ಟ್ರೋಲ್‌ಗಳನ್ನು ಎಂಜಾಯ್ ಮಾಡುತ್ತಿದ್ದೇನೆ: ಸಮಂತಾ ಅಕ್ಕಿನೇನಿ

ಟಾಲಿವುಡ್‌ನಲ್ಲಿ ಸದ್ಯಕ್ಕೆ ಸಾಲು ಸಾಲು ಹಿಟ್‌ಗಳೊಂದಿಗೆ ಮುನ್ನುಗ್ಗುತ್ತಿರುವ ಬೆಡಗಿ ಸಮಂತಾ ಅಕ್ಕಿನೇನಿ. ಆಗಿಂದಾಗ್ಗೆ ಸಾಮಾಜಿಕ ಮಾಧ್ಯಮದಲ್ಲಿ ಅಪ್‍ಡೇಟ್ ಮಾಡುತ್ತಾ ಸಾಕಷ್ಟು ಸಂಗತಿಗಳನ್ನು ಅಭಿಮಾನಿಗಳ ಜತೆಗೆ ಹಂಚಿಕೊಳ್ಳುತ್ತಿರುತ್ತಾರೆ. ಆದರೆ ಸಮಂತಾರನ್ನು ಆರಾಧಿಸುವ ಅಭಿಮಾನಿಗಳ ಜತೆಗೆ ದ್ವೇಷಿಸುವವರ ಸಂಖ್ಯೆಯೂ ಸಾಕಷ್ಟಿದೆ.

ಸಾಮಾಜಿಕ ಮಾಧ್ಯಮದಲ್ಲಿ ಸಮಂತಾ ಹಂಚಿಕೊಳ್ಳುವ ಕೆಲವು ಪೋಸ್ಟ್‌ಗಳಿಗೆ ಬಹಳಷ್ಟು ಕಾಮೆಂಟ್‌ಗಳು ಬರುತ್ತಿರುತ್ತವೆ. ಆದರೂ ಟ್ರೋಲಿಂಗ್ ನನಗೇನು ಹೊಸದಲ್ಲ ಎಂದು ಪಾಸಿಟೀವ್ ಆಗಿ ಹೇಳಿದ್ದಾರೆ ಸಮಂತಾ.

ಈ ಬಗ್ಗೆ ಮಾತನಾಡಿರುವ ಸಮಂತಾ, "ಆರಂಭದಲ್ಲಿ ಟ್ರೋಲಿಂಗ್‍ನಿಂದಾಗಿ ತೊಂದರೆ ಅನುಭವಿಸಿದ್ದೇನೆ. ಅವುಗಳ ಬಗ್ಗೆ ಆಲೋಚಿಸಿದಾಗ ಎಲ್ಲಿ ಹುಚ್ಚಿಯಾಗುತ್ತೇನೋ ಅನ್ನಿಸುತ್ತಿತ್ತು. ಅವುಗಳಿಂದಾಗಿ ಎಲ್ಲಿ ಕೆಟ್ಟ ನಿರ್ಧಾರ ತೆಗೆದುಕೊಳ್ಳುತ್ತೇನೋ ಅಂತ ಭಯವಾಗುತ್ತಿತ್ತು. ಆದರೆ ಈ ಅದರಿಂದ ಹೊರಬಂದಿದ್ದೇನೆ" ಎಂದಿದ್ದಾರೆ.

ಯಾವ ಟ್ರೋಲ್‌ಗಳಿಂದ ನೋವನುಭವಿಸಿದೆನೋ ಈಗ ಅವನ್ನು ನೋಡಿ ನಗುತ್ತಿದ್ದೇನೆ. ಟ್ರೋಲನ್ನೂ ಎಂಜಾಯ್ ಮಾಡುತ್ತಿದ್ದೇನೆ. ನಾನು ಟ್ವೀಟ್ ಮಾಡಿದರೂ, ಫೋಟೋ ಪೋಸ್ಟ್ ಮಾಡಿದರೂ ಬಳಿಕ ಏನೋ ಒಂದು ಟ್ರೋಲ್ ಆಗುತ್ತದೆ ಎಂದು ನನಗೆ ಗೊತ್ತು. ನಾನು ಏನೇ ಮಾಡಿದರೂ ಅದರ ಬಗ್ಗೆ ಟೀಕೆ ಮಾಡಲು ಕೆಲವರು ಸಿದ್ಧವಾಗಿರುತ್ತಾರೆ ಎಂದಿದ್ದಾರೆ ಸಮಂತಾ.

ಸದ್ಯಕ್ಕೆ 'ಓಹ್ ಬೇಬಿ' ಸಿನಿಮಾದಲ್ಲಿ ಸಮಂತಾ ಬಿಝಿಯಾಗಿದ್ದಾರೆ. ಕೊರಿಯನ್ ಸಿನಿಮಾ 'ಮಿಸ್ ಗ್ರಾನಿ' ರೀಮೇಕ್ ಇದು. ಈ ಚಿತ್ರದಲ್ಲಿ ಸಮಂತಾ 70 ವರ್ಷದ ವೃದ್ಧೆಯಿಂದ 20 ವರ್ಷದ ಯುವತಿ ವರೆಗಿನ ಪಾತ್ರಗಳಲ್ಲಿ ಕಾಣಿಸಲಿದ್ದಾರೆ. ಮಹಿಳಾ ಪ್ರಧಾನ ಸಿನಿಮಾ ಆಗಿರುವ ಇದು ಜುಲೈ 5ರಂದು ತೆರೆಗೆ ಅಪ್ಪಳಿಸುತ್ತಿದೆ.