ನಟಿ ಜತೆ ರಾಕುಲ್​ ಲಿಪ್ ಲಾಕ್: ಅಭಿಮಾನಿಗಳಿಂದ ಭಾರೀ ಟೀಕೆ?

ಬಾಲಿವುಡ್‌ನಲ್ಲಿ ಲಿಪ್ ಲಾಕ್ ಕಾಮನ್ ಎನ್ನಬಹುದೇನೋ! ಆದರೆ ದಕ್ಷಿಣ ಭಾರತದ ನಟನಟಿಯರು ತೆರೆಮೇಲೆ ಲಿಪ್ ಲಾಕ್ ಮಾಡಿದರೆ ಅದು ಭಾರೀ ದೊಡ್ಡ ಸುದ್ದಿಯೇ ಆಗಿಬಿಡುತ್ತದೆ. ಇದೀಗ ಟಾಲಿವುಡ್‌ ಸಿನಿಮಾ ಮೂಲಕ ಆಗಿರುವುದೂ ಅದೇ. ನಟಿ ರಾಕುಲ್ ಪ್ರೀತ್ ಸಿಂಗ್ ಸಹ ಅದೇ ವಿಚಾರಕ್ಕೆ ಸುದ್ದಿಯಲ್ಲಿದ್ದಾರೆ. ಅಚ್ಚರಿ ಎಂದರೆ ರಾಕುಲ್ ಪ್ರೀತ್ ಸಿಂಗ್ ಚುಂಬಿಸಿದ್ದು ಪುರುಷ ಅಲ್ಲ, ಮಹಿಳೆಯನ್ನು! ನಿನ್ನೆ (ಆಗಸ್ಟ್ 9, 2019) ರಂದು ಬಿಡುಗಡೆಯಾದ 'ಮನ್ಮಥುಡು 2' ಸಿನಿಮಾವೊಂದರ ದೃಶ್ಯದಲ್ಲಿ ನಟಿ ರಾಕುಲ್ ಪ್ರೀತ್ ಸಿಂಗ್ ತಮ್ಮ ಸಹನಟಿಯನ್ನು ಚುಂಬಿಸಿದ್ದಾರೆ.

ನಾಗಾರ್ಜುನ ಅಕ್ಕಿನೇನಿ ನಾಯಕತ್ವದ 'ಮನ್ಮಥುಡು 2' ಸಿನಿಮಾದಲ್ಲಿ ರಾಕುಲ್ ಪ್ರೀತ್ ಸಿಂಗ್ ನಾಯಕಿಯಾಗಿ ನಟಿಸಿದ್ದಾರೆ. ಅವರ ಜತೆಗೆ ಆ್ಯಂಕರ್ ಝಾನ್ಸಿ ಕೂಡ ನಟಿಸಿದ್ದಾರೆ. ರಾಕುಲ-ಝಾನ್ಸಿ ನಡುವೆ ಸಿನಿಮಾವೊಂದರ ಸೀನ್‌ನಲ್ಲಿ 'ಲಿಪ್ ಲಾಕ್' ದೃಶ್ಯವೊಂದಿದೆ. ಝಾನ್ಸಿ ನಿಂತುಕೊಂಡಿರುವಾಗ ರಾಕುಲ್ ಅವರನ್ನು ಎಳೆದು ತುಟಿಗೆ ಚುಂಬಿಸುತ್ತಾರೆ. ಈ ದೃಶ್ಯದ ಫೋಟೋ ಇದೀಗ ಸೋಷಿಯಲ್ ಮೀಡಿಯಾಗಳಲ್ಲಿ ಭಾರೀ ವೈರಲ್ ಆಗಿದೆ.

ಅಂದಹಾಗೆ, ಈ ಚುಂಬನದ ದೃಶ್ಯಕ್ಕೆ ಸೆನ್ಸಾರ್ ಮಂಡಳಿ ವಿರೋಧ ವ್ಯಕ್ತಪಡಿಸಿತ್ತು. ಈ ಕಾರಣಕ್ಕೆ ಈ ಲಿಪ್ ಲಾಕ್ ದೃಶ್ಯಕ್ಕೆ ಭಾರತದಲ್ಲಿ ಸೆನ್ಸಾರ್ ಕಟ್ ಮಾಡಲಾಗಿದೆ. ಆದರೆ ಅಮೆರಿಕದಲ್ಲಿ ಈ ದೃಶ್ಯಕ್ಕೆ ಕತ್ತರಿ ಹಾಕಿಲ್ಲ. ಹೀಗಾಗಿ, ಅಲ್ಲಿನ ಪ್ರೇಕ್ಷಕರು ರಾಕುಲ್-ಝಾನ್ಸಿ ಲಿಪ್ ಕಿಸ್ ಫೋಟೋವನ್ನು ಜಗತ್ತಿಗೆಲ್ಲ ವೈರಲ್ ಮಾಡಿದ್ದಾರೆ. ಈ ಫೋಟೋ ನೋಡಿದ್ದೇ ತಡ, ಸೋಷಿಯಲ್ ಮೀಡಿಯಾಗಳಲ್ಲಿ ಹಲವರು ನಟಿ ರಾಕುಲ್ ಕಾಲೆಳೆದಿದ್ದಾರೆ.

ಸಾಮಾಜಿಕ ಜಾಲತಾಣಗಳಲ್ಲಿ ಹಲವರು "ರಾಕುಲ್.. ನಾನು ನಿಮ್ಮ ದೊಡ್ಡ ಅಭಿಮಾನಿ ಆಗಿದ್ದೆ. ಆದರೆ ನೀವು 'ಲೆಸ್ಬಿಯನ್' ಎಂದು ನನಗೆ ಗೊತ್ತಿರಲಿಲ್ಲ.." ಎಂದು ಟೀಕಿಸಿದ್ದಾರೆ. ಇನ್ನೂ ಕೆಲವರು ಚಿತ್ರದ ನಿರ್ದೇಶಕರ ವಿರುದ್ಧ ಟೀಕೆ ಮಾಡಿದ್ದಾರೆ. ಒಟ್ಟಿನಲ್ಲಿ, 'ಮನ್ಮಥುಡು 2' ಚಿತ್ರವು ರಿಲೀಸ್‌ಗಿಂತ ಮೊದಲೂ ಸಹ ಸಾಕಷ್ಟು ಸದ್ದು ಮಾಡಿತ್ತು. ಇದೀಗ ಬಿಡುಗಡೆ ಬಳಿಕವೂ ಸಖತ್ ಸೌಂಡ್ ಮಾಡತೊಡಗಿದೆ. ಆದರೆ, ಚಿತ್ರದ ಓಪನಿಂಗ್ ಅಷ್ಟೇನೂ ಚೆನ್ನಾಗಿಲ್ಲ ಎನ್ನಲಾಗಿದೆ.