ಕಾಲಿವುಡ್‌ಗೂ ಎಂಟ್ರಿ ಕೊಟ್ರು 'ಡಾಲಿ' ಧನಂಜಯ! ಯಾವ ಸಿನಿಮಾದ ಮೂಲಕ ಗೊತ್ತಾ?

* ಹರೀಶ್‌ ಬಸವರಾಜ್‌
ತಮಿಳಿನ ಖ್ಯಾತ ನಿರ್ದೇಶಕ/ ಛಾಯಾಗ್ರಾಹಕ ವಿಜಯ್‌ ಮಿಲ್ಟನ್‌ ಅವರ ಹೊಸ ಸಿನಿಮಾದಲ್ಲಿ 'ಡಾಲಿ' ಧನಂಜಯ್‌ ನಟಿಸುವ ಸಾಧ್ಯತೆ ಇದೆ. ಈ ಮೂಲಕ ಅವರು ತಮಿಳು ಸಿನಿಮಾ ರಂಗಕ್ಕೂ ಕಾಲಿಟ್ಟಿದ್ದಾರೆ. ತಮಿಳಿನಲ್ಲಿಹತ್ತಕ್ಕೂ ಹೆಚ್ಚಿನ ಸಿನಿಮಾಗಳಿಗೆ ಕ್ಯಾಮರಾಮನ್‌ ಆಗಿ ಕೆಲಸ ಮಾಡಿರುವ ವಿಜಯ್ ಮಿಲ್ಟನ್ 'ಅಜಗಜೈ ಇರುಕ್ಕಿರೈ ಬಯಮಣಿ' ಚಿತ್ರದ ಮೂಲಕ ನಿರ್ದೇಶಕರಾದರು. ಆದಾದ ಮೇಲೆ 'ಗೋಲಿ ಸೋಡ' ಚಿತ್ರದ ಮೂಲಕ ಖ್ಯಾತಿ ಗಳಿಸಿದರು. ಈ ಚಿತ್ರ ಕನ್ನಡಕ್ಕೂ ರಿಮೇಕ್‌ ಆಯಿತು. ಈಗ ವಿಜಯ್‌ ಮಿಲ್ಟನ್‌ ಕನ್ನಡದ 'ಪೊಗರು' ಚಿತ್ರಕ್ಕೆ ಕ್ಯಾಮೆರ ಹಿಡಿದಿದ್ದು, ಜತೆಗೆ 'ಪಿಚ್ಚೈಕಾರನ್‌' ಖ್ಯಾತಿಯ ವಿಜಯ್‌ ಆಂಟೋನಿ ಜತೆ ಸಿನಿಮಾ ಮಾಡುತ್ತಿದ್ದಾರೆ. ಆ ಸಿನಿಮಾಗೆ ಡಾಲಿ ಧನಂಜಯ ಮುಖ್ಯ ಪಾತ್ರವೊಂದಕ್ಕೆ ಆಯ್ಕೆಯಾಗಿದ್ದಾರಂತೆ.
ಸ್ಯಾಂಡಲ್‌ವುಡ್‌ನಲ್ಲಿ ಮರುಕಳಿಸಿದ ಖಾಕಿ ಖದರ್‌!
ಈ ಬಗ್ಗೆ ನಿರ್ದೇಶಕರನ್ನು ಕೇಳಿದರೆ 'ಧನಂಜಯ್‌ ಜತೆ 'ಪೊಗರು' ಸಿನಿಮಾದಲ್ಲಿಕೆಲಸ ಮಾಡಿದ್ದೇನೆ. ಅವರೊಳಗೆ ಅದ್ಭುತ ಕಲಾವಿದ ಇದ್ದಾನೆ. ನನ್ನ ನಿರ್ದೇಶನದಲ್ಲಿಅವರು ನಟಿಸುವ ಬಗ್ಗೆ ನಾವಿಬ್ಬರೂ ಈಗಾಗಲೇ ಮಾತುಕತೆ ನಡೆಸಿದ್ದೇವೆ. ಅದರ ಬಗ್ಗೆ ಸದ್ಯದಲ್ಲೇ ಅನೌನ್ಸ್‌ ಮಾಡುತ್ತೇವೆ' ಎನ್ನುತ್ತಾರೆ ವಿಜಯ್‌. ಕನ್ನಡದ ನಟನೊಬ್ಬನ ಆಯ್ಕೆ ಹಿಂದೆ ಅದರದ್ದೇ ಆದ ಕಾರಣವಿದೆ ಎನ್ನುವ ಅವರು, ಸದ್ಯಕ್ಕೆ ಅದರ ಬಗ್ಗೆ ಏನನ್ನು ನಾನು ಮಾತನಾಡುವುದಿಲ್ಲ ಎನ್ನುತ್ತಾರೆ. 'ವಿಜಯ್‌ ಮಿಲ್ಟನ್‌ ನಾನು ನಟಿಸಿರುವ 'ಪೊಗರು' ಚಿತ್ರದ ಸಿನಿಮಾಟೋಗ್ರಾಫರ್‌. ಈ ಸಂದರ್ಭದಲ್ಲಿಒಟ್ಟಿಗೆ ಕೆಲಸ ಮಾಡೋಣ ಅಂತ ಹೇಳಿದ್ದರು. ಸದ್ಯಕ್ಕೆ ಮಾತುಕತೆ ಆಗಿದೆ ಮುಂದಿನ ವಿಚಾರವನ್ನು ಚಿತ್ರತಂಡವೇ ಹೇಳಲಿದೆ. ನಾನು ನನ್ನ ಬಡವ ರಾಸ್ಕಲ್‌ ಸಿನಿಮಾದ ಚಿತ್ರೀಕರಣದಲ್ಲಿ ಬ್ಯುಸಿ ಇದ್ದೇನೆ' ಎಂದಿದ್ದಾರೆ ಧನಂಜಯ್‌.
