ಉಪೇಂದ್ರರಿಗೆ ಲವ್ ಆಗಿದೆ

ಪ್ರೀತಿ ಪ್ರೇಮದ ಬಗ್ಗೆ ತಮ್ಮದೇ ಆದ ಹಲವು ವ್ಯಾಖ್ಯಾನಗಳನ್ನು ಮಾಡಿರುವ ಉಪೇಂದ್ರಗೆ ಮತ್ತೆ ಲವ್‌ ಆಗಿದೆ. ಆ ಲವ್‌ಸ್ಟೋರಿಯನ್ನು ಅವರು ಆರ್‌.ಚಂದ್ರು ನಿರ್ದೇಶನದ ಸಿನಿಮಾದಲ್ಲಿ ಹೇಳಿಕೊಂಡಿದ್ದಾರೆ.

ಉಪೇಂದ್ರ ಲವ್‌ ಕುರಿತಾಗಿ ಈಗಾಗಲೇ ಹಲವು ರೀತಿಯಲ್ಲಿ ಹೇಳಿಕೊಂಡಿದ್ದಾರೆ. ಪ್ರೀತಿ ಪ್ರೇಮಕ್ಕೆ ಅವರು ತಮ್ಮದೇ ಆದ ವ್ಯಾಖ್ಯಾನ ನೀಡಿದ್ದಾರೆ. ಈಗ ಆರ್‌.ಚಂದ್ರು ನಿರ್ದೇಶನದಲ್ಲಿ ತಯಾರಾಗಿರುವ 'ಐ ಲವ್‌ ಯೂ' ಸಿನಿಮಾದಲ್ಲಿ ಮತ್ತೊಂದು ಲವ್‌ಸ್ಟೋರಿ ಹೇಳಲು ಹೊರಟಿದ್ದಾರೆ. ಈ ಲವ್‌ಸ್ಟೋರಿ ಈವರೆಗೂ ಬಂದಿರುವ ಪ್ರೇಮಕತೆಗಿಂತ ವಿಭಿನ್ನವಾಗಿದೆಯಂತೆ. ಹಾಗಾಗಿ ಮತ್ತೊಮ್ಮೆ ನನಗೆ ಲವ್‌ ಆಗಿದೆ ಎಂದಿದ್ದಾರೆ ರಿಯಲ್‌ಸ್ಟಾರ್‌.

ಉಪೇಂದ್ರ ಮತ್ತು ಚಂದ್ರು ಕಾಂಬಿನೇಷನ್‌ನ ಎರಡನೇ ಸಿನಿಮಾವಿದು. ನಾನಾ ವಿಶೇಷಗಳನ್ನು ಹೊತ್ತು ಈ ಸಿನಿಮಾ ರೆಡಿಯಾಗಿದೆ. ನಾಯಕಿಯಾಗಿ ರಚಿತಾ ರಾಮ್‌ ನಟಿಸಿದ್ದಾರೆ. ಮತ್ತೊಂದು ಪ್ರಮುಖ ಪಾತ್ರದಲ್ಲಿ ಸೋನು ಗೌಡ ಕಾಣಿಸಿಕೊಂಡಿದ್ದಾರೆ. ಈಗಾಗಲೇ ರಿಲೀಸ್‌ ಆಗಿರುವ ಟ್ರೇಲರ್‌ ಸೋಶಿಯಲ್‌ ಮೀಡಿಯಾದಲ್ಲಿ ಸಖತ್‌ ಕ್ರೇಜ್‌ ಕ್ರಿಯೇಟ್‌ ಮಾಡಿದೆ.

'ಉಪೇಂದ್ರ ಅವರ ಹಳೆ ಇಮೇಜ್‌ನ ಪ್ರೇರಣೆ ತಗೆದುಕೊಂಡು ಈ ಸಿನಿಮಾದ ಕಥೆ ಬರೆದಿದ್ದೇನೆ. ಅವರ ಎ ಮತ್ತು ಉಪೇಂದ್ರ ಸಿನಿಮಾಗಳನ್ನು ಮತ್ತೆ ನೆನಪಿಸುವಂಥ ಚಿತ್ರ ಇದಾಗಿದೆ. ಹಾಗಾಗಿಯೇ ಅವರಿಗೆ ವಿಶೇಷ ಗೆಟಪ್‌ ಕೂಡ ಕೊಟ್ಟಿದ್ದೇನೆ. ಎ ಸಿನಿಮಾದ ಕ್ಲೈಮ್ಯಾಕ್ಸ್‌ ಶೂಟ್‌ ಮಾಡಿದ ಸ್ಥಳದಲ್ಲೇ ಚಿತ್ರೀಕರಣ ಮಾಡಿದ್ದೇನೆ' ಎಂದರು ಚಂದ್ರು. ಈ ಸಿನಿಮಾ ಕುರಿತು ಮತ್ತೊಂದು ಅಚ್ಚರಿಯ ಸುದ್ದಿ ಕೊಟ್ಟಿದ್ದಾರೆ ಚಂದ್ರು, ದಾವಣಗೆರೆಯಲ್ಲಿ ಅದ್ಧೂರಿ ಸಮಾರಂಭವನ್ನು ಮಾಡಲು ತಯಾರಿ ಮಾಡಿಕೊಂಡಿದ್ದಾರಂತೆ. ಅದಕ್ಕೆ ಅತಿಥಿಯಾಗಿ ತೆಲುಗಿನ ಖ್ಯಾತ ನಿರ್ದೇಶಕ ರಾಜಮೌಳಿ ಮತ್ತು ರಜನೀಕಾಂತ್‌ ಅವರಿಗೆ ಆಹ್ವಾನ ನೀಡಲಿದ್ದಾರಂತೆ.