ಗೋವಾ ಬೀಚ್‌ನಲ್ಲಿ ಪ್ಯಾಥೋ ಸಾಂಗ್‌ ಹಾಡುತ್ತಿದ್ದಾರೆ ಭಟ್ಟರು

* ಹರೀಶ್‌ ಬಸವರಾಜ್‌

Vijaya Karnataka Web

ಇತ್ತೀಚೆಗಷ್ಟೇ ಟೀಸರ್‌ ಬಿಡುಗಡೆ ಮಾಡಿ ಅದರ ಮೂಲಕ ಗಮನ ಸೆಳೆದಿದ್ದ ನಿರ್ದೇಶಕ ಯೋಗರಾಜ್‌ ಭಟ್‌, ತಮ್ಮ ಪಂಚತಂತ್ರ ಸಿನಿಮಾ ಟೀಮ್‌ನ್ನು ಕಟ್ಟಿಕೊಂಡು ಗೋವಾದ ಭಾಗಾ ಬೀಚ್‌ನಲ್ಲಿ ಬೀಡು ಬಿಟ್ಟಿದ್ದಾರೆ.

ಭಟ್ಟರ ಆ್ಯಕ್ಷನ್‌ ಕಮ್‌ ಲವ್‌ ಸ್ಟೋರಿಯ ಪಂಚತಂತ್ರ ಸಿನಿಮಾದ ಹಾಡಿನ ಚಿತ್ರೀಕರಣ ಗೋವಾದಲ್ಲಿ ಬುಧವಾರದಿಂದ ಆರಂಭವಾಗಿದೆ. ಇದು ಮುಗಿದರೆ ಪಂಚತಂತ್ರ ಶೂಟಿಂಗ್‌ ಕಂಪ್ಲೀಟ್‌ಆಗುತ್ತದೆ. ಸೆಟ್‌ನಿಂದಲೇ ನೇರವಾಗಿ ಲವಲವಿಕೆ ಜತೆ ಮಾತನಾಡಿದ ಭಟ್ಟರು, ಈ ಹಾಡು ಸಿನಿಮಾದಲ್ಲಿ ಬಹಳ ಲೈವ್ಲಿಯಾಗಿ ಇರುತ್ತದೆ ಎಂದರು. 'ನಮ್ಮ ನಾಯಕನಿಗೆ ಲವ್‌ ಫೆಲ್ಯೂರ್‌ ಆದಾಗ ಆ ಫೀಲಿಂಗ್‌ನಲ್ಲಿ ಗೋವಾದಲ್ಲಿ ಈ ಹಾಡು ಹಾಡುತ್ತಿರುತ್ತಾನೆ. ಇದೇ ಸಮಯದಲ್ಲಿ ಅವನಿಗೆ ಅವನ ಗೆಳೆಯರು ಸಾಥ್‌ ನೀಡುತ್ತಾರೆ. ಇಮ್ರಾನ್‌ ಸರ್ದಾರಿಯಾ ಈ ಹಾಡನ್ನು ಕೋರಿಯೋಗ್ರಫಿ ಮಾಡಿದ್ದು, ಹಾಡಿನ ಜತೆಗೆ ಒಂದಷ್ಟು ಟಾಕಿ ಪೋಷನ್‌ ಸಹ ಚಿತ್ರೀಕರಣ ಮಾಡುತ್ತೇವೆ'ಎನ್ನುತ್ತಾರೆ ಭಟ್ಟರು.

ಮಾಸ್ತಿ, ಕಾಂತರಾಜ್‌ ಬರೆದ ಕಥೆ ಇದಾಗಿದ್ದು, ಹರಿಪ್ರಸಾದ್‌ ಜಯಣ್ಣ ಮತ್ತು ಹೇಮಂತ್‌ ಪರಾಡ್ಕರ್‌ ಬಂಡವಾಳ ಹೂಡಿದ್ದಾರೆ. ಗೋವಾದ ಶೂಟಿಂಗ್‌ನಲ್ಲಿ ವಿಹಾನ್‌ ಗೌಡ, ಸೋನಲ್‌, ಸಾಗರ್‌, ನಂದ, ಅಜರ್‌ ಭಾಗವಹಿಸಿದ್ದಾರೆ. ಇತ್ತೀಚೆಗೆ ಈ ಸಿನಿಮಾದ ಟೀಸರ್‌ ಬಿಡುಗಡೆಯಾಗಿತ್ತು. ಈ ಸಿನಿಮಾ ಮೂಲಕ ತಮ್ಮ ಹಳೇ ಟ್ರ್ಯಾಕ್ನಿಂದ ಹೊರಬಂದು ಭರ್ಜರಿ ಕಾರ್‌ ರೇಸಿಂಗ್‌ ಇರುವ ಸಿನಿಮಾ ಮಾಡಿದ್ದಾರೆ ಎಂಬ ಮಾತುಗಳು ಸೋಷಿಯಲ್‌ ಮೀಡಿಯಾದಲ್ಲಿ ಹರಿದಾಡಿತ್ತು. ಈ ಹಿಂದೆ ಒಂದು ರೊಮ್ಯಾಂಟಿಕ್‌ ಹಾಡನ್ನು ಚಿತ್ರೀಕರಣ ಮಾಡಿದ್ದ ಭಟ್ಟರು ಈಗ ಜಾಲಿ ಹಾಡನ್ನು ಶೂಟ್‌ ಮಾಡುತ್ತಿದ್ದಾರೆ.