'ಸಿಲ್ಕ್‌ ಸ್ಮಿತಾ' ಬದುಕಿನ ಮೇಲೆ ಸಿದ್ಧವಾಗಲಿದೆ ಸಿನಿಮಾ! ಯಾರು ಮಾಡಲಿದ್ದಾರೆ ಆ ಗ್ಲಾಮರ್ ನಟಿಯ ಪಾತ್ರ?

2011ರಲ್ಲಿ ಬಾಲಿವುಡ್‌ನಲ್ಲಿ ನಟಿ ವಿದ್ಯಾ ಬಾಲನ್ 'ದಿ ಡರ್ಟಿ ಪಿಕ್ಷರ್‌' ಸಿನಿಮಾ ಮಾಡಿದ್ದರು. ಅದು ದಕ್ಷಿಣ ಭಾರತದ ಚಿತ್ರರಂಗದಲ್ಲಿ ಐಟಂ ಸಾಂಗ್ ಮತ್ತುಗ್ಲಾಮರಸ್‌ ಪಾತ್ರಗಳಿಗೆ ಫೇಮಸ್ ಆಗಿದ್ದ ಸಿಲ್ಕ್‌ ಸ್ಮಿತಾ ಬದುಕನ್ನೇ ಆಧರಿಸಿ ಮಾಡಲಾಗಿತ್ತು. ಇದೀಗ ಸಿಲ್ಕ್ ಸ್ಮಿತಾ ಕುರಿತು ಮತ್ತೊಂದು ಬಯೋಪಿಕ್ ಸಿದ್ಧವಾಗುತ್ತಿದೆ. ಅದಕ್ಕೆ 'ಅವಳ್‌ ಅಪ್ಪಾಡಿಧಾನ್' ಎಂದು ಟೈಟಲ್ ಇಡಲಾಗಿದೆ. 'ಕಣ್ಣ ಲಡ್ಡು ತಿನ್ನ ಆಸೈಯಾ' ಸಿನಿಮಾ ಖ್ಯಾತಿಯ ಕೆ.ಎಸ್‌. ಮಣಿಕಂಠನ್‌ ಈ ಬಯೋಪಿಕ್‌ಗೆ ನಿರ್ದೇಶನ ಮಾಡಲಿದ್ದಾರೆ. ಹಾಗಾದರೆ, ಇದರ ಹೀರೋಯಿನ್ ಯಾರು?

ಈ ಬಗ್ಗೆ ಮಾತನಾಡಿರುವ ನಿರ್ದೇಶಕ ಮಣಿಕಂಠನ್‌, 'ಸಿಲ್ಕ್‌ ಅವರ ಕಣ್ಣಿನಲ್ಲಿ ಇದ್ದ ಮಾದಕತೆಯನ್ನು ಮ್ಯಾಚ್‌ ಮಾಡುವಂತಹ ಇನ್ನೋರ್ವ ನಟಿ ಇನ್ನೂ ಸಿಕ್ಕಿಲ್ಲ. ಸದ್ಯ ಈ ಬಯೋಪಿಕ್‌ನಲ್ಲಿ ಅವರ ಪಾತ್ರ ಮಾಡುವುದಕ್ಕೆ ಸೂಕ್ತವಾದ ನಟಿಗಾಗಿ ಹುಡುಕಾಟ ನಡೆಸಿದ್ದೇವೆ' ಎಂದು ಮಾಹಿತಿ ನೀಡುತ್ತಾರೆ. ಚಿತ್ರಾ ಲಕ್ಷ್ಮಣ್, ಮುರಳಿ ಈ ಸಿನಿಮಾಗೆ ಬಂಡವಾಳ ಹೂಡುತ್ತಿದ್ದು, ನವೆಂಬರ್‌ನಲ್ಲಿ ಶೂಟಿಂಗ್ ಶುರು ಮಾಡುವುದಕ್ಕೆ ಪ್ಲ್ಯಾನ್ ಮಾಡಿಕೊಳ್ಳಲಾಗಿದೆ.

