ಕೇವಲ 14 ದಿನಗಳಲ್ಲಿ ಚಿತ್ರೀಕರಣಗೊಂಡ ಸಿನಿಮಾ ರಿಲೀಸ್‌ಗೆ ರೆಡಿ

ಕೋಸ್ಟಲ್‌ವುಡ್‌ನಲ್ಲಿ ದಾಖಲೆಯ ಅವಧಿ ಅಂದರೆ ಕೇವಲ 14ದಿನಗಳಲ್ಲಿ ಚಿತ್ರೀಕರಣಗೊಂಡಿರುವ ಬಹುನಿರೀಕ್ಷೆಯ ಚಿತ್ರ ಬೆಲ್ಚಪ್ಪ ಮೇ ಅಂತ್ಯದೊಳಗೆ ಬಿಡುಗಡೆಯಾಗಲಿದೆ. ಚಿತ್ರತಂಡ ಚಿತ್ರದ ಬಿಡುಗಡೆ ಸಿದ್ಧತೆ ಮಾಡಿಕೊಂಡಿದ್ದು, ಮೇ 17 ಅಥವಾ 24ರಂದು ಚೆಲ್ಚಪ್ಪನನ್ನು ಪ್ರೇಕ್ಷಕರ ಮುಂದೆ ತರಲು ನಿರ್ಧರಿಸಿದೆ.

ಚಿತ್ರದ ವಿಶೇಷ ಅಂದ್ರೆ ಯಾವುದೇ ದೊಡ್ಡ ಬಜೆಟ್‌ನ ಚಿತ್ರಕ್ಕೂ ಕಡಿಮೆ ಗುಣಮಟ್ಟ ಇಲ್ಲದಂತೆ ಶೂಟಿಂಗ್‌ ಮಾಡಿರುವುದು. ಈ ಚಿತ್ರದಲ್ಲಿ ನಾಲ್ಕು ಹಾಡು, ಒಂದು ವಾಟರ್‌ ಫೈಟ್‌ ಹೀಗೆ ಅನೇಕ ಕುತೂಹಲಕಾರಿ ದೃಶ್ಯಗಳಿವೆ ಎಂದು ಸಿನಿಮಾದ ನಿರ್ದೇಶಕ ರಜನೀಶ್‌ ದೇವಾಡಿಗ ಹೇಳಿದ್ದಾರೆ.

ಕೋರಿ ರೊಟ್ಟಿ ಚಿತ್ರದ ನಿರ್ದೇಶನ ಮತ್ತು ನಟನೆ ಮೂಲಕ ಗಮನ ಸೆಳೆದಿರುವ ರಜನೀಶ್‌ ದೇವಾಡಿಗ ಅವರು ಬೆಲ್ಚಪ್ಪ ಸಿನಿಮಾಕ್ಕೆ ಕಥೆ, ಚಿತ್ರಕಥೆ, ಸಂಭಾಷಣೆ ಬರೆದು, ನಿರ್ದೇಶನ ಮಾಡಿ ನಟಿಸಿದ್ದಾರೆ. ಪ್ರಮುಖ ಪಾತ್ರದಲ್ಲಿ ತುಳುನಾಡ ಮಾಣಿಕ್ಯ ಅರವಿಂದ ಬೋಳಾರ್‌ ಕಾಣಿಸಿಕೊಳ್ಳಲಿದ್ದಾರೆ. ನಾಯಕಿಯಾಗಿ ಯಶಸ್ವಿ ದೇವಾಡಿಗ ನಟಿಸಿದ್ದಾರೆ. ಉಳಿದಂತೆ ಉಮೇಶ್‌ ಮಿಜಾರ್‌, ದೀಪಕ್‌ ರೈ, ಸುಕನ್ಯಾ, ಪ್ರವೀಣ್‌ ಮರ್ಕಮೆ, ಯಜ್ಞೇಶ್‌, ಆಶಾ ಮಾರ್ನಾಡ್‌ ಮುಂತಾದವರು ಇದ್ದಾರೆ.