ಸೋನು ಗೌಡ ಹೇಳಿದ ಖಡಕ್‌ ಮಾತು
'ಇಂತಿ ನಿನ್ನ ಪ್ರೀತಿಯ', 'ಗುಳ್ಟು' ಮುಂತಾದ ಸಿನಿಮಾಗಳ ಮೂಲಕ ಜನಪ್ರಿಯತೆ ಪಡೆದ ನಟಿ ಸೋನು ಗೌಡ, ಈಗಲೂ ಬೇಡಿಕೆ ಉಳಿಸಿಕೊಂಡಿದ್ದಾರೆ. ರಂಗಭೂಮಿ ಹಿನ್ನೆಲೆಯಿಂದ ಬಂದ ಈ ಕಲಾವಿದೆ ಕೇವಲ ನಟನೆ ಮಾತ್ರವಲ್ಲದೆ, ಹಲವು ವಿಚಾರಗಳಲ್ಲಿ ಸಕ್ರಿಯವಾಗಿದ್ದಾರೆ. ಸಮಾಜದಲ್ಲಿ ನಡೆಯುವ ಕೆಲವು ಸಂಗತಿಗಳ ಬಗ್ಗೆ ಅವರು ಆಗಾಗ ಪ್ರತಿಕ್ರಿಯಿಸುತ್ತಾರೆ. ತಮ್ಮ ಅಭಿಪ್ರಾಯವನ್ನು ಧೈರ್ಯವಾಗಿ ವ್ಯಕ್ತ ಪಡಿಸುತ್ತಾರೆ. ಈಗ ಹೋಳಿ ಹಬ್ಬದ ಇನ್ನೊಂದು ಮುಖದ ಬಗ್ಗೆ ಅವರು ಮಾತನಾಡಿದ್ದಾರೆ. 'ಎಲ್ಲರೂ ಸೇರಿ ಆಚರಿಸುವ ಈ ಹಬ್ಬ ಒಗ್ಗಟ್ಟಿನ ಸಂಕೇತ. ಆದರೆ ಇದನ್ನು ಕೆಲವೊಮ್ಮೆ ಕಿಡಿಗೇಡಿಗಳು ದುರುಪಯೋಗ ಮಾಡಿಕೊಳ್ಳುತ್ತಾರೆ. ಒಪ್ಪಿಗೆ ಇಲ್ಲದೆ ಹೀಗೆ ಮುಟ್ಟುವುದು ಕೇವಲ ಚರ್ಮಕ್ಕೆ ಸಂಬಂಧಿಸಿದ್ದಲ್ಲ. ಅದು ಮನಸ್ಸಿನ ಮೇಲೂ ಪರಿಣಾಮ ಬೀರುತ್ತದೆ. ಹಾಗಾಗಿ ಈ ಬಾರಿ ಹೋಳಿ ಹಬ್ಬವನ್ನು ಒಳ್ಳೆಯ ಉದ್ದೇಶದಿಂದ ಆಚರಿಸಿ, ಎಲ್ಲರ ಹಕ್ಕನ್ನು ಗೌರವಿಸಿ' ಎಂದು ಸೋನು ಗೌಡ ಸಾಮಾಜಿಕ ಜಾಲತಾಣದಲ್ಲಿ ಬರೆದುಕೊಂಡಿದ್ದಾರೆ.
'ಯುವರತ್ನ' ಚಿತ್ರದಲ್ಲಿನ ತಮ್ಮ ಪಾತ್ರದ ಬಗ್ಗೆ ನಟಿ ಸೋನು ಗೌಡ ಹೇಳಿದ್ದೇನು?
