ಯಾರು ಆ ಕಿಡಿಗೇಡಿ?
ಆಶಿಕಾ ಕೆನ್ನೆಗೆ ಕಿಡಿಗೇಡಿಯೊಬ್ಬ ಬಲವಂತವಾಗಿ ಕಿಸ್‌ ಮಾಡಿದ ಘಟನೆಯ ವಿಡಿಯೋ ವೈರಲ್‌ ಆಗುತ್ತಿದ್ದಂತೆಯೇ ಅಭಿಮಾನಿಗಳ ವಲಯದಲ್ಲಿ ಚರ್ಚೆ ಶುರುವಾಯಿತು. ಈ ಘಟನೆ ನಡೆದಿದ್ದು ಎಲ್ಲಿ? ಆ ವ್ಯಕ್ತಿ ಯಾರು? ಸುತ್ತಮುತ್ತಲೂ ಹಲವಾರು ಜನರು ಇರುವಾಗ ಅವನಿಗೆ ಅಷ್ಟು ಧೈರ್ಯ ಹೇಗೆ ಬಂತು? ನಂತರ ಆ ಕಿಡಿಗೇಡಿಗೆ ಏನಾದರೂ ಶಿಕ್ಷೆ ಕೊಡಲಾಯಿತೋ ಇಲ್ಲವೋ ಎಂಬ ಬಗ್ಗೆ ಸಾಮಾಜಿಕ ಜಾಲತಾಣದಲ್ಲಿ ಎಲ್ಲರೂ ಮಾತನಾಡಿಕೊಳ್ಳಲಾರಂಭಿಸಿದರು. ಅಸಲಿ ವಿಷಯ ಏನೆಂದರೆ, ಅದು ನಿಜವಾಗಿ ನಡೆದ ಘಟನೆಯೇ ಅಲ್ಲ! ಪ್ರಸ್ತುತ ಆಶಿಕಾ ರಂಗನಾಥ್ ನಟಿಸುತ್ತಿರುವ 'ರೇಮೋ' ಸಿನಿಮಾದ ಶೂಟಿಂಗ್‌. ಆದರೆ ವಿಡಿಯೋ ವೈರಲ್‌ ಆಗಿದ್ದು ಮಾತ್ರ ವಿಪರ್ಯಾಸ.
'ರೇಮೋ' ಸಿನಿಮಾದ ದೃಶ್ಯ
ಪವನ್‌ ಒಡೆಯರ್‌ ನಿರ್ದೇಶನ ಮಾಡುತ್ತಿರುವ 'ರೇಮೋ' ಸಿನಿಮಾದಲ್ಲಿ ಆಶಿಕಾ ರಂಗನಾಥ್ ನಾಯಕಿಯಾಗಿ ನಟಿಸುತ್ತಿದ್ದಾರೆ. ಅವರಿಗೆ 'ರೋಗ್‌' ಖ್ಯಾತಿಯ ಇಶಾನ್‌ ಜೋಡಿ. ಬೆಂಗಳೂರಿನ ಹಲವು ಲೊಕೇಷನ್‌ಗಳಲ್ಲಿ ಶೂಟಿಂಗ್‌ ನಡೆಯುತ್ತಿದೆ. ಇತ್ತೀಚೆಗೆ ಒಂದು ಫೈಟಿಂಗ್‌ ದೃಶ್ಯವನ್ನು ಚಿತ್ರೀಕರಿಸಲಾಯಿತು. ಆ ದೃಶ್ಯಕ್ಕೂ ಮೊದಲು ಬರುವ ಸನ್ನಿವೇಶದಲ್ಲಿ ಕಿಡಿಗೇಡಿಯೊಬ್ಬ ನಾಯಕಿ ಕೆನ್ನೆಗೆ ಬಲವಂತವಾಗಿ ಕಿಸ್‌ ಮಾಡುತ್ತಾನೆ. ಇದರ ಚಿತ್ರೀಕರಣದ ವೇಳೆ ಸೆಟ್‌ನಲ್ಲಿ ಇದ್ದ ಯಾರೋ ಒಬ್ಬರು ವಿಡಿಯೋ ರೆಕಾರ್ಡ್‌ ಮಾಡಿಕೊಂಡು ಸಾಮಾಜಿಕ ಜಾಲತಾಣದಲ್ಲಿ ಹರಿಬಿಟ್ಟಿದ್ದಾರೆ. ಅದರ ಹಿಂದಿನ ಸತ್ಯ ಏನು ಎಂಬುದು ಗೊತ್ತಾಗುವ ಮೊದಲೇ ಆ ವಿಡಿಯೋ ವೈರಲ್‌ ಆಗಿದೆ.
ಆಶಿಕಾ ರಂಗನಾಥ್ ಸಿನಿಮಾಕ್ಕೆ ಬಂದ್ರು ಬಹುಭಾಷಾ ನಟ ; ಅವರಾರು ಗೊತ್ತೇ?
'ನಿಜವಾಗಿದ್ದರೆ ನಾನು ಸುಮ್ಮನೆ ಇರುತ್ತಿರಲಿಲ್ಲ'
'ಈ ವಿಡಿಯೋ ವೈರಲ್‌ ಆದ ಬಳಿಕ ನನಗೆ ಹಲವಾರು ಫೋನ್‌ ಕರೆಗಳು ಬಂದವು. ಒಂದು ವೇಳೆ ಈ ಘಟನೆ ನಿಜವಾಗಿಯೂ ನಡೆದಿದ್ದರೆ ನಾನು ಸುಮ್ಮನೆ ಇರುತ್ತಿರಲಿಲ್ಲ. ನನ್ನ ಜೊತೆ ಯಾರಾದರೂ ಅತಿರೇಕದಿಂದ ವರ್ತಿಸಿದರೆ ಅವರನ್ನು ಸುಮ್ಮನೆ ಬಿಡುವುದಿಲ್ಲ. ಈ ರೀತಿಯ ಘಟನೆ ನಡೆದಾಗ ಹೆಣ್ಣುಮಕ್ಕಳು ಎದ್ದುನಿಂತು ವಿರೋಧಿಸಬೇಕು' ಎಂದು ಆಶಿಕಾ ರಂಗನಾಥ್ ಹೇಳಿಕೆ ನೀಡಿದ್ದಾರೆ. ಅವರ ಈ ಸ್ಪಷ್ಟನೆ ಬಳಿಕ ಅಭಿಮಾನಿಗಳು ಸಮಾಧಾನ ಪಟ್ಟುಕೊಂಡಿದ್ದಾರೆ. ಅಂದಹಾಗೆ, ಈ ರೀತಿ ಚಿತ್ರೀಕರಣದ ವೇಳೆ ವಿಡಿಯೋ ಮಾಡಿ ಹರಿಬಿಡುವುದು ಇದೇ ಮೊದಲೇನಲ್ಲ. ಹಾಲಿವುಡ್‌ನಿಂದ ಸ್ಯಾಂಡಲ್‌ವುಡ್‌ವರೆಗೆ ಅನೇಕ ಸಿನಿಮಾ ತಂಡಗಳು ಇಂಥ ಕಿರಿಕಿರಿ ಅನುಭವಿಸಿವೆ.