ಮತ್ತೆ 'ಲಕ್ಷ್ಮಿ ಬಾಂಬ್' ಹಾಕಲು ಸಜ್ಜಾದ ತಮಿಳು ನಿರ್ದೇಶಕ ಲಾರೆನ್ಸ್!

ತಮಿಳಿನ ಸೂಪರ್ ಹಿಟ್ 'ಕಾಂಚನ'ದ ಬಾಲಿವುಡ್ ರಿಮೇಕ್ 'ಲಕ್ಷ್ಮಿ ಬಾಂಬ್'ನ ನಿರ್ದೇಶನದಿಂದ ಹಿಂದೆ ಸರಿದಿದ್ದ ದಕ್ಷಿಣದ ನಟ, ನಿರ್ದೇಶಕ ರಾಘವ ಲಾರೆನ್ಸ್ ಮತ್ತೆ ಚಿತ್ರತಂಡಕ್ಕೆ ವಾಪಾಸಾಗಿದ್ದಾರೆ. ಚಿತ್ರದ ನಾಯಕನಟ ಅಕ್ಷಯ್ ಕುಮಾರ್ ಅವರ ಸಮಯಪ್ರಜ್ಞೆ ಹಾಗೂ ಸಂಧಾನದ ಕಾರಣದಿಂದಾಗಿ ನಿರ್ಮಾಪಕರೊಂದಿಗೆ ನಿರ್ದೇಶಕ ಲಾರೆನ್ಸ್ ಗೆ ಉಂಟಾಗಿದ್ದ ಭಿನ್ನಾಭಿಪ್ರಾಯ ಶಮನಗೊಂಡಿದೆ. ಈ ಮೂಲಕ ಲಾರೆನ್ಸ್ ಚಿತ್ರದ ನಿರ್ದೇಶನವನ್ನು ಸದ್ಯದಲ್ಲೇ ಮುಂದುವರೆಸಲಿದ್ದಾರೆ.

''ಹೌದು, ನಿರ್ದೇಶಕನಾಗಿ ಲಕ್ಷ್ಮಿ ಬಾಂಬ್ ಚಿತ್ರಕ್ಕೆ ವಾಪಾಸಾಗಿದ್ದೇನೆ. ನನ್ನ ಮನಸ್ಸಿನಲ್ಲಿ ಮೂಡಿದ್ದ ಎಲ್ಲಾ ಸಮಸ್ಯೆಗಳು ಈಗ ಪರಿಹಾರವಾಗಿದೆ. ಇದಕ್ಕಾಗಿ ಅಕ್ಷಯ್ ಕುಮಾರ್ ಸಾರ್ ಹಾಗೂ ನಿರ್ಮಾಪಕಿ ಶಾಬಿನಾ ಖಾನ್ ಅವರಿಗೆ ಕೃತಜ್ಞತೆ ಅರ್ಪಿಸುತ್ತಿದ್ದೇನೆ. ಅಕ್ಷಯ್ ಅವರ ಜೊತೆಗೆ ಈ ಚಿತ್ರದಲ್ಲಿ ಭಾಗಿಯಾಗಲು ನನಗೆ ತುಂಬಾ ಸಂತಸವಾಗುತ್ತಿದೆ'' ಎಂದು ಲಾರೆನ್ಸ್ ತಮ್ಮ ಸೋಷಿಯಲ್ ಮೀಡಿಯಾ ಪೇಜ್‌ನಲ್ಲಿ ಪೋಸ್ಟ್ ಮಾಡಿದ್ದಾರೆ.

ನಿರ್ದೇಶಕ ರಾಘವ ಲಾರೆನ್ಸ್ 'ಲಕ್ಷ್ಮಿಬಾಂಬ್' ಚಿತ್ರದಿಂದ ಹೊರಬಿದ್ದಿದ್ದು, ಕೆಲವು ದಿನಗಳ ಹಿಂದೆ ಬಾಲಿವುಡ್‌ನಲ್ಲಿ ಭಾರೀ ಸುದ್ದಿಯಾಗಿತ್ತು. ಚಿತ್ರದ ಫಸ್ಟ್‌ಲುಕ್ ಪೋಸ್ಟರ್‌ನ ಬಿಡುಗಡೆ ವಿಚಾರದಲ್ಲಿ ನಿರ್ದೇಶಕನಾದ ತನ್ನನ್ನು ನಿರ್ಲಕ್ಷಿಸಲಾಗಿತ್ತು ಎಂಬ ಕಾರಣದಿಂದ ನೊಂದು ಅವರು ಈ ಚಿತ್ರದಿಂದ ಹೊರಬಂದಿದ್ದರು ಎನ್ನಲಾಗಿದೆ. ಆದರೆ ತಾನು ಹಿಂದೆ ಸರಿದಿರುವುದರ ಹಿಂದೆ ಇರುವ ಎಲ್ಲಾ ಕಾರಣಗಳನ್ನು ಈಗ ಹೇಳಲು ಸಾಧ್ಯವಿಲ್ಲವೆಂದೂ ಅವರು ತಿಳಿಸಿದ್ದರು. ಲಕ್ಷ್ಮಿಬಾಂಬ್‌ನಲ್ಲಿ ಅಕ್ಷಯ್ ಕುಮಾರ್ ನಾಯಕನಾಗಿದ್ದು, ನವನಟಿ ಕಿಯಾರಾ ಅಡ್ವಾಣಿ ಚಿತ್ರದ ಹಿರೋಯಿನ್ ಆಗಿದ್ದಾರೆ.

ರಾಘವ ಲಾರೆನ್ಸ್ ನಿರ್ದೇಶನದ ತಮಿಳು ಹಾರರ್ ಕಾಮಿಡಿ ಕಾಂಚನ '2011'ರಲ್ಲಿ ತೆರೆಕಂಡಿತ್ತು. ಶರತ್ ಕುಮಾರ್ ಹಾಗೂ ಲಕ್ಷ್ಮಿರಾಯ್ ಜೊತೆಗೆ ಲಾರೆನ್ಸ್ ಪ್ರಮುಖ ಪಾತ್ರದಲ್ಲಿ ಕಾಣಿಸಿಕೊಂಡಿದ್ದರು. ಇದೀಗ ಈ ಚಿತ್ರವು ಅಕ್ಷಯ್ ಕುಮಾರ್ ನಾಯಕತ್ವದಲ್ಲಿ ರೀಮೇಕ್ ಮೂಲಕ ಬಾಲಿವುಡ್‌ನಲ್ಲಿ ಮೂಡಿ ಬರುತ್ತಿದೆ.