ಪಂಚತಂತ್ರದಲ್ಲಿ ಹುಡುಗಿಯರ ದರ್ಬಾರ್‌

ಹಾಡುಗಳಿಂದ ಸೋಶಿಯಲ್‌ ಮೀಡಿಯಾದಲ್ಲಿ ಹೆಸರು ಮಾಡಿರುವ ಯೋಗರಾಜ್‌ ಭಟ್ಟರ ಪಂಚತಂತ್ರದಲ್ಲಿ ಅಕ್ಷರಾ ಗೌಡ ಮತ್ತು ಸೋನಲ್‌ ಮಂಥೆರೋ ಎಂಬ ಚೆಲುವೆಯರು ಭರ್ಜರಿ ಮಿಂಚಿದ್ದಾರಂತೆ.

ಪಂಚತಂತ್ರದಲ್ಲಿ ಅಕ್ಷರಗೌಡ ಅರ್ಥ ಎನ್ನುವ ಪಾತ್ರದಲ್ಲಿ ಕಾಣಿಸಿಕೊಂಡಿದ್ದು, ಸಖತ್‌ ಬೋಲ್ಡ್‌ ಆಗಿ ನಟಿಸಿದ್ದಾರೆ. ಇವರು ಪಕ್ಕಾ ಪ್ರಾಕ್ಟಿಕಲ್‌ ಹುಡುಗಿಯಾಗಿ ಕಾಣಿಸಿಕೊಂಡಿದ್ದು ಪ್ರೀತಿ ಪ್ರೇಮ ಸಂಬಂಧಗಳು ಎಂಬ ಎಮೋಷನಲ್‌ ಅಟ್ಯಾಚ್‌ಮೆಂಟ್‌ಗಳು ಇವರಿಗೆ ಇರುವುದಿಲ್ಲ. ಯಾವಾಗಲೂ ನಾಲ್ಕು ಜನ ಹುಡುಗರ ಜತೆ ಕುಳಿತುಕೊಂಡು ಸಮಯ ಕಳೆಯುವ ಇವರು ಈ ಪಾತ್ರದ ಮೂಲಕ ಇಂದಿನ ಸಮಾಜದಲ್ಲಿ ಹುಡುಗಿಯರು ಪಕ್ಕಾ ಖಡಕ್‌ ಆಗಿರಬೇಕು ಎಂಬ ಸಂದೇಶವನ್ನು ನೀಡುತ್ತಾರಂತೆ.

ಇನ್ನು ಸೋನಲ್‌ ಮಂಥೆರೋ ಪಕ್ಕಾ ಸಂಪ್ರದಾಯಿಕ ಹುಡುಗಿಯ ಪಾತ್ರ. ತಂದೆ ತಾಯಿಯ ಪ್ರೀತಿಯ ಮಗಳು. ಪ್ರೀತಿ ಪ್ರೇಮವನ್ನು ಅನುಭವಿಸುವ ಹುಡುಗಿಯ ಕ್ಯಾರೆಕ್ಟರ್‌ನಲ್ಲಿ ನಟಿಸಿದ್ದಾರಂತೆ. ಇವರು ಸಿನಿಮಾದ ಮುಖ್ಯ ಆಕರ್ಷಣೆಗಳಲ್ಲಿ ಒಂದಾಗಿದ್ದು ಈಗಾಗಲೇ ಇವರ ಶೃಂಗಾರದ ಹೊಂಗೆಮರ ಹಾಡು ಸೋಶಿಯಲ್‌ ಮೀಡಿಯಾದಲ್ಲಿ ಸೂಪರ್‌ ಹಿಟ್‌ ಆಗಿದೆ.

ಪಂಚತಂತ್ರದಲ್ಲಿ ಯೋಗರಾಜ್‌ ಭಟ್ಟರು ಈ ಇಬ್ಬರು ಹುಡುಗಿಯರ ಮೂಲಕ ಸಮಾಜದಲ್ಲಿರುವ ಸಿದ್ಧಾಂತವನ್ನು ಹೊಸ ಸ್ಟೈಲ್‌ನಲ್ಲಿ ಹೇಳುತ್ತಾರಂತೆ. ಇದೇ 29ಕ್ಕೆ ಸಿನಿಮಾ ಬಿಡುಗಡೆಯಾಗಲಿದೆ.