ನಟ ಪ್ರಭಾಸ್‌ಗೆ ಇರುವ ಅಡ್ಡ ಹೆಸರನ್ನು ಬಹಿರಂಗಪಡಿಸಿದ ಅನುಷ್ಕಾ ಶೆಟ್ಟಿ!

ಟಾಲಿವುಡ್‌ನಲ್ಲಿ ನಟ ಪ್ರಭಾಸ್‌ಗೆ ಬೆಸ್ಟ್ ಫ್ರೆಂಡ್ ಯಾರು ಎಂದರೆ, ಅದರಲ್ಲಿ ನಟಿ ಅನುಷ್ಕಾ ಶೆಟ್ಟಿ ಹೆಸರು ಇರಲೇಬೇಕು. ಯಾಕೆಂದರೆ, ಅವರಿಬ್ಬರ ಮಧ್ಯೆ ಅಂಥದ್ದೊಂದು ಸ್ನೇಹ ಸಂಬಂಧವಿದೆ. ಅಂದಹಾಗೆ, ಇಂದು (ಅ.23) 'ಡಾರ್ಲಿಂಗ್' ಪ್ರಭಾಸ್‌ಗೆ ಜನ್ಮದಿನದ ಸಂಭ್ರಮ. ಹಾಗಾಗಿ, ಅನುಷ್ಕಾ ಶೆಟ್ಟಿ, ಮಿಸ್ ಮಾಡದೇ ಪ್ರಭಾಸ್‌ಗೆ ಜನ್ಮದಿನದ ಶುಭಾಶಯವನ್ನು ಕೋರಿದ್ದಾರೆ. ಹಾಗೇ ವಿಶ್ ಮಾಡುವುದರ ಜೊತೆಗೆ ಪ್ರಭಾಸ್‌ಗೆ ಅವರು ಇಟ್ಟಿರುವ ನಿಕ್ ನೇಮ್ ಏನು ಎಂಬುದು ಬಹಿರಂಗಗೊಂಡಿದೆ!

ಪ್ರಭಾಸ್‌ಗೆ 'ಪಪ್ಸು' ಅಂತಾರೆ ಅನುಷ್ಕಾ
ಪ್ರಭಾಸ್‌ ಮತ್ತು ಪೂಜಾ ಹೆಗ್ಡೆ ಅಭಿನಯದ 'ರಾಧೆ ಶ್ಯಾಮ್‌' ಸಿನಿಮಾದ ಮೋಷನ್ ಪೋಸ್ಟರ್ ಅನ್ನು ಹಂಚಿಕೊಂಡಿರುವ ಅನುಷ್ಕಾ, 'ಹ್ಯಾಪಿ ಹ್ಯಾಪಿ ಹ್ಯಾಪಿ ಹ್ಯಾಪಿ ಪಪ್ಸು (Pupsu)... 'ರಾಧೆ ಶ್ಯಾಮ್‌' ಲುಕ್‌ ನನಗೆ ತುಂಬ ಇಷ್ಟವಾಯ್ತು. ಯುವಿ ಕ್ರಿಯೇಷನ್ಸ್, ರಾಧಕೃಷ್ಣ ಕುಮಾರ್, ಪೂಜಾ ಹೆಗ್ಡೆ ಮತ್ತು ಚಿತ್ರತಂಡಕ್ಕೆ ಆಲ್‌ ದ ಬೆಸ್ಟ್' ಎಂದು ಅವರು ಬರೆದುಕೊಂಡಿದ್ದಾರೆ. ಈ ಶುಭಾಶಯದ ಮೂಲಕ ಅನುಷ್ಕಾ, ಪ್ರಭಾಸ್‌ಗೆ ಏನಂತ ಕರೆಯುತ್ತಾರೆ ಅನ್ನೋ ಸತ್ಯ ಬಹಿರಂಗವಾಗಿದೆ. ಆ ಪೋಸ್ಟ್‌ಗೆ 'ನಿಮ್ಮಿಬ್ಬರದು ಒಳ್ಳೆಯ ಜೋಡಿ, ಒಟ್ಟಿಗೆ ಸಿನಿಮಾ ಮಾಡಿ' ಎಂದೆಲ್ಲ ಫ್ಯಾನ್ಸ್ ಕಾಮೆಂಟ್ ಮಾಡಿದ್ದಾರೆ.

