ ಸಿನಿಮಾ.

ಈ ಡಿಂಗ್ ಡಾಂಗ್ ಪ್ರೊಮೊ ನೋಡಿದರೆ ಕುತೂಹಲ ಕೆರಳಿಸುವಂತಿದ್ದು ನೋಡುಗರಲ್ಲಿ ಇವರ ಒಳಸಂಚು ಏನು ಎಂಬ ಬಗ್ಗೆಯೂ ಗಮನಸೆಳೆಯುತ್ತದೆ. ಸೂಪರ್ ಡಿಲಕ್ಸ್ ಟ್ರೇಲರ್ ಸಹ ಇದೇ ರೀತಿ ಆಸಕ್ತಿ ಮೂಡಿಸುವಂತೆ ಇದ್ದು ಅದಕ್ಕೂ ಇದೇ ರೀತಿ ಪ್ರತಿಕ್ರಿಯೆ ಸಿಕ್ಕಿತ್ತು.

ಈ ಚಿತ್ರಕ್ಕೆ ತ್ಯಾಗರಾಜನ್ ಕುಮಾರರಾಜ ಆ್ಯಕ್ಷನ್ ಕಟ್ ಹೇಳಿದ್ದಾರೆ. ತಮ್ಮ ಪಾತ್ರದ ಬಗ್ಗೆ ರಮ್ಯಾ ಮಾತನಾಡಿದ್ದು, ಚಿತ್ರದಲ್ಲಿನ ಒಂದೇ ಒಂದು ಸೀನ್‍ಗಾಗಿ 37 ರೀಟೇಕ್ ತೆಗೆದುಕೊಂಡಿದ್ದಾಗಿ ಹೇಳಿದ್ದರು.

ಚಿತ್ರದಲ್ಲಿನ ತಮ್ಮ ಪಾತ್ರದ ಬಗ್ಗೆ ಅವರು ಕೆಲವೊಂದು ಕುತೂಹಲಕರ ಅಂಶಗಳನ್ನು ಹಂಚಿಕೊಂಡಿದ್ದಾರೆ. "ಈ ಸಿನಿಮಾದಲ್ಲಿ ನಟ ನಟಿಯರಿಗಿಂತ ಕಥಾವಸ್ತುವಿಗೆ ಪ್ರಾಮುಖ್ಯತೆ ನೀಡಲಾಗಿದೆ. ಇದರಲ್ಲಿ ನಾನು ವೇಶ್ಯೆ ಪಾತ್ರ ಪೋಷಿಸಿದ್ದೇನೆ. ಇದುವರೆಗೂ ನಾನು ಮಾಡಿದ ಪಾತ್ರಗಳು ಒಂದು ಎತ್ತರದ್ದಾದರೆ, ಈ ಪಾತ್ರ ಇನ್ನೊಂದು ಹಂತದ್ದು. ಸಿನಿಮಾದಲ್ಲಿ ತಾನು ನಟಿಸಬೇಕಾಗಿದ್ದ ಒಂದು ಸನ್ನಿವೇಶವನ್ನು 37 ಟೇಕ್ ತೆಗೆದುಕೊಂಡರು. ಆ ಸನ್ನಿವೇಶ ಪೂರ್ಣಗೊಳಿಸಲು ಎರಡು ದಿನ ಹಿಡಿಸಿತು. ಅದನ್ನು ನೋಡಿ ನನಗಿಂತ, ನನ್ನ ಸಹಾಯಕರು, ಸೆಟ್‍ನಲ್ಲಿದ್ದವರು ಶಾಕ್ ಆದರು" ಎಂದಿದ್ದಾರೆ.

ಕೆಲವು ಪಾತ್ರಗಳನ್ನು ಹಣಕ್ಕಾಗಿ ಮಾಡುತ್ತೇವೆ. ಇನ್ನೂ ಕೆಲವು ಜನಪ್ರಿಯತೆಗಾಗಿ ಮಾಡುತ್ತೇವೆ. ಇನ್ನೂ ಕೆಲವು ಇಷ್ಟಪಟ್ಟು ಮಾಡುತ್ತೇವೆ. ಈ ಸಿನಿಮಾವನ್ನು ಮಾತ್ರ ನಾನು ಇಷ್ಟಪಟ್ಟು ಮಾಡಿದ್ದೇನೆ" ಎಂದಿದ್ದಾರೆ. ಮಾರ್ಚ್ 29ರಂದು ಈ ಸಿನಿಮಾ ಪ್ರೇಕ್ಷಕರ ಮುಂದೆ ಬರುತ್ತಿದೆ.