ತಮಿಳಿನ ಮತ್ತೊಂದು ಸ್ಟಾರ್ ಜೊತೆ ಕನ್ನಡದ ರಶ್ಮಿಕಾ ಮಂದಣ್ಣ!

ಸ್ಯಾಂಡಲ್‌ವುಡ್ ಮೂಲಕ ಚಿತ್ರರಂಗಕ್ಕೆ ಕಾಲಿಟ್ಟ ನಟಿ ರಶ್ಮಿಕಾ ಮಂದಣ್ಣ, ಇದೀಗ ತಮಿಳಿನಲ್ಲಿ ಎರಡನೇ ಚಿತ್ರಕ್ಕೆ ನಾಯಕಿಯಾಗುವ ಮೂಲಕ ತಮಿಳು ಸಿನಿಮಾ ಯಾನವನ್ನು ಯಶಸ್ವಿಯಾಗಿ ಮುಂದುವರಿಸಿದ್ದಾರೆ ನಟಿ ರಶ್ಮಿಕಾ. ಈ ಮೊದಲು ನಟ ಕಾರ್ತಿ ಜೊತೆ ಮೊದಲ ಸಿನಿಮಾಗೆ ಸಹಿ ಮಾಡಿರುವ ರಶ್ಮಿಕಾ ಅವರು ಈಗ ಎರಡನೇ ಸಿನಿಮಾ ಅಗಿ ನಟ ಶಿವ ಕಾರ್ತಿಕೇಯನ್ ಚಿತ್ರವನ್ನು ಒಪ್ಪಿಕೊಂಡಿದ್ದಾರೆ ಎನ್ನಲಾಗಿದೆ.

ಕನ್ನಡದಲ್ಲಿ 'ಕಿರಿಕ್ ಪಾರ್ಟಿ' ಚಿತ್ರದ ಮೂಲಕ ಪ್ರವೇಶ ಪಡೆದ ನಟಿ ನಂತರ ಟಾಲಿವುಡ್‌ಗೆ ಪ್ರಯಾಣ ಬೆಳೆಸಿ ಅಲ್ಲಿ ಯಸಸ್ವಿಯಾದರು. ವಿಜಯ್ ದೇವರಕೊಂಡ ಜೊತೆ ನಟಿಸಿದ 'ಗೀತ ಗೋವಿಂದಂ' ಸೂಪರ್ ಹಿಟ್ ಆಗಿದ್ದಷ್ಟೇ ಅಲ್ಲ, ನಟಿ ರಶ್ಮಿಕಾ ಅವರು ತೆಲುಗು ಚಿತ್ರರಂಗದಲ್ಲಿ ಮನೆಮಾತಾದರು. ಸದ್ಯಕ್ಕೆ ಅವರು ವಿಜಯ್ ದೇವರಕೊಂಡ ಜೊತೆ 'ಡಿಯರ್ ಕಾಮ್ರೆಡ್' ಹೆಸರಿನ ಇನ್ನೊಂದು ಚಿತ್ರವನ್ನು ತೆಲುಗಿನಲ್ಲಿ ಮುಗಿಸಿ ಇದೀಗ ತಮಿಳಿನತ್ತ ಪ್ರಯಾಣ ಬೆಳೆಸಿದ್ದಾರೆ. ಕನ್ನಡದಲ್ಲಿ ದರ್ಶನ್ ಜೊತೆ 'ಯಜಮಾನ' ಚಿತ್ರದಲ್ಲಿ ನಟಿಸಿರುವ ರಶ್ಮಿಕಾ, ಇದೀಗ ಧ್ರುವ ಸರ್ಜಾ ಜೊತೆ 'ಪೊಗರು' ಚಿತ್ರದಲ್ಲಿ ನಟಿಸಿದ್ದಾರೆ.

ಇತ್ತೀಚೆಗೆ, ತಮಿಳು ಯಶಸ್ವಿ ನಟ ಶಿವಕಾರ್ತಿಕೇಯನ್ ನಾಯಕನಾಗಿ ನಟಿಸಲಿರುವ 'ಎಸ್‌ಕೆ17' ಸಿನಿಮಾದಲ್ಲಿ ನಾಯಕಿಯಾಗಿ ಅಭಿನಯಿಸಲು ಆಫರ್ ರಶ್ಮಿಕಾಗೆ ಆಫರ್ ನೀಡಲಾಗಿದೆ. ವಿಘ್ನೇಶ್‌ ಶಿವನ್‌ ನಿರ್ದೇಶನದಲ್ಲಿ ಲೈಕಾ ಪ್ರೊಡಕ್ಷನ್ಸ್‌ ಬ್ಯಾನರ್‌ನಲ್ಲಿ ಈ ಚಿತ್ರವು ನಿರ್ಮಾಣವಾಗುತ್ತಿದೆ. ಅನಿರುಧ್ ರವಿಚಂದರ್ ಸಂಗೀತ ನೀಡುತ್ತಿರುವ ಈ ಚಿತ್ರವು ಮುಂದಿನ ವರ್ಷ ಜುಲೈನಲ್ಲಿ ಬಿಡುಗಡೆಯಾಗಲಿದೆ ಎನ್ನಲಾಗಿದೆ.

ಒಟ್ಟಿನಲ್ಲಿ, ಕನ್ನಡ ಮೂಲದ ನಟಿ ರಶ್ಮಿಕಾರ ಹವಾ ಇಡೀ ಸೌತ್ ಇಂಡಿಯಾ ತುಂಬ ವ್ಯಾಪಿಸಿದೆ. ಕನ್ನಡ, ತೆಲುಗು ಹಾಗೂ ತಮಿಳು ಸಿನಿಮಾಗಳಲ್ಲಿ ಮಿಂಚುತ್ತಿರುವ ನಟಿ ರಶ್ಮಿಕಾ ಅವರು ಮಲೆಯಾಳಂ ಸಿನಿಮಾದಲ್ಲೂ ನಟಿಸಿದರೆ ಸೌತ್ ಇಂಡಿಯಾದ ಎಲ್ಲ ಭಾಷೆಗಳಲ್ಲಿ ನಟಿಸಿದಂತೆ. ಇನ್ನು ಬಾಲಿವುಡ್‌ ಸಿನಿಮಾದಲ್ಲೇನಾದರೂ ನಟಿಸಿದರೆ, ಇಂಡಿಯಾ ತುಂಬ ಫೇಮಸ್ ಆಗುವ ಮೂಲಕ 'ನ್ಯಾಷನಲ್ ನಟಿ' ಎಂಬ ಪಟ್ಟವನ್ನು ರಶ್ಮಿಕಾ ಗಳಿಸಿದರೂ ಅಚ್ಚರಿಯಲ್ಲ ಎನ್ನಬಹುದು.