ಅನುಪಮಾ ಗೌಡ ನಟನೆಯ 'ಆ ಕರಾಳ ರಾತ್ರಿ' ತೆಲುಗು ರಿಮೇಕ್‌ನಲ್ಲಿ 'ಆರ್‌ಎಕ್ಸ್ 100' ನಟಿ

2018ರಲ್ಲಿ ತೆರೆಕಂಡ ಸಿನಿಮಾ 'ಆ ಕರಾಳ ರಾತ್ರಿ'. ದಯಾಳ್ ಪದ್ಮನಾಭನ್ ನಿರ್ದೇಶನದ ಈ ಸಿನಿಮಾದಿಂದ ಜೆಕೆ ಮತ್ತು ನಟಿ ಅನುಪಮಾ ಗೌಡಗೆ ಉತ್ತಮ ಬ್ರೇಕ್ ಸಿಕ್ಕಿತ್ತು. ಸಣ್ಣ ಬಜೆಟ್‌ನಲ್ಲಿ ನಿರ್ಮಾಣವಾದ ಈ ಸಿನಿಮಾ ಪ್ರೇಕ್ಷಕರಿಂದ ಒಳ್ಳೆಯ ಪ್ರತಿಕ್ರಿಯೆ ಪಡೆದುಕೊಂಡಿತ್ತು. ಸದ್ಯ ಈ ಸಿನಿಮಾವನ್ನು ತೆಲುಗಿಗೆ ರಿಮೇಕ್ ಮಾಡಲಾಗಿದೆ. ಅನುಪಮಾ ಗೌಡ ಮಾಡಿದ್ದ ಪಾತ್ರವನ್ನು ಅಲ್ಲಿ 'ಆರ್‌ಎಕ್ಸ್ 100' ಖ್ಯಾತಿಯ ಪಾಯಲ್ ರಜಪೂತ್ ಮಾಡಿದ್ದಾರೆ!

'ಅನಗನಗಾ ಓ ಅತಿಥಿ'ಯಾಯ್ತು ಕರಾಳ ರಾತ್ರಿ!
ತೆಲುಗಿನಲ್ಲಿಯೂ ಈ ಸಿನಿಮಾವನ್ನು ನಿರ್ದೇಶನ ಮಾಡಿರುವುದು ಕನ್ಡಡದ ದಯಾಳ್ ಅವರೇ. ಸ್ಯಾಂಡಲ್‌ವುಡ್‌ನಲ್ಲಿ 18 ಸಿನಿಮಾಗಳನ್ನು ಮಾಡಿರುವ ಅವರು, ಇದೇ ಮೊದಲ ಬಾರಿಗೆ ಟಾಲಿವುಡ್‌ನಲ್ಲಿ ಈ ರಿಮೇಕ್ ಸಿನಿಮಾ ಮಾಡಿದ್ದಾರೆ. 'ಆ ಕರಾಳ ರಾತ್ರಿ' ತೆಲುಗು ರಿಮೇಕ್‌ಗೆ 'ಅನಗನಗಾ ಓ ಅತಿಥಿ' ಎಂದು ಹೆಸರು ಇಡಲಾಗಿದೆ. ಅನುಪಮಾ ಗೌಡ ಪಾತ್ರವನ್ನು ಪಾಯಲ್ ರಜಪೂತ್ ಮಾಡಿದ್ದರೆ, ಜೆಕೆ ಪಾತ್ರವನ್ನು ಚೈತನ್ಯ ಕೃಷ್ಣ ಮಾಡಿದ್ದಾರೆ.

ಫಸ್ಟ್‌ಲುಕ್ ರಿಲೀಸ್ ಮಾಡಿದ ವಂಶಿ
ತೆಲುಗಿನ ಜನಪ್ರಿಯ ನಿರ್ದೇಶಕರಾದ ವಂಶಿ ಪೈಡಿಪಲ್ಲಿ 'ಅನಗನಗಾ ಓ ಅತಿಥಿ' ಚಿತ್ರದ ಫಸ್ಟ್ ಲುಕ್ ರಿಲೀಸ್ ಮಾಡಿ, ಚಿತ್ರತಂಡಕ್ಕೆ ಶುಭಕೋರಿದ್ದಾರೆ. ಅಲ್ಲು ಅರ್ಜುನ್ ತಂದೆ, ಜನಪ್ರಿಯ ನಿರ್ಮಾಪಕ ಅಲ್ಲು ಅರವಿಂದ್ ಅವರ ಆಹಾ ಓಟಿಟಿಯಲ್ಲಿ 'ಅನಗನಗಾ ಓ ಅತಿಥಿ' ಸಿನಿಮಾ ನ.13ರಂದು ದೀಪಾವಳಿ ಹಬ್ಬದ ಪ್ರಯುಕ್ತ ಪ್ರಸಾರ ಆರಂಭಿಸಲಿದೆ. ಚಿತ್ರಕ್ಕೆ ರಾಜಾ ರಾಮಮೂರ್ತಿ, ಚಿದಂಬರಂ ನಟೇಶನ್ ಬಂಡವಾಳ ಹೂಡಿದ್ದಾರೆ. ಕನ್ನಡದ ನಟ ನವೀನ್ ಕೃಷ್ಣ ಕೂಡ ಈ ಸಿನಿಮಾಗೆ ಕೆಲಸ ಮಾಡಿದ್ದಾರೆ.

ಕ್ರೈಮ್ ಥ್ರಿಲ್ಲರ್‌ನಲ್ಲಿ ನಟಿಸಲಿದ್ದಾರೆ ಅನುಪಮಾ ಗೌಡ! ಈ ಸಿನಿಮಾದ ಶೀರ್ಷಿಕೆಯೇ ಸಖತ್ ಡಿಫರೆಂಟ್‌!

ಪ್ರಶಸ್ತಿ ಪಡೆದಿದ್ದ ಕರಾಳ ರಾತ್ರಿ
ಈ ಸಿನಿಮಾಕ್ಕೆ 2018ರ ಸಾಲಿನ 'ಅತ್ಯುತ್ತಮ ಚಿತ್ರ ಪ್ರಶಸ್ತಿ' ಸಿಕ್ಕಿತ್ತು. ದಯಾಳ್‌ಗೆ ಅತ್ಯುತ್ತಮ ನಿರ್ದೇಶಕ ಪ್ರಶಸ್ತಿ ಹಾಗೂ ನಟಿ ವೀಣಾ ಸುಂದರ್ ಅವರಿಗೆ ಅತ್ಯುತ್ತಮ ಪೋಷಕ ನಟಿ ಪ್ರಶಸ್ತಿ ಕೂಡ ಲಭಿಸಿತ್ತು. ಉಳಿದಂತೆ ರಂಗಾಯಣ ರಘು, ನವೀನ್ ಕೃಷ್ಣ ಪ್ರಮುಖ ಪಾತ್ರಗಳಲ್ಲಿ ಕಾಣಿಸಿಕೊಂಡಿದ್ದರು. ಕನ್ನಡ ಪ್ರೇಕ್ಷಕರನ್ನು ರಂಜಿಸಿದ ಈ ಕ್ರೈಮ್ ಥ್ರಿಲ್ಲರ್ ಸಿನಿಮಾ, ಈಗ ತೆಲುಗು ಪ್ರೇಕ್ಷಕರನ್ನು ಯಾವ ರೀತಿ ರಂಜಿಸಲಿದೆ ಎಂದು ಕಾದು ನೋಡಬೇಕು.