ಕಾಲೇಜು ಹುಡುಗ-ಹುಡುಗಿಯರಿಗೆ ಉಪ್ಪಿ ಪ್ರೇಮ ಪಾಠ

* ಶರಣು ಹುಲ್ಲೂರು

Vijaya Karnataka Web

ಜೂನ್‌ ತಿಂಗಳಿಂದ ಕಾಲೇಜ್‌ ಆರಂಭವಾಗುತ್ತವೆ. ಜೂ.14 ರಂದು ನಮ್ಮ 'ಐ ಲವ್‌ ಯೂ' ಸಿನಿಮಾ ಕೂಡ ರಿಲೀಸ್‌ ಆಗುತ್ತಿದೆ. ಹಾಗಾಗಿ ಕಾಲೇಜು ಹುಡುಗ ಹುಡುಗಿಯರಿಗೆ ಉಪೇಂದ್ರ ಪ್ರೀತಿಯ ಕುರಿತು ಪಾಠ ಮಾಡಲಿದ್ದಾರೆ. ಕಾಲೇಜು ಶುರುವಿನ ಮೊದಲ ಪಾಠವೇ ಪ್ರೀತಿಯ ಕುರಿತಾದದ್ದು ಆಗಿರುತ್ತದೆ ಎನ್ನುತ್ತಾರೆ ನಿರ್ದೇಶಕ ಆರ್‌.ಚಂದ್ರು.

'ಉಪೇಂದ್ರ ನಟನೆಯ ಉಪೇಂದ್ರ ಚಿತ್ರದಲ್ಲಿ ಪ್ರೀತಿಯ ಕುರಿತಾಗಿ ವಿಭಿನ್ನವಾಗಿ ಚರ್ಚೆ ಆಗಿತ್ತು. ಅವರು ಪ್ರೀತಿ ಅನ್ನುವುದು ಪುಸ್ತಕದ ಬದ್ನೆಕಾಯಿ ಎಂದಿದ್ದರು. ಆದರೆ, ಐ ಲವ್‌ ಯೂ ಸಿನಿಮಾದಲ್ಲಿ ಅವರ ಆಲೋಚನೆ ವಿಭಿನ್ನವಾಗಿದೆ. ಜೀವನದಲ್ಲಿ ಪ್ರೀತಿ ಎಷ್ಟು ಮುಖ್ಯ ಎಂದು ಉಪದೇಶ ಮಾಡುತ್ತಾರೆ. ಐ ಲವ್‌ ಯೂ ಅಂತ ಹೇಳುವುದು ಹೇಗೆ ಎನ್ನುವುದನ್ನು ಕಲಿಸುತ್ತಾರೆ. ಈ ಸಿನಿಮಾ ನೋಡಿದ ನಂತರ ಪ್ರೇಮಿಗಳು ಜಾಸ್ತಿ ಆಗುತ್ತಾರೆ' ಎಂದು ಹೇಳುತ್ತಾರೆ ಚಂದ್ರು.

ಈಗಾಗಲೇ ರಿಲೀಸ್‌ ಆಗಿರುವ ಸಿನಿಮಾದ ಟ್ರೇಲರ್‌, ಒಂದು ಕೋಟಿಗೂ ಹೆಚ್ಚು ಜನರಿಗೆ ರೀಚ್‌ ಆಗಿದೆ. ತೆಲುಗಿನಲ್ಲೂ ಟ್ರೇಲರ್‌ ಟ್ರೆಂಡಿಂಗ್‌ ಆಗಿದೆ. ಹಾಗಾಗಿ ಚಿತ್ರದ ಬಗ್ಗೆ ಸಹಜವಾಗಿಯೇ ಕುತೂಹಲ ಮೂಡಿದೆ. 'ಉಪೇಂದ್ರ ಅವರಿಗೆ ಕಥೆ ಹೇಳಿದಾಗ ತುಂಬಾ ಇಷ್ಟಪಟ್ಟರು. ಮಜಾ ಕೊಡುವ ಸಿನಿಮಾ ಇದಾಗಲಿದೆ ಎಂದು ಬೆನ್ನುತಟ್ಟಿದರು. ಅವರ ಪ್ರತಿಕ್ರಿಯೆಯೇ ಸೂಪರ್‌ ಆಗಿತ್ತು. ಉಪೇಂದ್ರ ನಟನೆಯ ಉಪೇಂದ್ರ ಚಿತ್ರದ ಕೆಲ ಅಂಶಗಳು ಈ ಸಿನಿಮಾದಲ್ಲಿವೆ. ಅವು ಯಾವವು ಎನ್ನುವುದನ್ನು ಚಿತ್ರದಲ್ಲಿಯೇ ನೋಡಿ' ಎನ್ನುತ್ತಾರೆ ಅವರು.

ಈ ಚಿತ್ರದಲ್ಲಿ ಉಪೇಂದ್ರ ಡಬಲ್‌ ಶೇಡ್‌ ಇರುವಂಥ ಪಾತ್ರ ಮಾಡಿದ್ದಾರೆ. ಇವರ ಇಂಟ್ರಡಕ್ಷನ್‌ ದೃಶ್ಯವನ್ನು ಹೆಲಿಕಾಪ್ಟರ್‌ನಲ್ಲಿ ಶೂಟ್‌ ಮಾಡಲಾಗಿದೆ. ದುಬಾರಿ ವೆಚ್ಚದಲ್ಲಿ ಅದನ್ನು ಚಿತ್ರೀಕರಿಸಲಾಗಿದೆ. ರಚಿತಾ ರಾಮ್‌ ನಾಯಕಿಯಾಗಿ ನಟಿಸಿದ್ದು, ಸೋನು ಗೌಡ ಸೇರಿ ಹಲವರು ನಟಿಸಿದ್ದಾರೆ.

'ಸಿನಿಮಾದ ಟ್ರೇಲರ್‌ ನೋಡಿಯೇ ತೆಲುಗಿನಲ್ಲಿ ಡಿಮಾಂಡ್‌ ಕ್ರಿಯೇಟ್‌ ಆಯಿತು. ತೆಲುಗು ಮತ್ತು ಕನ್ನಡದಲ್ಲಿ ಈ ಚಿತ್ರವನ್ನು ಏಕಕಾಲಕ್ಕೆ ರಿಲೀಸ್‌ ಮಾಡುತ್ತಿದ್ದೇವೆ' ಎಂದಿದ್ದಾರೆ ಚಂದ್ರು.

-------

ಕಾಲೇಜು ಶುರುವಾಗುವ ಹೊತ್ತಿನಲ್ಲೇ ಐ ಲವ್‌ ಯೂ ಚಿತ್ರ ಬಿಡುಗಡೆ ಆಗುತ್ತಿದೆ. ಉಪೇಂದ್ರ ಅವರ ಪ್ರೇಮಪಾಠವನ್ನು ಕೇಳಿಕೊಂಡೇ ವಿದ್ಯಾರ್ಥಿಗಳು ಕಾಲೇಜು ಮೆಟ್ಟಿಲು ಹತ್ತಲಿದ್ದಾರೆ.

- ಆರ್‌.ಚಂದ್ರು, ನಿರ್ದೇಶಕ