ಈ ಸಿನಿಮಾದಲ್ಲಿ ಸಿಲ್ಕ್ ಜೀವನದ ಕೆಲ ವಿಚಾರಗಳನ್ನು ಬಹಳ ಆಳವಾಗಿ ಹೇಳುವ ಪ್ರಯತ್ನ ಮಾಡಲಿದ್ದಾರಂತೆ ನಿರ್ದೇಶಕರು. ಸ್ಮಿತಾ ಮೂಲ ಹೆಸರು ವಿಜಯಲಕ್ಷ್ಮಿ ವಡ್ಲಪಟ್ಟಿ. ಅದು ಬದಲಾಗಿದ್ದೇಗೆ ಸೇರಿದಂತೆ ಅನೇಕ ವಿಚಾರಗಳನ್ನು ಈ ಸಿನಿಮಾದಲ್ಲಿ ನೋಡಬಹುದಂತೆ. 1960ರಲ್ಲಿ ಆಂಧ್ರಪ್ರದೇಶದಲ್ಲಿ ಜನಿಸಿದ ಸಿಲ್ಕ್‌, ತನ್ನ 19ನೇ ವಯಸ್ಸಿಗೆ ಮಲಯಾಳಂ ಚಿತ್ರರಂಗದ ಮೂಲಕ ಬಣ್ಣದ ಲೋಕಕ್ಕೆ ಪ್ರವೇಶ ಮಾಡಿದರು. ಮಲಯಾಳಂ, ತೆಲುಗು, ತಮಿಳು, ಕನ್ನಡ, ಹಿಂದಿ ಭಾಷೆಗಳಲ್ಲಿ ಅವರು ಅನೇಕ ಐಟಂ ಸಾಂಗ್‌ಗಳಲ್ಲಿ ಮಿಂಚಿ, ಖ್ಯಾತಿ ಪಡೆದರು. ಬರೀ ಐಟಂ ಸಾಂಗ್ ಮಾತ್ರವಲ್ಲದೆ, ಗ್ಲಾಮರಸ್‌ ಪಾತ್ರಗಳಲ್ಲೂ ಹೆಚ್ಚು ಕಾಣಿಸಿಕೊಂಡಿದ್ದಾರೆ.

ದಕ್ಷಿಣ ಭಾರತದ ಈ ಖ್ಯಾತ ನಟಿಯರ ಒರಿಜಿನಲ್‌ ಹೆಸರುಗಳೇನು? ಇಲ್ಲಿದೆ ಪೂರ್ಣವಿವರ

ಒಟ್ಟು 16 ವರ್ಷ ಚಿತ್ರರಂಗದಲ್ಲಿ ಕೆಲಸ ಮಾಡಿದ ಅವರು, ಐದು ಭಾಷೆಗಳಲ್ಲಿ 450ಕ್ಕೂ ಅಧಿಕ ಸಿನಿಮಾಗಳಲ್ಲಿ ನಟಿಸಿ, ದಾಖಲೆ ಬರೆದಿದ್ದಾರೆ. 80-90ರಲ್ಲಿ ದಕ್ಷಿಣ ಭಾರತದ ಭಾರಿ ಬೇಡಿಕೆಯುಳ್ಳ ನಟಿಯಾಗಿ ಅವರು ಮಿಂಚಿದ್ದರು. ಕನ್ನಡದಲ್ಲಿ ರವಿಚಂದ್ರನ್‌ ನಟನೆಯ 'ಹಳ್ಳಿಮೇಷ್ಟ್ರು' ಸಿನಿಮಾದಲ್ಲಿ ಅವರ ಟೀಚರ್ ಪಾತ್ರ ಸಖತ್ ಫೇಮಸ್ ಆಗಿತ್ತು. ಅದರೊಂದಿಗೆ 'ಚಿನ್ನ', 'ಗಣೇಶನ ಗಲಾಟೆ', 'ಲಾಕಪ್‌ ಡೆತ್', 'ಅಳಿಮಯ್ಯ' ಸೇರಿದಂತೆ ಒಂದಷ್ಟು ಕನ್ನಡ ಸಿನಿಮಾಗಳಲ್ಲಿ ಅವರು ಕಾಣಿಸಿಕೊಂಡಿದ್ದರು. 1996ರಲ್ಲಿ ಅವರು ಆತ್ಮಹತ್ಯೆ ಮಾಡಿಕೊಂಡರು.

ಪಾ ರಂಜಿತ್ ನಿರ್ದೇಶನದಲ್ಲಿ ಸಿಲ್ಕ್ ಸ್ಮಿತಾ ಬಯೋಪಿಕ್