Sai Pallavi: ಹೊಸ ಸಿನಿಮಾಗಾಗಿ ದುಬಾರಿ ಸಂಭಾವನೆ ಪಡೆದ ನಟಿ ಸಾಯಿ ಪಲ್ಲವಿ!

ನಟಿ ಸಾಯಿ ಪಲ್ಲವಿಗೆ ಮಲಯಾಳಂ, ತಮಿಳಿಗಿಂತ ತೆಲುಗು ಚಿತ್ರರಂಗದಲ್ಲಿ ಸಿಕ್ಕಾಪಟ್ಟೆ ಬೇಡಿಕೆ ಇದೆ. ಮೂಲತಃ ತಮಿಳು ನಟಿಯಾದರೂ, ಅವರಿಗೆ ಬೇಡಿಕೆ ಸಿಕ್ಕಿದ್ದು ಮಲಯಾಳಂನ 'ಪ್ರೇಮಂ' ಸಿನಿಮಾದಿಂದ. ಆನಂತರ ಹಿಂತಿರುಗಿ ನೋಡುವ ಪ್ರಶ್ನೆಯೇ ಬರಲಿಲ್ಲ. ಸದ್ಯ ಅವರು ಟಾಲಿವುಡ್‌ನ ಬೇಡಿಕೆಯ ನಟಿಯಾಗಿದ್ದು, ಹೊಸ ತೆಲುಗು ಸಿನಿಮಾವೊಂದಕ್ಕಾಗಿ ಅವರು ಪಡೆಯುತ್ತಿರುವ ಸಂಭಾವನೆ ಎಲ್ಲರಿಗೂ ಅಚ್ಚರಿ ತಂದಿದೆ!

ನಾನಿ ಸಿನಿಮಾಗಾಗಿ 2 ಕೋಟಿ ರೂ. ಸಂಭಾವನೆ
ನಟ ನಾನಿ ಈಗ 'ಶ್ಯಾಮ್‌ ಸಿಂಗ್ ರಾಯ್‌' ಅನ್ನೋ ಸಿನಿಮಾ ಒಪ್ಪಿಕೊಂಡಿದ್ದಾರೆ. ಶೀಘ್ರದಲ್ಲೇ ಆ ಸಿನಿಮಾಗೆ ಶೂಟಿಂಗ್ ಆರಂಭಗೊಳ್ಳಲಿದೆ. ಆ ಚಿತ್ರಕ್ಕೆ ನಾಯಕಿಯಾಗಿ ಸಾಯಿ ಪಲ್ಲವಿ ಆಯ್ಕೆಯಾಗಿದ್ದು, ಅದಕ್ಕಾಗಿ ಅವರು ಬರೋಬ್ಬರಿ 2 ಕೋಟಿ ರೂ. ಸಂಭಾವನೆಯಾಗಿ ಪಡೆದುಕೊಂಡಿದ್ದಾರಂತೆ. ಈ ಸಿನಿಮಾ ಮೇಲೆ ನಾನಿ ಸಿಕ್ಕಾಪಟ್ಟೆ ನಿರೀಕ್ಷೆ ಇಟ್ಟುಕೊಂಡಿದ್ದಾರಂತೆ. 'ಶ್ಯಾಮ್‌ ಸಿಂಗ್ ರಾಯ್‌' ಚಿತ್ರದಲ್ಲಿ ಮೂವರು ನಾಯಕಿಯರು ಇರಲಿದ್ದು, ಅದರಲ್ಲಿ ಸಾಯಿ ಪಲ್ಲವಿ ಕೂಡ ಒಬ್ಬರಂತೆ!

