ಈಗ ಎಲ್ಲೆಲ್ಲೂ ಶಿವರಾಜ್‌ ಕುಮಾರ್‌ ಅಭಿನಯದ ಟಗರು ಚಿತ್ರದ ಟೈಟಲ್ ಸಾಂಗ್‌ದೇ ಹವಾ. ಶಿವಣ್ಣ ಅಭಿಮಾನಿಗಳನ್ನು ಮಾತ್ರ ಅಲ್ಲ ಎಲ್ಲರನ್ನೂ ತನ್ನತ್ತ ಸೆಳೆಯುತ್ತಿರುವ 'ಟಗರು ಬಂತು ಟಗರು' ಹಾಡು ಕೇಳುಗರಿಗೆ ಹೊಸ ಫೀಲ್‌ ಕೊಡುತ್ತಿದೆ. ಇದಕ್ಕೆ ಕಾರಣ ತಮಿಳಿನ ಜನಪದ ಗಾಯಕ ಆಂತೋಣಿ ದಾಸನ್‌ ಅವರ ಧ್ವನಿ. ಮೊದಲ ಬಾರಿಗೆ ಕನ್ನಡ ಹಾಡೊಂದನ್ನು ಹಾಡಿರುವ ಆಂತೋಣಿಗೆ ಎಲ್ಲರೂ ತಲೆಬಾಗಿದ್ದಾರೆ. ಸ್ಯಾಂಡಲ್‌ವುಡ್‌ ಮಂದಿ ಈ ಹಾಡನ್ನು ತೆರೆಯ ಮೇಲೆ ನೋಡಲು ಕಾದಿದ್ದಾರೆ.
ನಿರ್ದೇಶಕ ಅನೂಪ್‌ ಭಂಡಾರಿ ಹಾಡನ್ನು ಮೆಚ್ಚಿಕೊಂಡು ಟ್ವೀಟ್‌ ಮಾಡಿದ್ದಾರೆ. 'ಈ ಹಾಡು ಎಲ್ಲರ ರಿಂಗ್‌ ಟೋನ್‌ ಆದರೆ ಆಶ್ಚರ್ಯವೇ ಇಲ್ಲ. ಗ್ರೇಟ್‌ ವರ್ಕ್‌. ಈ ಮ್ಯೂಸಿಕ್‌ಗೆ ಶಿವಣ್ಣ ಎಂಟ್ರಿ ಹೇಗಿರುತ್ತೆ ಅಂತ ಕಲ್ಪಿಸಿಕೊಳ್ಳೋಕೆ ಪ್ರಯತ್ನಿಸುತ್ತಿದ್ದೇನೆ. ಮೈ ರೋಮಾಂಚನಗೊಳ್ಳೋದು ಖಂಡಿತ' ಎಂದು ಟ್ವೀಟ್‌ ಮಾಡಿದ್ದಾರೆ.
ಈ ಹಾಡಿಗೆ ಆನ್‌ಲೈನ್‌ನಲ್ಲಿ 36 ಲಕ್ಷ ಹಿಟ್‌ ಸಿಕ್ಕಿದೆ. ವಿಡಿಯೋ ಸಾಂಗ್‌ ಇನ್ನೂ ರಿಲೀಸ್‌ ಮಾಡಿಲ್ಲ. 'ಕೇವಲ ಹಾಡನ್ನು ಕೇಳಿಯೇ ಇಷ್ಟೊಂದು ಹಿಟ್‌ ಸಿಕ್ಕಿರೋದು ಬಹಳ ಖುಷಿ ಕೊಟ್ಟಿದೆ. ನಿಜವಾಗಿ ಹೇಳಬೇಕೆಂದರೆ ಟಗರು ಸಿನಿಮಾ ಬಗ್ಗೆ ನನಗೆ ಹೆಚ್ಚೇನೂ ಗೊತ್ತಿಲ್ಲ. ತಮಿಳು, ತೆಲುಗು ಮತ್ತು ಮಲೆಯಾಳ ಭಾಷೆಗಳಲ್ಲಿ ಹಾಡಿದ್ದೇನೆ. ಆದರೆ, ಕನ್ನಡದಲ್ಲಿ ಹಾಡಿರಲಿಲ್ಲ. ಹಾಗಾಗಿ ಬಹಳ ಖುಷಿಯಾಯ್ತು. ಇದು ಶಿವರಾಜ್‌ಕುಮಾರ್‌ ಸಿನಿಮಾ ಅಂತ ಗೊತ್ತಾದಾಗ ನನಗೆ ಕಮಲಹಾಸನ್‌ ಮತ್ತು ರಜನಿಕಾಂತ್‌ ಸಿನಿಮಾ ಸಿಕ್ಕಷ್ಟೇ ಖುಷಿಯಾಯ್ತು' ಎಂದಿದ್ದಾರೆ ಗಾಯಕ ಅಂತೋಣಿ ದಾಸನ್‌.
ಈ ಹಾಡಿನ ಧ್ವನಿ ಮುದ್ರಣ ಸಮಯದಲ್ಲಿ ಶಿವರಾಜ್‌ಕುಮಾರ್‌, ಧನಂಜಯ್‌, ಸೂರಿ ಸ್ಟುಡಿಯೋದಲ್ಲಿ ಉಪಸ್ಥಿತರಿದ್ದರು. ಅಂತೋಣಿ ಹಾಡುತ್ತಿರುವಾಗ ಇವರೆಲ್ಲರೂ ಸಿಕ್ಕಾಪಟ್ಟೆ ಎಂಜಾಯ್‌ ಮಾಡಿದ್ದಾರೆ. ವಿಷಲ್‌ ಹಾಕಿದ್ದಾರೆ. 'ಶಿವಣ್ಣ ಎಷ್ಟು ಖುಷಿ ಪಟ್ಟರು ಎಂದರೆ, ಹಾಡು ಮುಗಿದ ನಂತರ ನನಗೆ ವಿಸಿಟಿಂಗ್‌ ಕಾರ್ಡ್‌ ಕೊಟ್ಟು ಮನೆಗೆ ಊಟಕ್ಕೆ ಆಹ್ವಾನಿಸಿದರು. ಎಷ್ಟೊಂದು ವಿನಯ ಅವರದು' ಎಂದು ಅಂತೋಣಿ ಶಿವಣ್ಣನನ್ನು ಹೊಗಳಿದ್ದಾರೆ.