ದೀಪ್‍ವೀರ್ ಬೇರೆ ಬೇರೆಯಾಗಿ ಪೋಸ್ ಕೊಡಲಿಲ್ಲ ಯಾಕೆ?

ಇಟಲಿಯ ಲೇಕ್ ಕೊಮೊದಲ್ಲಿ ಅದ್ದೂರಿ ಮದುವೆ ಮುಗಿಸಿಕೊಂಡು ಬಂದ ದೀಪಿಕಾ ಪಡುಕೋಣೆ ಮತ್ತು ರಣವೀರ್ ಸಿಂಗ್ ಜೋಡಿಯ ಆರತಕ್ಷತೆ ಕಾರ್ಯಕ್ರಮ ಸಹ ಅಷ್ಟೇ ಅದ್ದೂರಿಯಾಗಿ ಬೆಂಗಳೂರಿನಲ್ಲಿ ನಡೆಯಿತು. ಇದಕ್ಕೆ ಹಲವು ಸೆಲೆಬ್ರಿಟಿಗಳು ಸಾಕ್ಷಿಯಾದರು.

ಈ ಆರತಕ್ಷತೆ ಕಾರ್ಯಕ್ರಮಕ್ಕೆ ಸಂಬಂಧಿಸಿದ ವೀಡಿಯೋಗಳು ಮತ್ತು ಫೋಟೋಗಳೂ ಸಾಮಾಜಿಕ ಮಾಧ್ಯಮದಲ್ಲಿ ವೈರಲ್ ಆದವು. ಸಾಂಪ್ರದಾಯಿಕ ಉಡುಗೆಯಲ್ಲಿ ಕಂಗೊಳಿಸುತ್ತಿದ್ದ ದೀಪ್‌ವೀರ್ ಜೋಡಿ ವೇದಿಕೆಯಲ್ಲಿ ಮಾಧ್ಯಮಗಳಿಗೆ ಪೋಸ್ ನೀಡುತ್ತಿತ್ತು.

ದೀಪಿಕಾ ಚಿನ್ನದ ಬಣ್ಣದ ಸೀರೆಯಲ್ಲಿ ಕಂಗೊಳಿಸುತ್ತಿದ್ದರೆ ರಣವೀರ್ ಚಿನ್ನದ ಚಿತ್ತಾರದ ಕಪ್ಪು ಶೆರ್ವಾಣಿ, ಅದಕ್ಕೊಪ್ಪುವ ಶೂಸ್‌ ಜತೆ ಕಂಗೊಳಿಸುತ್ತಿದ್ದರು. ಇಬ್ಬರೂ ಜತೆಯಾಗಿಯೇ ಸಾಕಷ್ಟು ಫೋಟೋಗಳಿಗೆ ಪೋಸ್ ನೀಡುತ್ತಿದ್ದರು. ಇದೇ ಸಂದರ್ಭದಲ್ಲಿ ಇಬ್ಬರೂ ಬೇರೆ ಬೇರೆಯಾಗಿ ಪೋಸ್ ನೀಡುವಂತೆ ಕೇಳಿದರು ಛಾಯಾಗ್ರಾಹಕರೊಬ್ಬರು.

ಇದಕ್ಕೆ ಕೂಡಲೆ ಪ್ರತಿಕ್ರಿಯಿಸಿದ ರಣವೀರ್ ಸಿಂಗ್, "ನಾನು ಹೆಂಡತಿ ಜೊತೆಗೆ ಇದ್ದೀನಿ, ಫೋಟೋ ಯಾಕೆ ಬೇರೆ ಬೇರೆ? ("Miyan Biwi Saath Hain, Toh Photo Alag Kyun?)" ಎಂದು ಉತ್ತರಿಸಿದರು. ಇಬ್ಬರೂ ಬೇರೆ ಬೇರೆಯಾಗಿ ಫೋಟೋಗೆ ಪೋಸ್ ಕೊಡಲು ಸುತಾರಾಂ ಒಪ್ಪಲಿಲ್ಲವಂತೆ.

ದೀಪಿಕಾ ತಂದೆ ಪ್ರಕಾಶ್‌ ಪಡುಕೋಣೆ ಮತ್ತು ತಂಗಿ ಅನಿಶಾ ಪಡುಕೋಣೆ ಕ್ರೀಡಾ ಕ್ಷೇತ್ರದವರಾಗಿರುವ ಕಾರಣ ಸಮಾರಂಭದಲ್ಲಿ ಬೆಂಗಳೂರಿನ ಕ್ರೀಡಾ ಕ್ಷೇತ್ರದ ಗಣ್ಯರಾದ ರಾಹುಲ್‌ ದ್ರಾವಿಡ್‌, ಅನಿಲ್‌ ಕುಂಬ್ಳೆ, ಜಾವಗಲ್‌ ಶ್ರೀನಾಥ್‌, ಪಂಕಜ್‌ ಆಡ್ವಾಣಿ, ಸೈನಾ ನೆಹ್ವಾಲ್‌ ಮುಂತಾದವರು ಪಾಲ್ಗೊಳ್ಳುವ ಸಾಧ್ಯತೆ ಇದೆ. ಸ್ಯಾಂಡಲ್‌ವುಡ್‌ನ ಕೆಲ ಪ್ರಮುಖ ಸಿಲೆಬ್ರಿಟಿಗಳು ಭಾಗಿಯಾಗಿದ್ದರು.

ಇಟಲಿಯ ಮದುವೆ ಫೋಟೋಗಳನ್ನು ಇಬ್ಬರೂ ಸಾಮಾಜಿಕ ಮಾಧ್ಯಮಗಳಲ್ಲಿ ಹಂಚಿಕೊಂಡಿದ್ದರು. ನವೆಂಬರ್ 28 ಮತ್ತು ಡಿಸೆಂಬರ್ 1ಕ್ಕೆ ಮುಂಬೈನಲ್ಲಿ ಆರತಕ್ಷತೆ ಕಾರ್ಯಕ್ರಮವನ್ನು ಹಮ್ಮಿಕೊಂಡಿದೆ ಈ ಜೋಡಿ.