ಯಾವ ಸಿನಿಮಾ ಸ್ಟಾರ್‌ಗೂ ಕಮ್ಮಿಯಿಲ್ಲ ಸಿಎಂ ಸಿದ್ದು!

ಮುಖ್ಯಮಂತ್ರಿ ಸಿದ್ದರಾಮಯ್ಯ ದಿನದ ರಾಜಕೀಯ ಚಟುವಟಿಕೆಗಳಿಂದ ಸ್ವಲ್ಪ ಬ್ರೇಕ್‌ ತೆಗೆದುಕೊಂಡು ಗ್ಲಾಮರ್‌ ಲೋಕದಲ್ಲಿ ಒಂದು ರೌಂಡ್‌ ಹಾಕಲಿದ್ದಾರೆ. ಯಾವುದೇ ಸಿನಿಮಾ ಸ್ಟಾರ್‌ಗೂ ಕಮ್ಮಿ ಇಲ್ಲದಂತೆ ಗುರುವಾರ ಒಂದರ ನಂತರ ಮತ್ತೊಂದರ ಶೂಟಿಂಗ್‌ನಲ್ಲಿ ಸಿದ್ದು ಪಾಲ್ಗೊಳ್ಳಲಿದ್ದಾರೆ.

ಮೊದಲು ಕವಿತಾ ಲಂಕೇಶ್‌ ನಿರ್ದೇಶನದಲ್ಲಿ ಮೂಡಿಬರುತ್ತಿರುವ 'ಸಮ್ಮರ್‌ ಹಾಲಿಡೇಸ್‌' ಚಿತ್ರದ ಚಿತ್ರೀಕರಣದಲ್ಲಿ ಭಾಗವಹಿಸಲಿದ್ದಾರೆ. ಈ ಚಿತ್ರದಲ್ಲಿ ಸಿದ್ದರಾಮಯ್ಯ ಅವರು ಮುಖ್ಯಮಂತ್ರಿ ಪಾತ್ರವನ್ನೇ ನಿಭಾಯಿಸುತ್ತಿರುವುದು ಮತ್ತೊಂದು ವಿಶೇಷ.

ಇದಾದ ನಂತರ ರಮೇಶ್‌ ಅರವಿಂದ್‌ ನಡೆಸಿಕೊಡುವ 'ವೀಕೆಂಡ್‌ ವಿತ್‌ ರಮೇಶ್‌' ಕಾರ್ಯಕ್ರಮದ ಎಪಿಸೋಡ್‌ ಶೂಟಿಂಗ್‌ನಲ್ಲಿ ಸಿಎಂ ಪಾಲ್ಗೊಳ್ಳಲಿದ್ದಾರೆ. ಸಾಧಕರ ಖುರ್ಚಿಯನ್ನು ಅಲಂಕರಿಸುತ್ತಿರುವ ಸಿಎಂ ಸಿದ್ದು, ಸತತ 4 ಗಂಟೆಗಳ ಕಾಲ ಎಪಿಸೋಡ್‌ನ ಚಿತ್ರೀಕರಣದಲ್ಲಿ ಪಾಲ್ಗೊಳ್ಳಲಿದ್ದಾರೆ ಎಂಬ ಮಾಹಿತಿ ಸಿಕ್ಕಿದೆ.

ಅದೇ ರೀತಿ ಸಂಜೆ 7.30ರ ಹೊತ್ತಿಗೆ 'ಪಂಟ' ಚಿತ್ರದ ಪ್ರೀಮಿಯರ್‌ ಶೋ ವೀಕ್ಷಿಸಲಿದ್ದಾರೆ ನಮ್ಮ ಸಿಎಂ. ಪರಿಷತ್‌ ಸದಸ್ಯ ಎಚ್‌.ಎಂ ರೇವಣ್ಣ ಅವರ ಪುತ್ರ ಅನೂಪ್‌ 'ಪಂಟ' ಚಿತ್ರದಲ್ಲಿ ನಾಯಕನಾಗಿ ಅಭಿನಯಿಸಿದ್ದಾರೆ. ಮಲ್ಲೇಶ್ವರದಲ್ಲಿರುವ ರೇಣುಕಾಂಬ ಚಿತ್ರಮಂದಿರದಲ್ಲಿ ಈ ಚಿತ್ರದ ಪ್ರೀಮಿಯರ್‌ ಶೋ ಆಯೋಜಿಸಲಾಗಿದೆ.