ಅಣ್ಣಾಮಲೈ ಪ್ರೇರಿತ ಎಸಿಪಿ ಪಾತ್ರದಲ್ಲಿ ಧನಂಜಯ್ ಸಖತ್ ಲುಕ್!
ಈಗಾಗಲೇ ತೆಲುಗಿನಲ್ಲಿ ರಾಮ್‌ ಗೋಪಾಲ್‌ ವರ್ಮಾ ಬ್ಯಾನರ್‌ನ ಚಿತ್ರವೊಂದರಲ್ಲಿ ಧನಂಜಯ ನಟಿಸಿದ್ದರು. ಆ ಸಿನಿಮಾ ತಮಿಳಿಗೂ ಡಬ್‌ ಆಗಿತ್ತು. ಹೀಗಾಗಿ ತಮಿಳು ಚಿತ್ರರಂಗಕ್ಕೆ ಧನಂಜಯ ಅವರ ಪರಿಚಯ ಕೂಡ ಇದೆ. ಸದ್ಯ ಯುವರತ್ನ, ಪೊಗರು ಸಿನಿಮಾದಲ್ಲಿ ನೆಗೆಟಿವ್‌ ಶೇಡ್‌ ಇರುವ ಪಾತ್ರಗಳಲ್ಲಿ ನಟಿಸುತ್ತಿರುವ ಅವರು 'ಸಲಗ'ದಲ್ಲಿ ಖಡಕ್‌ ಪೊಲೀಸ್‌ ಅಧಿಕಾರಿಯಾಗಿದ್ದಾರೆ. ಇದರ ಜತೆಯಲ್ಲಿ ತಮ್ಮದೇ ನಿರ್ಮಾಣ ಸಂಸ್ಥೆಯಲ್ಲಿ ತಯಾರಾಗುತ್ತಿರುವ 'ಬಡವ ರಾಸ್ಕಲ್‌'ನಲ್ಲಿ ಮಧ್ಯಮ ವರ್ಗದ ಹುಡುಗನ ಪಾತ್ರದಲ್ಲಿ ಕಾಣಿಸಿಕೊಳ್ಳುತ್ತಿದ್ದಾರೆ. ಜತೆಗೆ ಹತ್ತಾರು ಕಥೆಗಳನ್ನು ಅವರು ಕೇಳುತ್ತಿದ್ದಾರೆ. ಈಗ ತಮಿಳಿನ ಖ್ಯಾತ ನಿರ್ದೇಶಕ ಮತ್ತ ನಟನ ಸಿನಿಮಾದಲ್ಲಿ ಒಳ್ಳೆಯ ಪಾತ್ರದ ಮೂಲಕ ಕಾಲಿವುಡ್‌ಗೂ ಕಾಲಿಡುವ ಸಾಧ್ಯತೆ ಇದೆ. ಹಾಗಾಗಿ ಧನಂಜಯ ಈಗ ತ್ರಿಭಾಷಾ ನಟರಾಗಿದ್ದಾರೆ.
-------------------------------
ವಿಜಯ್‌ ಮಿಲ್ಟನ್‌ ಅವರ ಸಿನಿಮಾ ಬಗ್ಗೆ ಅವರೇ ಮಾಹಿತಿ ನೀಡುತ್ತಾರೆ. ಒಳ್ಳೆಯ ಪಾತ್ರ ಸಿಕ್ಕರೆ ನಾನು ಯಾವುದೇ ಚಿತ್ರರಂಗದಲ್ಲಿಕೆಲಸ ಮಾಡಲು ರೆಡಿ.
* ಧನಂಜಯ, ನಟ
-------------------------------
ಸದ್ಯ ಆ ಪ್ರಾಜೆಕ್ಟ್ ಬಗ್ಗೆ ಏನು ಹೇಳುವುದಿಲ್ಲ. ಆದರೆ ಧನಂಜಯ ಅವರು ನಮ್ಮ ಟೀಮ್‌ನಲ್ಲಿರುತ್ತಾರೆ. ಈ ಬಗ್ಗೆ ನಮ್ಮ ನಿರ್ಮಾಣ ಸಂಸ್ಥೆ ಅಧಿಕೃತವಾಗಿ ಅನೌನ್ಸ್‌ ಮಾಡುತ್ತದೆ.
* ವಿಜಯ್‌ ಮಿಲ್ಟನ್‌, ನಿರ್ದೇಶಕ