ಪುಕ್ಸಟ್ಟೆ ಹುಡುಗ ಫುಲ್‌ ಬಿಝಿ

ಸಂಚಾರಿ ವಿಜಯ್‌ ನಟನೆಯ ಪುಕ್ಸಟೆ ಲೈಫು ಚಿತ್ರದ ಪೋಸ್ಟ್‌ ಪ್ರೊಡಕ್ಷನ್‌ ಕೆಲಸ ಭರದಿಂದ ಸಾಗಿದೆ. ರಂಗಭೂಮಿ ತಂಡವೊಂದು ಚಿತ್ರ ತೆರೆಗೆ ತರುತ್ತಿದ್ದು, ಅರವಿಂದ್‌ ಕುಪ್ಳೀಕರ್‌ನಿರ್ದೇಶನ ಮಾಡಿದ್ದಾರೆ.

ಸಂಚಾರಿ ವಿಜಯ್‌ ಯಾವ ಪಾತ್ರಕ್ಕಾದರೂ ಸೈ ಎಂಬುದನ್ನು ನಿರೂಪಿಸಿದ್ದಾರೆ. ಈಗ ಪುಕ್ಸಟ್ಟೆ ಲೈಫು ಚಿತ್ರದಲ್ಲಿ ಮುಸ್ಲಿಂ ಹುಡುಗನಾಗಿ ನಟಿಸುತ್ತಿದ್ದಾರೆ. ನಿರ್ದೇಶಕ ಅರವಿಂದ್‌ ಕುಪ್ಳೀಕರ್‌ ಮತ್ತು ಸಂಚಾರಿ ವಿಜಯ್‌ ರಂಗಭೂಮಿ ಗೆಳೆಯರು. ವಿಜಯ್‌ ಹೇಳಿದ ಸ್ಟೋರಿ ಲೈನ್‌ನನ್ನು ಬೆಳೆಸಿ ಕತೆ ಬರೆದು ನಿರ್ದೇಶನ ಮಾಡುತ್ತಿದ್ದಾರೆ ಅರವಿಂದ್‌. ಪುಕ್ಸಟ್ಟೆ ಲೈಫು ಟೈಟಲ್‌ಗೆ ಪುರುಸೊತ್ತೇ ಇಲ್ಲ ಎಂಬ ಟ್ಯಾಗ್‌ ಲೈನ್‌ ನೀಡಲಾಗಿದೆ.

ಏನೂ ಕೆಲಸ ಇಲ್ಲದಿದ್ದರೂ ಕೆಲವು ತುಂಬಾ ಬಿಝಿ ಇರುವಂತೆ ಪೋಸ್‌ ನೀಡುತ್ತಾರೆ. ಇಂಥದ್ದೊಂದು ಕತೆಯ ಎಳೆ ಚಿತ್ರದಲ್ಲಿ ಇದೆ ಎಂದಿದೆ ಚಿತ್ರತಂಡ. 'ಬಡ ಕುಟುಂಬದಿಂದ ಬಂದ ಮುಸ್ಲಿಂ ಹುಡುಗನಾಗಿ ಸಂಚಾರಿ ವಿಜಯ್‌ ನಟಿಸುತ್ತಿದ್ದಾರೆ. ಕೆಲವೊಂದು ಘಟನೆಗಳಿಗೆ ಹೇಗೆ ಬಲಿಯಾಗುತ್ತಾನೆ ಎನ್ನುವುದು ಸಿನಿಮಾದಲ್ಲಿದೆ. ಹೊಸ ಅವತಾರದಲ್ಲಿ ಅವರನ್ನು ನೋಡಬಹುದು' ಎಂದಿದ್ದಾರೆ ನಿರ್ದೇಶಕ ಅರವಿಂದ್‌ ಕುಪ್ಳೀಕರ್‌.

ಚಿತ್ರದಲ್ಲಿ ರಂಗಾಯಣ ರಘು, ಅಚ್ಯುತ್‌ ಕುಮಾರ್‌, ಮಾತಂಗಿ ಪ್ರಸನ್ನ ಮತ್ತಿತರರು ನಟಿಸಿದ್ದಾರೆ. ಅರವಿಂದ್‌ ಕುಪ್ಳೀಕರ್‌ ಈ ಹಿಂದೆ ಪ್ರಕಾಶ್‌ ರಾಜ್‌ ನಿರ್ದೇಶನದ ಇದೊಳ್ಳೆ ರಾಮಾಯಣ ಚಿತ್ರಕ್ಕೆ ಸಹ ನಿರ್ದೇಶಕರಾಗಿ ಕೆಲಸ ಮಾಡಿದ್ದಾರೆ.