ಬಾಹುಬಲಿ ಚಿತ್ರದ ಅವಂತಿಕಾ ಫೇಮ್‌ ತಮನ್ನಾ ಭಾಟಿಯಾ ಮತ್ತೆ ಟಾಲಿವುಡ್‌ನಲ್ಲಿ ಗ್ಲಾಮರ್‌ನಿಂದ ಬಿರುಗಾಳಿ ಎಬ್ಬಿಸುತ್ತಿದ್ದಾರೆ. ಜ್ಯೂನಿಯರ್‌ ಎನ್‌ಟಿಆರ್‌ ಅಭಿನಯದ ಜೈ ಲವಕುಶ ಚಿತ್ರದಲ್ಲಿ ಸ್ಪೆಶಲ್‌ ಸಾಂಗ್‌ವೊಂದರಲ್ಲಿ ಕಾಣಿಸಿಕೊಂಡಿರುವ ಅವರು, ತಮ್ಮ ವನಪು ವಯ್ಯಾರಗಳಿಂದ ಪಡ್ಡೆಗಳಲ್ಲಿ ಕಿಚ್ಚೆಬ್ಬಿಸಿದ್ದಾರೆ. 'ಸ್ವಿಂಗ್‌ ಝರಾ, ಸ್ವಿಂಗ್‌ ಝರಾ' ಹಾಡಿಗೆ ಮಾದಕವಾಗಿ ಹೆಜ್ಜೆ ಹಾಕಿರುವ ತಮನ್ನಾ ಫಸ್ಟ್‌ಲುಕ್‌ ನೆಟ್‌ಲೋಕದಲ್ಲಿ ಹವಾ ಎಬ್ಬಿಸಿದೆ. ಈ ವಿಡಿಯೋ ಸಾಂಗ್‌ ಅನ್ನು ಈಗಾಗಲೇ ಒಂದು ಮಿಲಿಯನ್‌ಗೂ ಹ್ಚೆಚು ಜನ ನೋಡಿದ್ದಾರೆ.
ಸಾಮಾಜಿಕ ಜಾಲ ತಾಣಗಳಲ್ಲಿ ಈ ಹಾಡಿನ ಸ್ಟಿಲ್‌ಗಳು ಸಿಕ್ಕಾಪಟ್ಟೆ ಹವಾ ಎಬ್ಬಿಸಿವೆ. ಸ್ವತಃ ತಮನ್ನಾ ಕೂಡಾ ಈ ಚಿತ್ರಗಳನ್ನು ತಮ್ಮ ಟ್ವಿಟರ್‌ನಲ್ಲಿ ಶೇರ್‌ ಮಾಡಿದ್ದು, ಸಿಕ್ಕಾಪಟ್ಟೆ ಕಾಮೆಂಟ್‌ಗಳು ಬಂದಿವೆ. ಜೈ ಲವಕುಶ ಚಿತ್ರದಲ್ಲಿ ಇದೊಂದು ಅದ್ಭುತ ಹಾಡು ಎಂದು ಎನ್‌ಟಿಆರ್‌ ಹೇಳಿದ್ದರೆ, ಈ ಹಾಡು ಟ್ಯೂನ್‌ ಮಾಡಿದಾಗಲೇ ನಾನು ತುಂಬಾ ಎಕ್ಸೈಟ್‌ ಆಗಿದ್ದೆ. ಇಂಥ ಹಾಡಿಗೆ ತಮನ್ನಾ ಕುಣಿದಿರುವುದು ಮತ್ತಷ್ಟು ಖುಷಿ ಉಂಟು ಮಾಡಿದೆ ಎಂದು ಸಂಗೀತ ನಿರ್ದೇಶಕ ದೇವಿಶ್ರೀ ಪ್ರಸಾದ್‌ ತಿಳಿಸಿದ್ದಾರೆ.