ಕಿರುತೆರೆ ಲೋಕಕ್ಕೆ ಎಂಟ್ರಿ ನೀಡಲಿದ್ದಾರೆ 'ಡಿ ಬಾಸ್‌' ದರ್ಶನ್‌!!

ಕನ್ನಡದ ಸ್ಟಾರ್ ನಟರೆಲ್ಲ ಒಂದು ರೌಂಡ್‌ ಟಿವಿ ಲೋಕಕ್ಕೆ ಎಂಟ್ರಿ ನೀಡಿ ಬಂದಿದ್ದಾರೆ. ಆದರೆ, ದರ್ಶನ್ ಮಾತ್ರ ಸಣ್ಣ ಪರದೆಯತ್ತ ಮುಖ ಮಾಡಿರಲಿಲ್ಲ. ಕೆಲ ತಿಂಗಳ ಹಿಂದೆ ಟಿವಿ ಜಾಹೀರಾತಿನಲ್ಲಿ ಕಾಣಿಸಿಕೊಂಡಿದ್ದು ಬಿಟ್ಟರೆ, ಮತ್ಯಾವ ರೀತಿಯಲ್ಲೂ ಅವರು ಟಿವಿ ಲೋಕಕ್ಕೆ ಬಂದಿಲ್ಲ. ಆದರೆ, ಲೇಟೆಸ್ಟ್‌ ಬೆಳವಣಿಗೆಯೊಂದರಲ್ಲಿ ಅವರು ಕಿರುತೆರೆಗೆ ಬರುವುದಕ್ಕೆ ತಯಾರಿಗಳು ಆರಂಭಗೊಂಡಿವೆ ಎನ್ನಲಾಗಿದೆ.

ಖಾಸಗಿ ವಾಹಿನಿಯೊಂದರ ಶೋವೊಂದನ್ನು ದರ್ಶನ್ ನಿರೂಪಣೆ ಮಾಡಲಿದ್ದಾರೆ ಎಂಬುದು ಲೇಟೆಸ್ಟ್ ಮಾಹಿತಿ. ಆದರೆ, ಯಾವ ವಾಹಿನಿ? ಯಾವ ಶೋ ಅನ್ನೋದೆಲ್ಲ ಇನ್ನೂ ನಿಗೂಢವಾಗಿದೆ. ಸದ್ಯ ಅವರ ಕೈಯಲ್ಲಿ ಸಾಕಷ್ಟು ಸಿನಿಮಾಗಳಿವೆ. ಇದೆಲ್ಲದರ ಮಧ್ಯೆ ಹೇಗೆ ಸಮಯ ಹೊಂದಾಣಿಕೆ ಮಾಡಿಕೊಳ್ಳಲಿದ್ದಾರೆ ಎಂಬುದು ಸದ್ಯದ ಕುತೂಹಲ.

ಈಗಾಗಲೇ 'ಬಿಗ್ ಬಾಸ್‌' ಮೂಲಕ ಸುದೀಪ್‌, 'ಕನ್ನಡದ ಕೋಟ್ಯಾಧಿಪತಿ' ಮೂಲಕ ಪುನೀತ್ ರಾಜ್‌ಕುಮಾರ್, 'ಸೂಪರ್ ಮಿನಿಟ್‌'ನಲ್ಲಿ ಗಣೇಶ್‌ ಸೇರಿದಂತೆ ಶಿವರಾಜ್‌ಕುಮಾರ್‌, ರವಿಚಂದ್ರನ್‌, ಜಗ್ಗೇಶ್‌, ರಚಿತಾ ರಾಮ್‌, ರಕ್ಷಿತಾ ಪ್ರೇಮ್‌, ವಿಜಯ್ ರಾಘವೇಂದ್ರ, ಸುಮನ್ ರಂಗನಾಥ್‌ ಹೀಗೆ ಅನೇಕರು ಕಿರುತೆರೆ ಶೋಗಳಲ್ಲಿ ಕಾಣಿಸಿಕೊಂಡಿದ್ದಾರೆ.