ನಟನ ಮನೆಯಲ್ಲಿ ವಿಷಾದ; ಪ್ಲಾಸ್ಟಿಕ್ ಆಟಿಕೆ ನುಂಗಿ ಮಗು ಸಾವು

ಈ ಫೋಟೋದಲ್ಲಿರುವ ಮುದ್ದಾದ ಮಗು ಇನ್ನು ನೆನಪು ಮಾತ್ರ. ಆಟ ಆಡುತ್ತಿದ್ದ ಈ ಮಗು ಆಕಸ್ಮಿಕವಾಗಿ ಪ್ಲಾಸ್ಟಿಕ್ ಆಟಿಕೆಯೊಂದನ್ನು ನುಂಗಿ, ಅದು ಗಂಟಲಲ್ಲಿ ಸಿಕ್ಕಿಕೊಂಡು ಉಸಿರಾಡಲು ಸಾಧ್ಯವಾಗದೆ ಮೇ. 7ರಂದು ರಾತ್ರಿ ದುರಂತ ಸಾವಪ್ಪಿದೆ.

ಎರಡು ವರ್ಷ ವಯಸ್ಸಿನ ಈ ಮಗು ಕಿರುತೆರೆ ನಟ ಪ್ರತೀಷ್ ವೋರಾ ಅವರ ಕೂಸು. ಒಂದೇ ಒಂದು ಸಣ್ಣ ನಿರ್ಲಕ್ಷ್ಯಕ್ಕೆ ಈ ಮಗು ಬಲಿಯಾಗಿದೆ. ಪ್ಲಾಸ್ಟಿಕ್ ಆಟಿಕೆಗಳ ಜತೆ ಆಡುತ್ತಿದ್ದ ಈ ಮಗು ಆಕಸ್ಮಿಕವಾಗಿ ಪ್ಲಾಸ್ಟಿಕ್ ಆಟಿಕೆಯನ್ನು ನುಂಗಿ ಅದು ಗಂಟಲಲ್ಲಿ ಸಿಕ್ಕಿಕೊಂಡು ಉಸಿರಾಡಲು ಆಗದೆ ಮೃತಪಟ್ಟಿದೆ ಎಂದಿವೆ ಮೂಲಗಳು.

ಈ ದುರಂತದಿಂದ ಪ್ರತೀಷ್ ವೋರಾ ಕುಟುಂಬ ದುಃಖದ ಮಡುವಿನಲ್ಲಿ ಮುಳುಗಿದೆ. ಮಗುವಿನ ತಂದೆ ಪ್ರತೀಷ್ ವೋರಾ ಕಿರುತೆರೆ ನಟರಾಗಿದ್ದು ಸದ್ಯಕ್ಕೆ 'ಪ್ಯಾರ್ ಕೆ ಪಾಪಡ್' ಎಂಬ ಟಿವಿ ಶೋನಲ್ಲಿ ಅಭಿನಯಿಸುತ್ತಿದ್ದಾರೆ. ಆಕಸ್ಮಿಕವಾಗಿ ತನ್ನ ಮಗಳು ಮೃತಪಟ್ಟ ಕಾರಣ ತೀವ್ರ ವಿಷಾದಕ್ಕೆ ಗುರಿಯಾಗಿದ್ದಾರೆ.

ಇಂತಹ ದುಃಖದ ಪರಿಸ್ಥಿತಿಯಲ್ಲೂ ತನ್ನ ಮಗಳು ಮೃತಪಟ್ಟಿದ್ದು ಆಕೆಯ ಆತ್ಮಕ್ಕೆ ಶಾಂತಿ ಸಿಗಲಿ ಎಂದು ಪ್ರಾರ್ಥಿಸಿ ಎಂದು ಭಾರವಾದ ಹೃದಯದೊಂದಿಗೆ ಅಭಿಮಾನಿಗಳಲ್ಲಿ ವಿನಂತಿಸಿಕೊಂಡಿದ್ದಾರೆ. ಇನ್ನಾದರೂ ಮಕ್ಕಳ ವಿಚಾರದಲ್ಲಿ ಎಚ್ಚರಿಕೆಯಿಂದಿರಿ. ಪ್ಲಾಸ್ಟಿಕ್ ಆಟಿಕೆಗಳನ್ನು ಕೊಡಿಸುವಾಗ ಸಾಕಷ್ಟು ಎಚ್ಚರಿಕೆ ವಹಿಸಿ.