ವಿಜಯಲಕ್ಷ್ಮಿ ಟ್ವೀಟ್ ವೈರಲ್; ದರ್ಶನ್ ಅಭಿಮಾನಿಗಳಿಂದ ಪ್ರಶ್ನೆಗಳ ಸುರಿಮಳೆ

ದರ್ಶನ್‌ ಪತ್ನಿ ವಿಜಯಲಕ್ಷ್ಮಿ ರವಿವಾರ ಮಾಡಿದ್ದ ಟ್ವಿಟ್‌, ದರ್ಶನ್‌ ಅಭಿಮಾನಿಗಳಲ್ಲಿ ಗೊಂದಲ ಮತ್ತು ಆತಂಕಕ್ಕೆ ಕಾರಣವಾಗಿದೆ. ತಮ್ಮ ಅಧಿಕೃತ ಟ್ವಿಟರ್‌ ಖಾತೆಯಲ್ಲಿ ಅವರು ಬೆಳಗ್ಗೆ 11 ಗಂಟೆ 12 ನಿಮಿಷಕ್ಕೆ 'ಆಲ್‌ ದ ರೂಮರ್ಸ್ ಡೂಯಿಂಗ್‌ ರೌಂಡ್ಸ್‌ ಬೇಸ್‌ಲೆಸ್‌' ಎಂದು ಬರೆದುಕೊಂಡಿದ್ದಾರೆ. ಈ ಬರಹವೇ ಚರ್ಚೆಗೆ ಕಾರಣವಾಗಿದೆ.

ಕೆಲವೇ ಕ್ಷಣಗಳಲ್ಲಿ ಈ ಟ್ವಿಟ್‌ ವೈರಲ್‌ ಆಗುತ್ತಿದ್ದಂತೆಯೇ ಆತಂಕಗೊಂಡ ಅಭಿಮಾನಿಗಳು, ಏನಾಯಿತು? ಯಾಕೆ ಈ ರೀತಿ ಟ್ವಿಟ್‌ ಮಾಡಿದ್ದೀರಿ? ಹಬ್ಬಿರುವ ರೂಮರ್ಸ್ ಏನು? ಹೀಗೆ ಹತ್ತು ಹಲವು ಪ್ರಶ್ನೆಗಳನ್ನು ಕೇಳಿದ್ದಾರೆ. ಆದರೆ, ಈ ಎಲ್ಲ ಪ್ರಶ್ನೆಗಳಿಗೆ ವಿಜಯಲಕ್ಷ್ಮಿ ಇನ್ನೂ ಉತ್ತರ ನೀಡಿಲ್ಲ. ಆದರೆ, ಸ್ಯಾಂಡಲ್‌ವುಡ್‌ನಲ್ಲಿ ಮಾತ್ರ ಈ ಕುರಿತು ನಾನಾ ಬಗೆಯ ಕಥೆಗಳು ಹುಟ್ಟಿಕೊಂಡಿವೆ. ಈ ಕಥೆಗೆ ಪೂರಕ ಎನ್ನುವಂತೆ ವಿಜಯಲಕ್ಷ್ಮಿ ಅವರು ತಮ್ಮ ಟ್ವಿಟರ್‌ ಖಾತೆಯ ಹೆಸರನ್ನೂ ಬದಲಾಯಿಸಿಕೊಂಡಿದ್ದು ಪುಷ್ಠಿ ನೀಡಿದೆ. [ದರ್ಶನ್ ಸಂಸಾರದಲ್ಲಿ ಜಗಳ: ವದಂತಿಗೆ ತೆರೆ ಎಳೆದ ವಿಜಯಲಕ್ಷ್ಮಿ]

ಈ ಹಿಂದೆ ಅವರ ಟ್ವಿಟರ್‌ ಖಾತೆ 'ವಿಜಯಲಕ್ಷ್ಮಿ ದರ್ಶನ್‌' ಎಂದಾಗಿತ್ತು. ಈಗ ಕೇವಲ 'ವಿಜಯಲಕ್ಷ್ಮಿ' ಅಂತಿದೆ. ಟ್ವಿಟರ್‌ ಖಾತೆಯಲ್ಲಿ ದರ್ಶನ್‌ ಹೆಸರು ತಗೆದು ಹಾಕಿದ್ದಕ್ಕೂ ಅಭಿಮಾನಿಗಳು ಪ್ರಶ್ನೆ ಮಾಡಿದ್ದಾರೆ. ದರ್ಶನ್‌ ಅನ್ನುವುದು ಭಾವನಾತ್ಮಕ ಸಂಬಂಧ. ಕೂಡಲೇ ಅವರ ಹೆಸರನ್ನು ಸೇರಿಸಿಕೊಳ್ಳಿ ಎಂದು ಒತ್ತಾಯಿಸಿದ್ದಾರೆ.