ಸೂಪರ್‌ ಸುದೀಪ್‌

ಕನ್ನಡದ ಸ್ಟಾರ್‌ಗಳು ಒಂದಾಗುವುದಿಲ್ಲ ಅನ್ನುವ ಮಾತಿತ್ತು. ಅದನ್ನು ಸುಳ್ಳಾಗಿಸುತ್ತಿದ್ದಾರೆ ಸುದೀಪ್‌. ಸೂಪರ್‌ ಸ್ಟಾರ್‌ಗಳ ಜತೆ ತೆರೆ ಹಂಚಿಕೊಳ್ಳುವ ಮೂಲಕ ಸಿನಿಮಾ ರಂಗವನ್ನು ಒಟ್ಟಾಗಿಸುತ್ತಿದ್ದಾರೆ. ಅಲ್ಲದೇ, ಸದ್ಯ ಮೂರು ಚಿತ್ರಗಳನ್ನು ಒಪ್ಪಿಕೊಳ್ಳುವ ಮೂಲಕ ಸುದೀಪ್‌ ಅಚ್ಚರಿ ಮೂಡಿಸಿದ್ದಾರೆ.

ಮಾಣಿಕ್ಯ ಸಿನಿಮಾದಲ್ಲಿ ರವಿಚಂದ್ರನ್‌ ಜತೆ ನಟಿಸಿದ್ದರು ಸುದೀಪ್‌. ಈಗ ಮತ್ತೆ ಹೆಬ್ಬುಲಿ ಚಿತ್ರದಲ್ಲಿ ಒಂದಾಗಿದ್ದಾರೆ. ಸಿನಿಮಾಟೋಗ್ರಾಫರ್‌ ಕೃಷ್ಣ ಈ ಚಿತ್ರಕ್ಕೆ ಆ್ಯಕ್ಷನ್‌ ಕಟ್‌ ಹೇಳುತ್ತಿದ್ದು, ಸುದೀಪ್‌ರ ಅಣ್ಣನಾಗಿ ರವಿಚಂದ್ರನ್‌ ಕಾಣಿಸಿಕೊಳ್ಳುತ್ತಿರುವುದು ವಿಶೇಷ. ಅಂದಹಾಗೆ ಸುದೀಪ್‌ ಇಲ್ಲಿ ಆರ್ಮಿ ಕಮಾಂಡರ್‌ ಪಾತ್ರ ನಿರ್ವಹಿಸುತ್ತಿದ್ದಾರೆ.

ಈ ಹಿಂದೆ ಶಿವರಾಜ್‌ಕುಮಾರ್‌ ಜತೆ ತೆರೆ ಹಂಚಿಕೊಂಡಿದ್ದ ರಿಯಲ್‌ಸ್ಟಾರ್‌ ಉಪೇಂದ್ರ, ಈ ಬಾರಿ ಸುದೀಪ್‌ ಜತೆ ನಟಿಸುತ್ತಿದ್ದಾರೆ. ಇದು ಹಿಂದಿ ಸಿನೆಮಾ ‘ಓ ಮೈ ಗಾಡ್‌’ ರಿಮೇಕ್‌ ಚಿತ್ರ. ಈ ಸಿನಿಮಾದಲ್ಲಿ ಹಲವು ವಿಶೇಷತೆಗಳಿವೆ. ನಿರ್ದೇಶಕ ನಂದಕಿಶೋರ್‌ ಈ ಸಿನಿಮಾದಲ್ಲಿ ಇಬ್ಬರು ಜನಪ್ರಿಯ ನಟರು ಒಟ್ಟಿಗೆ ತಂದಿದ್ದಾರೆ. ಅಲ್ಲದೇ ಇಬ್ಬರಿಗೂ ವಿಭಿನ್ನ ಗೆಟಪ್‌ ನೀಡಿದ್ದಾರೆ. ಸುದೀಪ್‌ಗಾಗಿಯೇ ವಿಶೇಷ ಬೈಕ್‌ ಅನ್ನು ಸಿದ್ಧ ಪಡಿಸಿದ್ದು ಮತ್ತೊಂದು ವಿಶೇಷ.

ಸುದೀಪ್‌ ಮತ್ತು ಶಿವರಾಜಕುಮಾರ್‌ರ ಹೊಸ ಸಾಹಸವೇ ಕಲಿ ಚಿತ್ರ. ಈ ಸಿನಿಮಾದ ಬಗ್ಗೆ ಸಾಕಷ್ಟು ನಿರೀಕ್ಷೆ ಇಟ್ಟುಕೊಳ್ಳಲಾಗಿದೆ. ಅಲ್ಲದೇ ಈ ಚಿತ್ರವನ್ನು ನಾಲ್ಕು ಭಾಷೆಗಳಲ್ಲಿ ನಿರ್ಮಾಣ ಮಾಡುತ್ತಿದ್ದಾರೆ ನಿರ್ಮಾಪಕರು. ಕಲಿ ಚಿತ್ರಕ್ಕೆ ಜೋಗಿ ಪ್ರೇಮ… ಕಥೆ ಬರೆದು ನಿರ್ದೇಶನ ಮಾಡುತ್ತಿದ್ದರೆ, ಹಂಸಲೇಖ ಸೇರಿದಂತೆ ಮೂವರು ಸಂಗೀತ ನಿರ್ದೇಶಕರು ಚಿತ್ರಕ್ಕಾಗಿ ಸಂಗೀತ ನೀಡಲಿದ್ದಾರೆ.

‘ಮಲ್ಟಿಸ್ಟಾರ್‌ ಚಿತ್ರಗಳು ಬಂದರೆ ಸಿನಿಮಾ ರಂಗಕ್ಕೆ ಒಳ್ಳೆಯದು. ಈ ಕಾರಣದಿಂದಾಗಿ ಬೇರೆ ನಟರ ಜತೆ ನಟಿಸುವುದಕ್ಕೆ ಒಪ್ಪಿಕೊಂಡಿದ್ದೇನೆ. ಇಬ್ಬರ ಅಭಿಮಾನಿಗಳಿಗೂ ಇಷ್ಟವಾಗುವ ಕತೆ ಸಿಗಬೇಕು’ ಅಂದಿದ್ದಾರೆ ಸುದೀಪ್‌.