ಬೆನ್ನು ನೋವಿಗೋಸ್ಕರ ಗಾಂಜಾ ತೆಗೆದುಕೊಂಡಿದ್ದೆ, ಗಾಂಜಾವನ್ನು ಕಾನೂನುಬದ್ಧ ಮಾಡಿ: ರಾಕೇಶ್ ಅಡಿಗ

ಕನ್ನಡ ಚಿತ್ರರಂಗದಲ್ಲಿ ಡ್ರಗ್ ಮಾಫಿಯಾ ಬಗ್ಗೆ ಸಾಕಷ್ಟು ಚರ್ಚೆ ನಡೆಯುತ್ತಿದೆ. ಸಿಸಿಬಿ ಕೂಡ ಇದರ ಬಗ್ಗೆ ತನಿಖೆ ನಡೆಸುತ್ತಿದೆ. ಅದರ ಜೊತೆಗೆ ಕನ್ನಡ ಸಿನಿಮಾದ ಕೆಲ ಕಲಾವಿದರಿಗೆ ಸಿಸಿಬಿಯಿಂದ ನೋಟೀಸ್ ಜಾರಿಯಾಗಿದೆ. ಕೆಲವೇ ದಿನಗಳಲ್ಲಿ ಯಾರು ಡ್ರಗ್ ಮಾಫಿಯಾದಲ್ಲಿ ಭಾಗಿಯಾಗಿದ್ದಾರೆ ಎಂಬುದು ಹೊರಬೀಳಲಿದೆ. ಈ ವಿಚಾರವಾಗಿ 'ಜೋಶ್' ಸಿನಿಮಾ ನಟ ರಾಕೇಶ್ ಮಾಧ್ಯಮದ ಜೊತೆ ಮಾತನಾಡಿದ್ದಾರೆ.

ಡ್ರಗ್ಸ್ ಬೇರೆ, ಗಾಂಜಾ ಬೇರೆ: ರಾಕೇಶ್ ಅಡಿಗ
'ಯುವ ನಟ / ನಿರ್ದೇಶಕ ರಾಕೇಶ್ ಅಡಿಗ ಮಾತನಾಡಿದ್ದು, 'ಸ್ಯಾಂಡಲ್‌ವುಡ್‌ನಲ್ಲಿ ಡ್ರಗ್ ಮಾಫಿಯಾ ಇಲ್ಲ. ಮಾಫಿಯಾ ಎನ್ನುವುದು ತುಂಬ ದೊಡ್ಡ ಪದ. ಆದರೆ ಇದರ ಗ್ರಾಹಕರು ಇರಬಹುದು, ಎಲ್ಲ ಕಡೆ ಇಂತವರು ಇದ್ದಾರೆ. ಡ್ರಗ್ಸ್ ಮಾರಾಟ ಮಾಡುತ್ತಿದ್ದರೆ ಅದು ಅಪರಾಧ, ಅದನ್ನೇ ಅಪರಾಧ ಎಂದು ಹೇಳುತ್ತೇನೆ. ಡ್ರಗ್ಸ್ ಎಂದರೇನು? ಅದರಲ್ಲಿ ಯಾವ ರೀತಿಯ ವಿಭಾಗಗಳಿವೆ? ಎಂಬುದನ್ನು ತಿಳಿದುಕೊಳ್ಳಬೇಕು. ಗಾಂಜಾ ಬಗ್ಗೆ ನಾವು ಚರ್ಚೆ ಮಾಡಬೇಕು. ಡ್ರಗ್ಸ್ ಬೇರೆ, ಗಾಂಜಾ ಬೇರೆ' ಎಂದು ಹೇಳಿದ್ದಾರೆ.

ಬೆನ್ನು ನೋವಿಗೋಸ್ಕರ ಗಾಂಜಾ ತೆಗೆದುಕೊಂಡೆ: ರಾಕೇಶ್ ಅಡಿಗ
'ಗಾಂಜಾವನ್ನು ಕಾನೂನುಬದ್ಧ ಮಾಡಬೇಕು. ಧೂಮಪಾನ ಕೆಟ್ಟದ್ದು. ಆದರೆ ಗಾಂಜಾನಲ್ಲಿ ಔಷಧೀಯ ಗುಣಗಳಿವೆ ಎಂಬುದು ಹಲವು ವರ್ಷಗಳ ಹಿಂದಿನ ಇತಿಹಾಸದಲ್ಲಿದೆ. ಮಧ್ಯಪಾನ ಕೂಡ ಕೆಟ್ಟದ್ದು. ಮಧ್ಯಪಾನಕ್ಕಿಂತ ಗಾಂಜಾದಲ್ಲಿ ಔಷಧೀಯ ಗುಣಗಳಿವೆ. ಅತಿಯಾದರೆ ಅಮೃತವೂ ವಿಷ. ಗಾಂಜಾವನ್ನು ಕೂಡ ಅತಿಯಾಗಿ ಸೇವಿಸಿದರೆ ಅದು ಕೆಟ್ಟದ್ದೇ. ಗಾಂಜಾದಿಂದ ಮಾಡಿರುವ ಕೇಕ್, ಚಟ್ನಿ, ಪಕೋಡ ತಿಂದಿದೀನಿ. ಗಾಂಜಾದಿಂದ ಮಾಡಿರುವ ಟೀ ಕುಡಿದಿದೀನಿ. ಧೂಮಪಾನ ಮಾಡಿದ್ದೀನಿ. ಯಾವುದನ್ನು ಔಷಧೀಯವಾಗಿ ಎಷ್ಟು ಸೇವಿಸಬೇಕೋ ಅಷ್ಟು ತೆಗೆದುಕೊಂಡಿದ್ದೇನೆ. ಬೆನ್ನು ನೋವಿಗೋಸ್ಕರ ಗಾಂಜಾ ತೆಗೆದುಕೊಂಡೆ. ಇದರಿಂದ ಕಡಿಮೆ ಆಯ್ತು' ಎಂದು ರಾಕೇಶ್ ಅಡಿಗ ಅಭಿಪ್ರಾಯ ಪಟ್ಟಿದ್ದಾರೆ.

