ಮದುವೆಯ ಮಮತೆಯ ಕರೆಯೋಲೆ ನಾಯಕ ಸೂರಜ್‌ ಹೊಸ ಸಿನಿಮಾ

ಮದುವೆಯ ಮಮತೆಯ ಕರೆಯೋಲೆ ಸಿನಿಮಾದ ನಾಯಕ ಸೂರಜ್‌, ಈಗ ಮತ್ತೊಂದು ಸಿನಿಮಾದಲ್ಲಿ ನಟಿಸಿದ್ದಾರೆ. ಸ್ನೇಹವೇ ಪ್ರೀತಿ ಚಿತ್ರದಲ್ಲಿ ಅವರು ನಾಯಕನಾಗಿ ಕಾಣಿಸಿಕೊಂಡಿದ್ದಾರೆ. ಗೆಳೆತನ ಮತ್ತು ಪ್ರೀತಿಯ ಕುರಿತಾದ ಸಿನಿಮಾ ಇದಾಗಿದೆ. 'ಗೆಳೆತನ ಮತ್ತು ಪ್ರೀತಿ ಎರಡರಲ್ಲೂ ಯಾವುದು ಮುಖ್ಯ ಅನ್ನುವುದಕ್ಕೆ ಇಂದಿಗೂ ಉತ್ತರ ಸಿಕ್ಕಿಲ್ಲ. ಯಾವುದಕ್ಕೆ ಮಹತ್ವ ಕೊಡಬೇಕು ಎಂದು ಕೇಳಿದರೆ ಸಡನ್ನಾಗಿ ಉತ್ತರಿಸುವುದಕ್ಕೆ ಆಗುವುದಿಲ್ಲ. ಸಿನಿಮಾದಲ್ಲೂ ಅದೇ ರೀತಿಯ ಕಥೆಯಿದೆ. ಹೀರೋ ಯಾವುದಕ್ಕೆ ಮಹತ್ವ ನೀಡುತ್ತಾನೆ ಎನ್ನುವುದೇ ಚಿತ್ರ' ಅಂತಾರೆ ಸೂರಜ್‌.

ಅಂದಹಾಗೆ ಈ ಸಿನಿಮಾವನ್ನು ಜಿಎಲ್‌ಬಿ ಶ್ರೀನಿವಾಸ್‌ ನಿರ್ದೇಶನ ಮಾಡಿದ್ದಾರೆ. ಎರಡು ಭಾಷೆಯಲ್ಲಿ ಈ ಚಿತ್ರ ನಿರ್ಮಾಣ ಆಗಿರುವುದು ವಿಶೇಷ. ಸೋನಿಯಾ ನಾಯಕಿಯಾಗಿ ನಟಿಸಿದ್ದು, ಈ ಚಿತ್ರದ ಮೂಲಕ ಇವರು ಸಿನಿಮಾ ರಂಗಕ್ಕೆ ಪ್ರವೇಶ ಮಾಡಿದ್ದಾರೆ. ಸಾಧು ಕೋಕಿಲಾ, ರಮೇಶ್‌ ಭಟ್‌ ಸೇರಿದಂತೆ ಹಲವು ಕಲಾವಿದರು ತಾರಾ ಬಳಗದಲ್ಲಿ ಇದ್ದಾರೆ.