ಅಕ್ಕನಿಗೆ ಸಾಥ್‌ ನೀಡಿದ ನೇಹಾ ಗೌಡ
ಸೋನು ಗೌಡ ರೀತಿಯೇ ಅವರ ತಂಗಿ ನೇಹಾ ಗೌಡ ಸಹ ಬರೆದುಕೊಂಡಿದ್ದಾರೆ. 'ಲಕ್ಷ್ಮೀ ಬಾರಮ್ಮ', 'ಮೂರು ಗಂಟು' ಮುಂತಾದ ಧಾರಾವಾಹಿಗಳಿಂದ ಮನೆ ಮಾತಾಗಿರುವ ಅವರು ಅಕ್ಕನ ಮಾತುಗಳಿಗೆ ಧ್ವನಿ ಗೂಡಿಸಿದ್ದಾರೆ. ಅಚ್ಚರಿ ಎಂದರೆ ಇಬ್ಬರೂ ಈ ವಿಚಾರವನ್ನು ಹೇಳಲು ಆಯ್ಕೆ ಮಾಡಿಕೊಂಡಿರುವುದು ಫೋಟೋಶೂಟ್‌ ಮಾರ್ಗವನ್ನು. ಹೋಳಿ ಥೀಮ್‌ನಲ್ಲಿ ಫೋಟೋಗಳು ಮೂಡಿಬಂದಿವೆ. ಅದರ ಮೂಲಕ ಈ ಸಂದೇಶ ರವಾನಿಸಿದ್ದಾರೆ. ಹತ್ತಾರು ಬಣ್ಣಗಳ ನಡುವೆ ಇರುವ ಯುವತಿಯ ಮುಖ, ಅವಳನ್ನು ಸ್ಪರ್ಶಿಸುತ್ತಿರುವ ಹಲವು ಕೈಗಳು, ಕೆಟ್ಟ ಸ್ಪರ್ಶಕ್ಕೆ ನಲುಗಿರುವ ಯುವತಿಯ ಮುಖದಲ್ಲಿಆತಂಕ ಮತ್ತು ಕಣ್ಣೀರು ಈ ಫೋಟೋದಲ್ಲಿ ಹೈಲೈಟ್‌ ಆಗಿವೆ. ಈ ಪ್ರಯತ್ನಕ್ಕೆ ಎಲ್ಲರಿಂದ ಮೆಚ್ಚುಗೆ ವ್ಯಕ್ತ ಆಗಿದೆ.
'ಲಕ್ಷ್ಮೀ ಬಾರಮ್ಮ' ಧಾರಾವಾಹಿಯ ಗೊಂಬೆ ನೇಹಾ ಗೌಡ ಕೊಟ್ರು ಗುಡ್ ನ್ಯೂಸ್ !
ಸಹೋದರಿಯರ ಪ್ರಯತ್ನಕ್ಕೆ ಮೆಚ್ಚುಗೆ
ಈ ಫೋಟೋಶೂಟ್‌ಗೆ ನೆಟ್ಟಿಗರು ಮೆಚ್ಚುಗೆ ಸೂಚಿಸಿದ್ದಾರೆ. ಜನರಲ್ಲಿ ಜಾಗೃತಿ ಮೂಡಿಸಲು ಪ್ರಯತ್ನಿಸಿರುವುದಕ್ಕೆ ಅಭಿಮಾನಿಗಳು ಧನ್ಯವಾದ ತಿಳಿಸಿದ್ದಾರೆ. 'ಸಾವಿರ ಪದಗಳಿಗಿಂತಲೂ ಈ ಫೋಟೋಗಳು ಹೆಚ್ಚು ಸಮರ್ಥವಾಗಿ ಮಾತನಾಡುತ್ತಿವೆ. ಈ ಕಾನ್ಸೆಪ್ಟ್‌ ತುಂಬ ಚೆನ್ನಾಗಿ ಇದೆ' ಎಂದು ಕೆಲವರು ಕಾಮೆಂಟ್‌ ಮಾಡಿದ್ದಾರೆ. 'ಫೇಸ್‌ಬುಕ್‌ನಲ್ಲಿಯೂ ಕೆಲವು ವಿಡಿಯೋ ಹರಿದಾಡುತ್ತಿವೆ. ಜಸ್ಟ್‌ ಫಾರ್‌ ಫನ್‌ ಎಂಬ ನೆಪದಲ್ಲಿ ಯುವತಿಯರಿಗೆ ಕಿರುಕುಳ ನೀಡಲಾಗುತ್ತಿದೆ. ಬೇರೆಯವರಿಗೆ ಇದು ಫನ್‌ ಎನಿಸಬಹುದು. ಆದರೆ ಕಿರುಕುಳಕ್ಕೆ ಒಳಗಾದವರಿಗೆ ಇದು ಹಿಂಸೆ ನೀಡುತ್ತದೆ' ಎಂಬ ಅಭಿಪ್ರಾಯವನ್ನೂ ಜನರು ಕಾಮೆಂಟ್‌ ಮೂಲಕ ಹಂಚಿಕೊಂಡಿದ್ದಾರೆ. ಇದರ ಜೊತೆಗೆ 'ನಾವು ನಿಮ್ಮನ್ನು ಮಿಸ್‌ ಮಾಡಿಕೊಳ್ಳುತ್ತಿದ್ದೇವೆ. ದಯವಿಟ್ಟು ಮತ್ತೆ ಸೀರಿಯಲ್‌ಗೆ ಬನ್ನಿ' ಎಂದು ನೇಹಾ ಗೌಡ ಅಭಿಮಾನಿಗಳು ತಮ್ಮ ಮನದ ಆಸೆ ವ್ಯಕ್ತಪಡಿಸಿದ್ದಾರೆ.