ಜತೆಯಾಗಿ ನಟಿಸಲಿರುವ ಯಶ್‌, ರಶ್ಮಿಕಾ?

ರಾಕಿಂಗ್ ಸ್ಟಾರ್‌ ಯಶ್‌ ಹಾಗೂ ಕಿರಿಕ್‌ ಪಾರ್ಟಿ ಸ್ಟಾರ್‌ ರಶ್ಮಿಕಾ ಮಂದಣ್ಣ ಜತೆಯಾಗಿ ರಾಣಾ ಸಿನಿಮಾದಲ್ಲಿ ನಟಿಸಲಿದ್ದಾರೆಯೇ? ಹೀಗೊಂದು ರೂಮರ್ ಗಾಂಧಿ ನಗರದಲ್ಲಿ ಹರಿದಾಡುತ್ತಿದೆ.

ಸಂದರ್ಶನವೊಂದರಲ್ಲಿ ಯಶ್‌ ಬಗ್ಗೆ ವಿವಾದಾತ್ಮಕ ಹೇಳಿಕೆ ನೀಡಿದರು ಎಂದು ಯಶ್‌ ಅಭಿಮಾನಿಗಳ ಕೆಂಗೆಣ್ಣಿಗೆ ಗುರಿಯಾಗಿದ್ದರು ರಶ್ಮಿಕಾ. ಆಗ ಯಶ್‌ ಮತ್ತೊಬ್ಬರ ಅಭಿಪ್ರಾಯವನ್ನು ನಾವು ಗೌರವಿಸಬೇಕು ಎನ್ನುವ ಅರ್ಥದಲ್ಲಿ ಟ್ವೀಟ್‌ ಮಾಡಿ ವಿಷಯವನ್ನು ತಣ್ಣಗಾಗಿಸಿದ್ದರು.

ರಶ್ಮಿಕಾ ಕೂಡ ನಾನು ಯಶ್ ಸರ್‌ ಅನ್ನು ಗೌರವಿಸುತ್ತೇನೆ. ನಾನು ಹೇಳಿದ ಮಾತಿನಿಂದ ಬೇಸರವಾಗಿದ್ದರೆ ಕ್ಷಮಿಸಿ ಎಂದು ಫೇಸ್‌ಬುಕ್‌ನಲ್ಲಿ ಪೋಸ್ಟ್‌ ಮಾಡಿದ್ದರು.

ಯಶ್ ಸದ್ಯ ಕೆಜಿಎಫ್‌ ಶೂಟಿಂಗ್‌ನಲ್ಲಿ ಬ್ಯುಸಿಯಾಗಿದ್ದಾರೆ. ಯಶ್‌ ಹಾಗೂ ರಾಧಿಕಾ ಪಂಡಿತ್ ಜತೆಯಾಗಿ ನಟಿಸಿದ ಸೂಪರ್ ಹಿಟ್‌ ಚಿತ್ರ 'ಸಂತು ಸ್ಟ್ರೈಟ್ ಫಾರ್ವರ್ಡ್‌' ನಂತರ ಬರುವ ಚಿತ್ರ ಇದಾಗಿದ್ದು, ಇದರಲ್ಲಿ ಯಶ್ ಮಾಸ್‌ ಲುಕ್‌ನಲ್ಲಿ ಹೀಗಾಗಲೇ ಗಮನ ಸೆಳೆದಿದ್ದಾರೆ.

ಚೊಚ್ಚಲ ಚಿತ್ರದಲ್ಲಿಯೇ ಸ್ಟಾರ್‌ ನಟಿಯಾಗಿ ಹೊರಹೊಮ್ಮಿದ ರಶ್ಮಿಕಾ ಮಂದಣ್ಣ ಕೂಡ ಬಹು ಬೇಡಿಕೆಯ ನಟಿಯಾಗಿ ಬೆಳೆದಿದ್ದಾರೆ.