ತಮಿಳು ಸೂರ್ಯನ ಸುತ್ತ ಸುತ್ತಲು ಸಜ್ಜಾದ ಅಪರ್ಣಾ ಬಾಲಮುರಳಿ

ತಮಿಳು ನಟ ಸೂರ್ಯ ಅವರಿಗೆ ನಾಯಕಿಯಾಗಿ 23 ವರ್ಷದ ಅಪರ್ಣಾ ಬಾಲಮುರಳಿ ಆಯ್ಕೆಯಾಗಿದ್ದಾರೆ. ಅಪರ್ಣಾ ಅವರು ಈಗಾಗಲೇ ಎರಡು ತಮಿಳು ಸಿನಿಮಾಗಳಲ್ಲಿ ಕಾಣಿಸಿಕೊಂಡಿದ್ದು, ಅವರು ತಮಿಳು ಪ್ರೇಕ್ಷಕರಿಗೆ ಪರಿಚಿತರಾಗಿದ್ದಾರೆ. ಈಗ ತಮಿಳು ಸ್ಟಾರ್ ನಟ ಸೂರ್ಯ ಅವರಿಗೆ ಜೋಡಿಯಾಗಿ ಆಯ್ಕೆಯಾಗುವ ಮೂಲಕ ಸ್ಟಾರ್ ಹೀರೋಯಿನ್ ಆಗುವ ಹಾದಿಯಲ್ಲಿ ಸಾಗುತ್ತಿದ್ದಾರೆ.

ಗುರು ಚಿತ್ರದ ಖ್ಯಾತಿಯ ಸುಧಾ ಕೊಂಗಾರಾ ಅವರ ಮುಂಬರುವ ನಿರ್ದೇಶನದ ಚಿತ್ರಕ್ಕೆ ಸೂರ್ಯ ನಾಯಕರು. ಅದು ಏರ್ ಡೆಕ್ಕನ್ ಫೌಂಡರ್ ಜಿಆರ್ ಗೋಪಿನಾಥ್ ಅವರ ಜೀವನ ಚರಿತ್ರೆಯ ಕಥೆಯನ್ನು ಒಳಗೊಂಡಿದೆ. ಈ ಬಯೋಪಿಕ್ ಚಿತ್ರಕ್ಕೆ ನಾಯಕಿಯಾಗಿ ಜಿಎಆರ್ ಗೋಪಿನಾಥ್ ಪತ್ನಿ ಅವರನ್ನು ಹೋಲುವಂಥವರು ಬೇಕು ಎಂದು ನಿರ್ದೇಶಕರು ಹುಡುಕಾಡಿದ್ದಾರಂತೆ. ಆಗ ಕಣ್ಣಿಗೆ ಬಿದ್ದವರೇ ಈ ಅಪರ್ಣಾ. ಅವರು ಜಿಆರ್ ಗೋಪಿನಾಥ್ ಅವರ ಪತ್ನಿಯನ್ನು ಬಹಳಷ್ಟು ಪ್ರಮಾಣದಲ್ಲಿ ಹೋಲುತ್ತಾರಂತೆ.

ಈ ಕಾರಣಕ್ಕೆ ಆ ಚಿತ್ರಕ್ಕೆ ಆಯ್ಕೆಯಾಗಿರುವ ನಟಿ ಅಪರ್ಣಾ ಅವರು ಅತ್ಯಂತ ಸಣ್ಣ ವಯಸ್ಸಿನಲ್ಲೇ ಸ್ಟಾರ್ ನಟರ ಜೊತೆ ನಟಿಸುವ ಅವಕಾಶ ಪಡೆದಿದ್ದಾರೆ. ಅಷ್ಟೇ ಅಲ್ಲ, ತಮಿಳು ಸ್ಟಾರ್ ನಟ ಸೂರ್ಯ ಚಿತ್ರಕ್ಕೆ ಆಯ್ಕೆಯಾಗುವ ಮೂಲಕ ಹಲವರು ಹುಬ್ಬೇರಿಸುವಂತೆ ಮಾಡಿದ್ದಾರೆ. ಪಾತ್ರಕ್ಕೆ ಸೂಕ್ತವಾದ ಕಲಾವಿದರ ಆಯ್ಕೆ ನಿರ್ದೇಶಕರದ್ದು. ಆದರೆ, ಅದೃಷ್ಟ ಎನ್ನುವುದು ಮಾತ್ರ ಕಲಾವಿದೆ ಅಪರ್ಣಾ ಪಾಲಿಗಿತ್ತು ಎನ್ನಬಹುದು.

ಒಟ್ಟಿನಲ್ಲಿ, ಸೂರ್ಯ ಎದುರು ನಾಯಕಿಯಾಗಿ ನಟಿಸುವ ಅವಕಾಶವನ್ನು ಪಡೆದಿರುವ ನಟಿ ಅಪರ್ಣಾ ಬಾಲಮುರಳಿ ಅವರು ಈಗಾಗಲೇ ಕಥೆ ಕೇಳಿದ್ದು, ಕಥೆಗೆ ತಕ್ಕಂತೆ ತಮ್ಮ ಪಾತ್ರದ ಸಿದ್ಧತೆಯಲ್ಲಿ ತೊಡಗಿದ್ದಾರಂತೆ. ನಿರ್ದೇಶಕರಾದ ಸುಧಾ ಅವರು ತಮ್ಮ ಚಿತ್ರಕ್ಕೆ ಸೂಕ್ತವಾದ ನಟಿಯನ್ನು ಆಯ್ಕೆ ಮಾಡಿಕೊಂಡು ಮುಂದಿನ ಸಕಲ ಸಿದ್ಧತೆಯಲ್ಲಿ ತೊಡಗಿಕೊಂಡಿದ್ದಾರೆ.