ಅನುಷ್ಕಾ ಶೆಟ್ಟಿ-ಪ್ರಭಾಸ್‌ ಜೋಡಿಗೆ ಗಾಸಿಪ್‌ ಕಾಲಂಗಳಲ್ಲಿ ಅದೆಷ್ಟು ಬಾರಿ ಮದುವೆ ಮಾಡಿಸಿದ್ದಾರೋ ಲೆಕ್ಕವೇ ಇಲ್ಲ! ಹಾಗಂತ, ಪ್ರಭಾಸ್ ಮತ್ತು ಅನುಷ್ಕಾ ಈ ಬಗ್ಗೆ ಬೇಸರ ಮಾಡಿಕೊಂಡಿದ್ದಾರಾ? ಖಂಡಿತ ಇಲ್ಲ! ಈಗಲೂ ಇಬ್ಬರು ಅನ್ಯೋನ್ಯತೆಯಿಂದ ಇದ್ದಾರೆ. ಕೆಲ ತಿಂಗಳ ಹಿಂದಷ್ಟೇ ಪ್ರಭಾಸ್‌ ಬಗ್ಗೆ ಒಂದಷ್ಟು ವಿಚಾರಗಳನ್ನು ಅನುಷ್ಕಾ ಹಂಚಿಕೊಂಡಿದ್ದರು. 'ನನಗೆ ಪ್ರಭಾಸ್‌ ಕಳೆದ 15 ವರ್ಷಗಳಿಂದ ಗೊತ್ತು. ಅವರು ನನ್ನ ಬೆಳಗಿನಜಾವದ 3 ಗಂಟೆ ಸ್ನೇಹಿತ. ನಮ್ಮಿಬ್ಬರ ಮಧ್ಯೆ ಅದ್ಭುತವಾದ ಗೆಳೆತನವಿದೆ. ನನ್ನ ಮತ್ತು ಪ್ರಭಾಸ್ ಕುರಿತಂತೆ ಸಾಕಷ್ಟು ವದಂತಿಗಳು ಹಬ್ಬಿದ್ದವು. ನಮ್ಮ ಆನ್‌ಸ್ಕ್ರೀನ್‌ ಕೆಮಿಸ್ಟ್ರೀ ತುಂಬ ಚೆನ್ನಾಗಿತ್ತು' ಎಂದು ಅನುಷ್ಕಾ ಹೇಳಿದ್ದಾರೆ.

ಹಾಗಾದರೆ, 3AM ಫ್ರೆಂಡ್ಸ್‌ ಎಂದರೇನು? ಮನಸ್ಸಿಗೆ ತುಂಬ ಹತ್ತಿರವಾದ ಸ್ನೇಹಿತರು, ಒಬ್ಬರಿಗೊಬ್ಬರು ಡಿಪೆಂಡ್ ಆಗಿರುತ್ತಾರೆ ಎಂದರ್ಥ. ಬೆಳಗಿನಜಾವ ಮೂರು ಗಂಟೆಗೆ ಫೋನ್‌ ಮಾಡಿದರೂ, ಯಾವುದೇ ಬೇಸರವಿಲ್ಲದೆ ಖುಷಿಯಿಂದ ಕರೆ ಸ್ವೀಕರಿಸುವವರು ಎಂದರ್ಥ. ಸದ್ಯ ಅನುಷ್ಕಾ ನಟನೆಯ 'ನಿಶ್ಯಬ್ದಂ' ಸಿನಿಮಾ ಓಟಿಟಿಯಲ್ಲಿ ತೆರೆಕಂಡಿದ್ದು, ಹೊಸ ಸಿನಿಮಾಗಳನ್ನು ಅವರಿನ್ನೂ ಅಧಿಕೃತವಾಗಿ ಘೋಷಣೆ ಮಾಡಿಲ್ಲ. 'ಬಿಲ್ಲಾ', 'ಮಿರ್ಚಿ', 'ಬಾಹುಬಲಿ' ಸಿನಿಮಾಗಳನ್ನು ಮಾಡಿದ ಮೇಲೆ, ಪ್ರಭಾಸ್‌-ಅನುಷ್ಕಾ ಒಟ್ಟಿಗೆ ಯಾವ ಸಿನಿಮಾವನ್ನು ಘೋಷಣೆ ಮಾಡಿಲ್ಲ!