ಮಧ್ಯಪಾನ, ತಂಬಾಕು ಬ್ಯಾನ್ ಮಾಡಿ: ರಾಕೇಶ್
'ನಶೆ ಮಾಡೋದು ತಪ್ಪು, ಮಧ್ಯಪಾನ, ತಂಬಾಕು ಬ್ಯಾನ್ ಮಾಡಿ. ಗಾಂಜಾದಿಂದ ರೈತರ ಉದ್ಧಾರ ಸಾಧ್ಯ, ಯಾರು ಗಾಂಜಾವನ್ನು ಕಾನೂನುಬದ್ಧ ಮಾಡಲು ಒತ್ತಾಯಿಸುತ್ತಾರೋ ಅದಕ್ಕೆ ನನ್ನ ಸಹಮತವಿದೆ. ಬೇರೆ ದೇಶದವರು ಈ ವಿಚಾರದಲ್ಲಿ ಮುಂದೆ ಬಂದಿದ್ದಾರೆ. ಆದರೆ ನಾವು ಇನ್ನೂ ಇದರ ಬಗ್ಗೆ ಚರ್ಚೆ ಮಾಡುತ್ತಿದ್ದೇವೆ. ಮಧ್ಯಪಾನ, ವೇಶ್ಯಾವಾಟಿಕೆ ಎಲ್ಲವೂ ತಪ್ಪು. ಗಾಂಜಾ ಕುರಿತಾಗಿ ಜಾಗೃತಿ ಮೂಡಿಸೋಣ. ನಂಬರ್ 1 ದೇಶಗಳು ಗಾಂಜಾದಿಂದ ಔಷಧಿ ರೆಡಿ ಮಾಡಿವೆ' ಎಂದು ರಾಕೇಶ್ ಹೇಳಿದ್ದಾರೆ.

Also Read-ಸ್ಯಾಂಡಲ್‌ವುಡ್‌ನಲ್ಲಿ ಡ್ರಗ್ಸ್: ಪ್ರಶಾಂತ್ ಸಂಬರಗಿ ಚಿತ್ರೋದ್ಯಮಿ ಅಲ್ಲ ಎಂದ ಸಾ ರಾ ಗೋವಿಂದು!

ಡ್ರಗ್ ಮಾಫಿಯಾದಲ್ಲಿ ಗಾಂಜಾ ಸೇರಿಸಲಾಗಿದೆ: ರಾಕೇಶ್
'ಗಾಂಜಾದಿಂದ ಸತ್ತರು, ಆರೋಗ್ಯದಲ್ಲಿ ಸಮಸ್ಯೆ ಆಯ್ತು ಅಂತ ನಾವು ಕೇಳಿ ಇದರ ಬಗ್ಗೆ ತಪ್ಪಾಗಿ ತಿಳಿದುಕೊಳ್ಳುತ್ತಿದ್ದೇವೆ. ಡ್ರಗ್ ಮಾಫಿಯಾದಲ್ಲಿ ಗಾಂಜಾ ಸೇರಿಸಲಾಗಿದೆ. ಆದರೆ ಡ್ರಗ್ಸ್‌ಗೂ ಗಾಂಜಾಗೂ ವ್ಯತ್ಯಾಸವಿದೆ. ಸ್ಯಾಂಡಲ್‌ವುಡ್‌ನಲ್ಲಿ ಕೆಲವರು ಡ್ರಗ್ಸ್ ಸೇವನೆ ಮಾಡ್ತಾರೆ ಅಂತ ಹೇಳೋದನ್ನು ಕೇಳಿದ್ದೇನೆ' ಎಂದು ರಾಕೇಶ್ ಅಡಿಗ ಹೇಳಿದ್ದಾರೆ.

Also Read-ಸ್ಯಾಂಡಲ್‌ವುಡ್‌ನಲ್ಲಿ ಡ್ರಗ್ಸ್: ಪ್ರಶಾಂತ್ ಸಂಬರಗಿ ಚಿತ್ರೋದ್ಯಮಿ ಅಲ್ಲ ಎಂದ ಸಾ ರಾ ಗೋವಿಂದು!