ಹದಿನೇಳು ವರ್ಷಗಳ ನಂತರ ಉಪೇಂದ್ರ ಮತ್ತು ಪ್ರೇಮಾ ಮತ್ತೆ ಒಟ್ಟಾಗಿ ಕಾಣಿಸಿಕೊಳ್ಳಲಿದ್ದಾರೆ ಅನ್ನುವ ಸುದ್ದಿ ಹರಡಿತ್ತು. ಈಗದು ಅಧಿಕೃತವಾಗಿದೆ. ಈಗಾಗಲೇ ಇವರಿಬ್ಬರೂ ಹೊಸ ಸಿನಿಮಾದ ಶೂಟಿಂಗ್ನಲ್ಲಿ ಪಾಲ್ಗೊಂಡಿದ್ದಾರೆ.
- ಶರಣು ಹುಲ್ಲೂರು
ಉಪೇಂದ್ರ ಮತ್ತು ಪ್ರೇಮಾ ಜೋಡಿಯು 'ಉಪೇಂದ್ರ' ಸಿನಿಮಾದಲ್ಲಿ ಕಮಾಲ್ ಮಾಡಿತ್ತು. ಈ ಚಿತ್ರವು ತೆರೆಕಂಡು ಹದಿನೇಳು ವರ್ಷಗಳಾದರೂ, ಮತ್ತೆ ಈ ಜೋಡಿ ತೆರೆಯ ಮೇಲೆ ಕಾಣಿಸಿಕೊಂಡಿರಲಿಲ್ಲ. ಹೀಗಾಗಿ ಸಹಜವಾಗಿಯೇ ಅಭಿಮಾನಿಗಳಲ್ಲಿ ಕುತೂಹಲ ಮೂಡಿತ್ತು. ಮತ್ತೆ ಯಾವಾಗ ಇವರಿಬ್ಬರೂ ಒಟ್ಟಾಗಿ ನಟಿಸಲಿದ್ದಾರೆ ಅನ್ನುವ ನಿರೀಕ್ಷೆಯೂ ಇತ್ತು. ಈ ಎಲ್ಲಾ ಕ್ಯೂರಿಯಾಸಿಟಿ ಮತ್ತು ನಿರೀಕ್ಷೆಗೆ 'ಉಪೇಂದ್ರ ಮತ್ತೆ ಹುಟ್ಟಿ ಬಾ; ಇಂತಿ ನಿಮ್ಮ ಪ್ರೇಮಾ' ಸಿನಿಮಾ ತೆರೆ ಎಳೆದಿದೆ.
ಈ ಚಿತ್ರದಲ್ಲಿ ಇಬ್ಬರೂ ಒಂದಾಗಲಿದ್ದಾರೆ ಅನ್ನುವ ಸುದ್ದಿ ಹರಡಿದ್ದರೂ, ಅದು ಅಧಿಕೃತವಾಗಿರಲಿಲ್ಲ. ಉಪೇಂದ್ರ ಮತ್ತು ಪ್ರೇಮಾ ಚಿತ್ರದ ಶೂಟಿಂಗ್ನಲ್ಲಿ ಭಾಗವಹಿಸುವ ಮೂಲಕ ಅಧಿಕೃತಗೊಳಿಸಿದ್ದಾರೆ. ಕ್ರೀಮ್ ಮತ್ತು ಗ್ರೀನ್ ಕಾಂಬಿನೇಷನ್ನ ಹಾಫ್ ಆ್ಯಂಡ್ ಹಾಫ್ ಸೀರೆಯಲ್ಲಿ ಪ್ರೇಮಾ ಕಂಗೊಳಿಸಿದ್ದಾರೆ.
'ಪಾತ್ರದ ಬಗ್ಗೆ ಸದ್ಯಕ್ಕೆ ಏನೂ ಹೇಳಲಾರೆ. ಮತ್ತೆ ಬಣ್ಣ ಹಚ್ಚಿದ್ದಕ್ಕೆ ಖುಷಿಯಿದೆ. ಅದರಲ್ಲೂ ಉಪೇಂದ್ರ ಜತೆ ನಟಿಸಲು ಯಾವತ್ತಿಗೂ ನನಗೆ ಸಂಭ್ರಮ. ಉಳಿದ ವಿವರವನ್ನು ಸಿನಿಮಾದಲ್ಲೇ ನೋಡಿ' ಅನ್ನುವುದು ಪ್ರೇಮಾ ಮಾತು.
ಹಾಗಂತ ಇದು ಉಪೇಂದ್ರ ಸಿನಿಮಾದ ಸೀಕ್ವಲ್ ಅಲ್ಲ. ಇದು 'ಸೊಗ್ಗಾಡೆ ಚಿನ್ನಿನಾಯನ' ತಮಿಳು ಚಿತ್ರದ ರೀಮೇಕ್. ಈ ಸಿನಿಮಾದಲ್ಲಿ ಉಪೇಂದ್ರ ಅವರದ್ದು ದ್ವಿಪಾತ್ರ. ಹೀಗಾಗಿ ಚಿತ್ರಕ್ಕೆ ಇಬ್ಬರು ನಾಯಕಿಯರು. ಒಂದು ಪಾತ್ರವನ್ನು ಪ್ರೇಮಾ ನಿರ್ವಹಿಸುತ್ತಿದ್ದರೆ, ಮತ್ತೊಂದು ಪಾತ್ರದಲ್ಲಿ ಶ್ರುತಿ ಹರಿಹರನ್ ಕಾಣಿಸಿಕೊಂಡಿದ್ದಾರೆ. ಎಚ್ಟುಓ ಸಿನಿಮಾದ ನಿರ್ದೇಶಕ ಎನ್. ಲೋಕನಾಥ್ ಆ್ಯಕ್ಷನ್ ಕಟ್ ಹೇಳುತ್ತಿದ್ದಾರೆ.
ಪಕ್ಕಾ ರೋಮ್ಯಾಂಟಿಕ್ ಥ್ರಿಲ್ಲರ್ ಹಾಗೂ ಫ್ಯಾಮಿಲಿ ಎಂಟರ್ಟೇನರ್ ಸಿನಿಮಾ ಇದಾಗಿದ್ದರಿಂದ, 'ಉಪೇಂದ್ರ ಮತ್ತೆ ಹುಟ್ಟಿ ಬಾ, ಇಂತಿ ನಿಮ್ಮ ಪ್ರೇಮ' ಎಂಬ ಶೀರ್ಷಿಕೆಯನ್ನಿಟ್ಟಿದ್ದಾರೆ ನಿರ್ದೇಶಕರು. ಕತೆಗೂ ಮತ್ತು ಟೈಟಲ್ಗೂ ಏನು ಸಂಬಂಧ ಅನ್ನುವ ಪ್ರಶ್ನೆಗೆ ಸಿನಿಮಾದಲ್ಲೇ ಉತ್ತರವಿದೆ ಅನ್ನುವುದು ನಿರ್ದೇಶಕರ ಮಾತು. ರೀಮೇಕ್ ಚಿತ್ರವಾದರೂ, ಯಥಾವತ್ತಾಗಿ ಚಿತ್ರಕತೆಯನ್ನು ಬಳಸಿಕೊಂಡಿಲ್ಲವಂತೆ. ಹಲವು ಬದಲಾವಣೆ ಮಾಡಿದ್ದಾರಂತೆ ಉಪೇಂದ್ರ. ಹೀಗಾಗಿಯೇ ಚಿತ್ರಕ್ಕೆ ಇಂಥದ್ದೊಂದು ಟೈಟಲ್ ಇಟ್ಟಿದ್ದಾರೆ.