ಯುಟ್ಯೂಬ್‌ನಲ್ಲಿ ಸೌಂಡ್‌ ಮಾಡ್ತಿದೆ ತುಳು ಕಿರುಚಿತ್ರ

ಸಾಮಾಜಿಕ ಜಾಲತಾಣವಾದ ಯುಟ್ಯೂಬ್‌ನಲ್ಲಿ ತುಳು ಕಿರುಚಿತ್ರ 'ಪರೋಕ್ಷ' ಭಾರಿ ಸದ್ದು ಮಾಡುತ್ತಿದೆ. ಬಿಡುಗಡೆಯಾದ ಒಂದೇ ದಿನದಲ್ಲಿ 30,000 ಜನ ಈ ಚಿತ್ರವನ್ನು ವೀಕ್ಷಿಸಿರುವುದು ನಿಜಕ್ಕೂ ಗ್ರೇಟ್‌.

ದಕ್ಷಿಣ ಕನ್ನಡ ಜಿಲ್ಲೆ ಕರ್ನಾಟಕದಲ್ಲಿಯೇ ಶೈಕ್ಷಣಿಕವಾಗಿ ಮುಂದುವರಿದ ಜಿಲ್ಲೆಯಾದರೂ ಕರಾವಳಿ ಜಿಲ್ಲೆಗಳಲ್ಲಿ ಈಗಲೂ ಮೂಢನಂಬಿಕೆ ಅಸ್ತಿತ್ವದಲ್ಲಿದೆ ಎಂದು ಈ ಕಿರುಚಿತ್ರ ತೋರಿಸಿದೆ. 2015ರಲ್ಲಿ ಕುಂದಾಪುರದಲ್ಲಿ ನಡೆದ ಒಂದು ನೈಜ ಘಟನೆಯನ್ನಾಧರಿಸಿ ಗಣೇಶ್‌ ಶೆಟ್ಟಿ ಈ ಕಿರುಚಿತ್ರವನ್ನು ನಿರ್ದೇಶಿಸಿದ್ದಾರೆ.

ಕುಂದಾಪುರದಲ್ಲಿ ವಾಸವಾಗಿದ್ದ ಕುಟುಂಬವೊಂದು ತಮ್ಮ ಮನೆಯಂಗಳದ ತೆಂಗಿನ ಮರದಿಂದ ಮಗುವಿನ ನಗುವ ಶಬ್ದವನ್ನು ಕೇಳಿ ಬೆಚ್ಚಿ ಬಿದ್ದಿರುತ್ತದೆ. ಪ್ರತಿದಿನ ಸಂಜೆ ತೆಂಗಿನ ಮರದಿಂದ ಕೇಳುವ ಮಗುವೊಂದರ ನಗುವಿನ ಸದ್ದು ಆ ಕುಟುಂಬವನ್ನು ಚಿಂತೆಗೀಡು ಮಾಡಿರುತ್ತದೆ. ಯಾವುದೋ ಆತ್ಮ ತಮಗೆ ಈ ತೆರನಾದ ಕಾಟ ನೀಡುತ್ತಿದೆ ಎಂದು ಭಾವಿಸಿದ ಕುಟುಂಬ, ಜ್ಯೋತಿಷಿಯನ್ನು ಭೇಟಿ ಮಾಡಿ ನಾನಾ ರೀತಿಯ ಪರಿಹಾರ ಕಂಡುಕೊಳ್ಳಲು ಪ್ರಯತ್ನಿಸುತ್ತದೆ. ಆದರೆ ಅದ್ಯಾವುದು ಫಲ ನೀಡದಾಗ, ತೆಂಗಿನ ಮರ ಹತ್ತುವ ವ್ಯಕ್ತಿಯೋರ್ವನನ್ನು ಸಂಪರ್ಕಿಸಿ ಪರೀಕ್ಷಿಸಿದಾಗ ಮರೆಗುಳಿಯೊಬ್ಬ ತನ್ನ ಮೊಬೈಲ್‌ನ್ನು ಮರದಲ್ಲಿ ಬಿಟ್ಟು ಹೋಗಿರುವುದು ಗಮನಕ್ಕೆ ಬರುತ್ತದೆ.



ನೈಜ ಘಟನೆಯಲ್ಲಿ ಕೆಲ ಮಾರ್ಪಾಡುಗಳನ್ನು ಮಾಡಿ 'ಪರೋಕ್ಷ' ಚಿತ್ರ ನಿರ್ದೇಶಿಸಿದ್ದಾರೆ ಗಣೇಶ್‌. ನಿರ್ದೇಶಕನಾಗಿ ಅವರ ಮೊದಲ ಕಿರುಚಿತ್ರ 'ಪರೋಕ್ಷ'. ತಮ್ಮ ಪ್ರಥಮ ಪ್ರಯತ್ನದಲ್ಲೇ ಗಣೇಶ್‌ ಗೆದ್ದಿದ್ದಾರೆ ಎಂದು ಹೇಳಲು ಚಿತ್ರಕ್ಕೆ ದೊರೆತ ಹಿಟ್ಸ್‌ಗಳೇ ಸಾಕು. 12 ನಿಮಿಷದ ಈ ಕಿರುಚಿತ್ರದಲ್ಲಿ ಅಮಿತ್‌ ಸಿಯಾಲ್‌ ಮತ್ತು ಪೂಜಾ ಉಪಾಸನಿ ಮುಖ್ಯ ಪಾತ್ರದಲ್ಲಿ ಕಾಣಿಸಿಕೊಂಡಿದ್ದಾರೆ.