ಮೊಬೈಲ್ ರೇಡಿಯೇಶನ್ ಪರಿಣಾಮ: ಚರ್ಚೆಗೆ ಗ್ರಾಸವಾಯ್ತು ಉಪೇಂದ್ರ ಪೋಸ್ಟ್ ಮಾಡಿದ ವೀಡಿಯೋ

ಮೊಬೈಲ್ ಫೋನ್ ಹೊರಸೂಸುವ ವಿಕಿರಣ ಪ್ರಭಾವದ ಕುರಿತು ಕೆಲ ವರ್ಷಗಳಿಂದ ಸಾಕಷ್ಟು ಚರ್ಚೆಗಳಾಗುತ್ತಿವೆ. ಹಲವು ಸಮೀಕ್ಷೆಗಳು ಮಾನವ ಶರೀರದ ಮೇಲೆ ಮೊಬೈಲ್ ವಿಕಿರಣದ ಪರಿಣಾಮಗಳ ಮೇಲೆ ಬೆಳಕು ಚೆಲ್ಲಿವೆ. ಆದರೆ ಮೊಬೈಲ್ ಬಳಸಿದ ತಕ್ಷಣ ಆರೋಗ್ಯ ಕೆಟ್ಟುಹೋಗುತ್ತದೆ ಎಂದು ಯಾವ ವಿಜ್ಞಾನಿಯೂ, ವೈದ್ಯರೂ ಹೇಳಿಲ್ಲ. ಆದರೆ ಅತಿಯಾದ ವಿಕಿರಣದ ಸಾಮಿಪ್ಯತೆ ಆರೋಗ್ಯದ ಮೇಲೆ ಪರಿಣಾಮ ಬೀರುತ್ತದೆ ಎಂಬುದು ಗಂಭೀರವಾಗಿ ಯೋಚಿಸಬೇಕಾದ ವಿಚಾರವೇ ಸರಿ.

ಸಿನಿ ತಾರೆಯರು ಸಾಮಾಜಿಕ ಜಾಲತಾಣಗಳ ಮೂಲಕ ಸಾಮಾಜಿಕ ಕಳಕಳಿಯನ್ನು ತೋರಿಸುತ್ತಿರುತ್ತಾರೆ. ರಿಯಲ್ ಸ್ಟಾರ್ ಉಪೇಂದ್ರ ಕೂಡ ಇದಕ್ಕೆ ಹೊರತಲ್ಲ.



ಮೊಬೈಲ್‌ಗಳು ಹೊರಸೂಸುವ ವಿಕಿರಣಗಳು ಅಪಾಯಕಾರಿ ಎಂದು ತೋರಿಸುವ ವೀಡಿಯೋವೊಂದನ್ನು ಟ್ವಿಟ್ಟರ್‌ನಲ್ಲಿ ಪೋಸ್ಟ್ ಮಾಡಿರುವ ಉಪೇಂದ್ರ, ಮೊಬೈಲ್ ವಿಕಿರಣದಿಂದ ಕಾರ್ನ್ ಪಾಪ್‌ಕಾರ್ನ್ ಆಗುತ್ತದೆ. ಇದನ್ನು ನೋಡಿದ ಬಳಿಕ ಕೂಡ ನೀವು ತಲೆದಿಂಬಿನ ಬದಿಯಲ್ಲಿ ಅಥವಾ ಕೆಳಗಡೆ ಮೊಬೈಲ್ ಇಟ್ಟುಕೊಂಡಿರುವುದನ್ನು ಮುಂದುವರಿಸುತ್ತೀರಾ ಎಂದು ಪ್ರಶ್ನಿಸಿದ್ದಾರೆ.

ಈ ಪೋಸ್ಟ್ ಪರ ವಿರೋಧ ಕಮೆಂಟ್‌ಗಳು ಹರಿದು ಬರುತ್ತಿದ್ದು, ಕೆಲವು ಇದು ಫೇಕ್ ಎಂದರೆ ಮತ್ತೆ ಕೆಲವರು ಇದು ಬಹಳ ಹಳೆಯ ವೀಡಿಯೋ, ಇದರಲ್ಲಿ ಸತ್ಯಾಂಶವಿಲ್ಲ ಎನ್ನುತ್ತಿದ್ದಾರೆ. ಇನ್ನು ಕೆಲವರು ನೀವು ಕೊಟ್ಟಿರುವ ಎಚ್ಚರಿಕೆಗೆ ಧನ್ಯವಾದ ಎನ್ನುತ್ತಿದ್ದಾರೆ.

ಒಬ್ಬರಂತೂ ಮೊಬೈಲ್ ಬಿಟ್ಟು ಸ್ಥಿರ ದೂರವಾಣಿ ಬಳಸುವುಚಿತ ಎಂದಿದ್ದಾರೆ.