ಮತ್ತೆ ಚರ್ಚೆಗೆ ಬಂತು ತ್ರಿಷಾ-ರಾಣಾ ಲವ್‌ಸ್ಟೋರಿ! ಮಾಜಿ ಲವರ್‌ಗೆ ಸೂಚ್ಯವಾಗಿ ಸಂದೇಶ ರವಾನಿಸಿದ ನಟಿ

ಇಂಟೀರಿಯರ್‌ ಡಿಸೈನರ್‌ ಮಿಹೀಕಾ ಬಜಾಜ್‌ ಜೊತೆ ರಾಣಾ ದಗ್ಗುಬಾಟಿ ನಿಶ್ಚಿತಾರ್ಥ ಇತ್ತೀಚೆಗಷ್ಟೇ ನಡೆಯಿತು. ಡಿಸೆಂಬರ್‌ನಲ್ಲಿ ಮದುವೆ ನಡೆಯುವ ಸಾಧ್ಯತೆ ಇದೆ ಎಂದು ರಾಣಾ ತಂದೆ ಸುರೇಶ್ ಬಾಬು ಹೇಳಿದ್ದಾರೆ. ಅಷ್ಟರಲ್ಲಾಗಲೇ ರಾಣಾ ದಗ್ಗುಬಾಟಿಯ ಮಾಜಿ ಗರ್ಲ್‌ ಫ್ರೆಂಡ್‌ ತ್ರಿಷಾ ಹೊಸ ಟ್ವಿಸ್ಟ್‌ ನೀಡಿದ್ದಾರೆ.

ತ್ರಿಷಾ ಕೃಷ್ಣನ್‌ ಮತ್ತು ರಾಣಾ ನಡುವೆ ಪ್ರೀತಿ ಚಿಗುರೊಡೆದಿತ್ತು ಎಂಬ ಗುಸಗುಸು ಟಾಲಿವುಡ್‌ ಅಂಗಳದಲ್ಲಿ ಕೆಲವು ವರ್ಷಗಳ ಹಿಂದೆ ಕೇಳಿಬಂದಿತ್ತು. ಅಷ್ಟೇ ಅಲ್ಲದೆ, 'ಕಾಫಿ ವಿತ್‌ ಕರಣ್‌' ಶೋನಲ್ಲಿ ಭಾಗವಹಿಸಿದ್ದ ರಾಣಾ ಈ ವಿಚಾರವನ್ನು ಒಪ್ಪಿಕೊಂಡಿದ್ದರು ಕೂಡ. 'ನಾನು ಮತ್ತು ತ್ರಿಷಾ ಒಳ್ಳೆಯ ಫ್ರೆಂಡ್ಸ್‌. ತುಂಬ ದಿನಗಳಿಂದ ಡೇಟಿಂಗ್‌ ಕೂಡ ಮಾಡುತ್ತಿದ್ದೆವು. ಆದರೆ ನಮ್ಮ ನಡುವೆ ಸಾಮರಸ್ಯ ಬೆಳೆಯಲಿಲ್ಲ' ಎಂಬ ಅರ್ಥದಲ್ಲಿ ಅವರು ಹೇಳಿಕೆ ನೀಡಿದ್ದರು.

ಈಗ ಮಿಹೀಕಾ ಬಜಾಜ್‌ ಜೊತೆ ರಾಣಾ ಎಂಗೇಜ್‌ಮೆಂಟ್‌ ಆದ ಕೆಲವೇ ದಿನಗಳ ಬಳಿಕ ತ್ರಿಷಾ ಇನ್‌ಸ್ಟಾಗ್ರಾಮ್‌ನಲ್ಲಿ ಒಂದು ಪೋಸ್ಟ್‌ ಹಾಕಿದ್ದರು. 'ತಮ್ಮ ಹಳೇ ಪ್ರೇಯಸಿ ಈಗಲೂ ಆಪ್ತ ಸ್ನೇಹಿತೆಯಾಗಿ ಇರಬೇಕು ಎಂದು ಬಯಸುವವರು ಒಂದು ರೀತಿಯ ಸೈಕೋಪಾತ್‌ಗಳಿದ್ದಂತೆ' ಎಂದು ತ್ರಿಷಾ ಪೋಸ್ಟ್‌ ಮಾಡಿದರು. ಅದು ರಾಣಾ ಅವರಿಗೆ ಮುಟ್ಟಲಿ ಎಂಬುದೇ ತ್ರಿಷಾ ಉದ್ದೇಶ ಆಗಿತ್ತು ಎಂದು ಅನೇಕರು ಅಭಿಪ್ರಾಯಪಟ್ಟಿದ್ದಾರೆ.

also read: ಮದುವೆ ಕನಸು ಕಾಣುತ್ತಿರುವ ರಾಣಾ ದಗ್ಗುಬಾಟಿಗೆ ಶಾಕ್‌ ಕೊಟ್ಟ ಶ್ರೀರೆಡ್ಡಿ ಫೇಸ್‌ಬುಕ್‌ ಪೋಸ್ಟ್‌!

ಈ ಬಗ್ಗೆ ಸೋಶಿಯಲ್‌ ಮೀಡಿಯಾದಲ್ಲಿ ಚರ್ಚೆ ಆರಂಭ ಆಗಿದೆ. ರಾಣಾ-ತ್ರಿಷಾ ಹಳೇ ಲವ್‌ಸ್ಟೋರಿ ಬಗ್ಗೆ ಜನರು ಈಗ ಮಾತನಾಡಲು ಆರಂಭಿಸಿದ್ದಾರೆ. ಅದು ಗೊತ್ತಾಗುತ್ತಿದ್ದಂತೆಯೇ ತ್ರಿಷಾ ಆ ಪೋಸ್ಟ್ ಡಿಲಿಟ್‌ ಮಾಡಿದ್ದಾರೆ. ಪ್ರಸ್ತುತ ಅವರಿಗೆ 37 ವರ್ಷ ವಯಸ್ಸು, ಚಿತ್ರರಂಗಕ್ಕೆ ಕಾಲಿಟ್ಟು 18 ವರ್ಷ ಕಳೆದಿದ್ದರೂ ಇಂದಿಗೂ ಅದೇ ಚಾರ್ಮ್‌ ಉಳಿಸಿಕೊಂಡಿದ್ದಾರೆ. 2018ರಲ್ಲಿ ತೆರೆಕಂಡ '96' ಚಿತ್ರದ ಮೂಲಕ ಅವರಿಗೆ ದೊಡ್ಡ ಹಿಟ್‌ ಸಿಕ್ಕಿತ್ತು. ಈಗಲೂ ಅವರ ಕೈಯಲ್ಲಿ ಹಲವು ಸಿನಿಮಾ ಆಫರ್‌ಗಳಿವೆ.

also read: ಸಮಂತಾ, ತ್ರಿಷಾ ದೇಹದ ಅಂಗಗಳ ಬಗ್ಗೆ ತೀರಾ ಅಸಭ್ಯವಾಗಿ ಕಾಮೆಂಟ್‌ ಮಾಡಿದ ನಟಿ ಶ್ರೀರೆಡ್ಡಿ!