ಅದಿತಿ ರಾವ್ ಕೂಡ ನಟಿಸಲಿದ್ದಾರೆ?
ನಟಿ ಅದಿತಿ ರಾವ್ ಹೈದರಿ ಕೂಡ 'ಶ್ಯಾಮ್‌ ಸಿಂಗ್ ರಾಯ್‌'ನಲ್ಲಿ ಮತ್ತೋರ್ವ ನಾಯಕಿಯಾಗಿ ನಟಿಸುವ ಸಾಧ್ಯತೆ ಇದೆಯಂತೆ. ಆದರೆ, ಈ ಬಗ್ಗೆ ಅಧಿಕೃತ ಮಾಹಿತಿ ಇನ್ನಷ್ಟೇ ಹೊರಬೀಳಬೇಕಿದೆ. ಈ ಹಿಂದೆ ವಿಜಯ್ ದೇವರಕೊಂಡಗೆ 'ಟ್ಯಾಕ್ಸಿವಾಲಾ' ಸಿನಿಮಾ ನಿರ್ದೇಶನ ಮಾಡಿದ್ದ ರಾಹುಲ್ ಸಂಕ್ರಿತ್ಯಾನ್ 'ಶ್ಯಾಮ್‌ ಸಿಂಗ್ ರಾಯ್‌' ಚಿತ್ರಕ್ಕೆ ನಿರ್ದೇಶನ ಮಾಡಲಿದ್ದಾರೆ. ಈಚೆಗೆ ಓಟಿಟಿಯಲ್ಲಿ ತೆರೆಕಂಡ 'ವಿ' ಸಿನಿಮಾದಲ್ಲಿ ನಾನಿ ಜೊತೆ ನಾಯಕಿಯಾಗಿ ಅದಿತಿ ರಾವ್ ಹೈದರಿ ನಟಿಸಿದ್ದರು.

ಪರೀಕ್ಷೆ ಬರೆಯಲು ಕಾಲೇಜಿಗೆ ಬಂದ ಸಾಯಿ ಪಲ್ಲವಿ! ಸಿಂಪಲ್‌ ಸುಂದರಿ ಜೊತೆ ಸೆಲ್ಫಿಗೆ ಮುಗಿಬಿದ್ದ ಜನ

ತೆಲುಗಿನಲ್ಲಿ ಸಾಯಿ ಪಲ್ಲವಿ ಬ್ಯುಸಿ
2017ರಲ್ಲಿ ವರುಣ್ ತೇಜ ಜೊತೆಗೆ ಸಾಯಿ ಪಲ್ಲವಿ 'ಫಿದಾ' ಸಿನಿಮಾದಲ್ಲಿ ನಟಿಸಿದ್ದರು. ಆ ಸಿನಿಮಾ ಅವರಿಗೆ ಭಾರಿ ಜನಪ್ರಿಯತೆ ತಂದುಕೊಟ್ಟಿತು. ಅನೇಕ ಪ್ರಶಸ್ತಿಗಳು ಅವರಿಗೆ ಲಭಿಸಿದವು. ಆ ಬಳಿಕ ನಾನಿ ಜೊತೆ 'ಮಿಡಲ್‌ ಕ್ಲಾಸ್ ಅಬ್ಬಾಯಿ' ಸಿನಿಮಾ ಮಾಡಿದರು. ಸದ್ಯ ನಾಗ ಚೈತನ್ಯ ಜೊತೆ 'ಲವ್ ಸ್ಟೋರಿ' ಸಿನಿಮಾ ಮಾಡುತ್ತಿದ್ದಾರೆ. ಲಾಕ್‌ಡೌನ್‌ನಿಂದಾಗಿ ಈ ಸಿನಿಮಾದ ಶೂಟಿಂಗ್ ನಿಲ್ಲಿಸಲಾಗಿತ್ತು. ಈಗ ಪುನಃ ಮತ್ತೆ ಚಿತ್ರೀಕರಣ ಆರಂಭಗೊಂಡಿದೆ. ಶೇಖರ್ ಕಮ್ಮುಲ ಇದರ ನಿರ್ದೇಶಕರು. ಈ ಮಧ್ಯೆ ರಾಣಾ ದಗ್ಗುಬಾಟಿ, ಪ್ರಿಯಾಮಣಿ ಜೊತೆಗೆ 'ವಿರಾಟಪರ್ವಂ' ಸಿನಿಮಾದಲ್ಲೂ ಸಾಯಿ ಪಲ್ಲವಿ ಕಾಣಿಸಿಕೊಂಡಿದ್ದಾರೆ.

ನಾನಿ ನಟನೆಯ 'ಶ್ಯಾಮ್ ಸಿಂಗ್ ರಾಯ್' ಸಿನಿಮಾ; ರಶ್ಮಿಕಾ ಮಂದಣ್ಣ, ಸಾಯಿ ಪಲ್ಲವಿ ಇಬ್ಬರಲ್ಲಿ ಯಾರು ಹೀರೋಯಿನ್?