ಯಶ್‌ ಮತ್ತು ರಾಧಿಕಾ ಪಂಡಿತ್‌ ತಮ್ಮ ಪುಟ್ಟ ಮಗಳು ಐರಾಳ ನೆನಪಿನಲ್ಲಿ ಸುಂದರವಾದ ಗಿಫ್ಟ್‌ ಸ್ವೀಕರಿಸಿದ್ದಾರೆ. ಅದು ಅಪರೂಪದ ಗಿಫ್ಟ್‌. ಪುಟ್ಟ ಮಗುವಿನ ಕೈ ಮತ್ತು ಪಾದಗಳ ಮಾದರಿಯನ್ನು ಪಡೆದಿದ್ದಾರೆ.

ಈ ಮಾದರಿಗೆ ಸುಂದರವಾದ ಫ್ರೇಮ್‌ ಹಾಕಲಾಗಿದೆ. ಯಶ್‌ ಈ ಪ್ರತಿಕೃತಿಯನ್ನು ಸೋಷಿಯಲ್‌ ಮೀಡಿಯಾದಲ್ಲಿ ಶೇರ್‌ ಮಾಡಿದ್ದಾರೆ. ಕಲಾವಿದ ಪ್ರಶಾಂತ್‌ ಐರಾಳ ಪುಟ್ಟ ಕೈ, ಪಾದಗಳ ಮಾದರಿಯನ್ನು ಸಿದ್ಧಪಡಿಸಿದ್ದು, ಯಶ್‌ ಮತ್ತು ರಾಧಿಕಾ ಫುಲ್‌ ಖುಷಿಯಾಗಿದ್ದಾರೆ.

ಯಶ್‌ ದಂಪತಿ ಮೊದಲ ಮಗುವಿನ ಮಧುರ ಕ್ಷಣಗಳನ್ನು ಈ ರೀತಿ ಸೆರೆ ಹಿಡಿದಿದ್ದಾರೆ. 'ಇದು ನಿಜಕ್ಕೂ ಅವಿಸ್ಮರಣೀಯವಾದದ್ದು. ಪೋಷಕರಾಗಿ ನಮಗೆ ಮಕ್ಕಳ ಬಗ್ಗೆ ಸದಾ ಎಕ್ಸೈಟ್‌ಮೆಂಟ್‌ ಇರುತ್ತೆ. ನಮ್ಮ ಕನಸನ್ನು ನನಸು ಮಾಡಿದ್ದಾರೆ ಪ್ರಶಾಂತ್‌. ಇಂಥ ಸುಂದರ ಗಿಫ್ಟ್‌ ನೀಡಿದ ಪ್ರಶಾಂತ್‌ಗೆ ಧನ್ಯವಾದಗಳು' ಎಂದಿದ್ದಾರೆ ರಾಧಿಕಾ.

ಪ್ರಶಾಂತ್‌ ರಾಧಿಕಾ ಪಂಡಿತ್‌ ಮೇಕಪ್‌ ಆರ್ಟಿಸ್ಟ್‌. ''ಪ್ರಶಾಂತ್‌ ವಂಡರ್‌ಫುಲ್‌ ಆರ್ಟಿಸ್ಟ್‌. ಇದನ್ನು ಮಾಡುವಾಗ ಐರಾ ಸುಮ್ಮನೆ ಇರುತ್ತಿರಲಿಲ್ಲ. ಬಹಳ ಆಕ್ಟಿವ್‌ ಆಗಿರೋ ಅವಳು ಕೈ ಕಾಲು ಅಲ್ಲಾಡಿಸುತ್ತಲೇ ಇರುತ್ತಿದ್ದಳು. ಪ್ರಶಾಂತ್‌ ಬಹಳ ತಾಳ್ಮೆಯಿಂದ ಇದನ್ನು ಸಿದ್ಧಪಡಿಸಿದ್ದಾರೆ. ಐರಾ ದೊಡ್ಡವಳಾದ ನಂತರ ಇದನ್ನು ನೋಡಿ ಥ್ರಿಲ್‌ ಆಗೋದು ಖಂಡಿತ' ಎಂದಿದ್ದಾರೆ ಯಶ್‌.