ಕನ್ನಡ 'ಬೆಲ್‌ ಬಾಟಂ' ರಿಮೇಕ್ ಮಾಡ್ತಿಲ್ವಂತೆ ಅಕ್ಷಯ್‌ಕುಮಾರ್! ಹಾಗಾದ್ರೆ, ನಿರ್ದೇಶಕ ಜಯತೀರ್ಥ ಏನ್‌ ಹೇಳ್ತಾರೆ?

ಭಾನುವಾರವಷ್ಟೇ ತಮ್ಮ ಹೊಸ ಸಿನಿಮಾ 'ಬೆಲ್‌ಬಾಟಂ' ಬಗ್ಗೆ ನಟ ಅಕ್ಷಯ್‌ಕುಮಾರ್ ಮಾಹಿತಿ ಹಂಚಿಕೊಂಡಿದ್ದರು. ರೆಟ್ರೋ ಶೈಲಿಯಲ್ಲಿ ಮೂಡಿಬರುತ್ತಿರುವ ಇದೊಂದು ಸ್ಪೈ ಥ್ರಿಲ್ಲರ್ ಸಿನಿಮಾ ಎಂದು, 80ರ ದಶಕದಲ್ಲಿ ನಡೆಯಲಿದೆ ಎಂದಿದ್ದರು. ಜತೆಗೆ ರೆಟ್ರೋ ಶೈಲಿಯಲ್ಲಿ ಇರುವ ಫಸ್ಟ್‌ಲುಕ್‌ ಅನ್ನು ಸಹ ರಿಲೀಸ್ ಮಾಡಿದ್ದರು. ಇದೆಲ್ಲ ನೋಡಿದಾಗ ಇದು ಪಕ್ಕಾ ಕನ್ನಡದ 'ಬೆಲ್‌ ಬಾಟಂ' ಚಿತ್ರದ ರಿಮೇಕ್ ಅನ್ನೋದು ಎಲ್ಲೆಡೆ ಚರ್ಚೆ ಆಗಿತ್ತು. ಕನ್ನಡಿಗರಿಗೂ ಇದು ಖುಷಿಯ ವಿಷಯವಾಗಿತ್ತು. ಆದರೆ, ಅಕ್ಷಯ್‌ ಈಗ ಶಾಕ್‌ ನೀಡಿದ್ದಾರೆ!


ಟ್ವಿಟರ್‌ನಲ್ಲಿ 'ಇದು ಕನ್ನಡ ಸಿನಿಮಾ ರಿಮೇಕ್‌ ಅಲ್ವಾ' ಎಂಬ ಪ್ರಶ್ನೆ ಅವರಿಗೆ ಎದುರಾಗಿತ್ತು. ಅದಕ್ಕೆ ಉತ್ತರಿಸಿರುವ ಅಕ್ಷಯ್‌, 'ಇದು ಯಾವುದೇ ಸಿನಿಮಾ ರಿಮೇಕ್ ಅಲ್ಲ. ನೈಜ ಘಟನೆಗಳಿಂದ ಪ್ರೇರಿತವಾದ ಅಸಲಿ ಚಿತ್ರಕಥೆ ಇರುವ ಸಿನಿಮಾ' ಎಂದಿದ್ಧಾರೆ. ಅಲ್ಲಿಗೆ, ಹಿಂದಿಯ ಈ 'ಬೆಲ್ ಬಾಟಂ' ಕನ್ನಡದ 'ಬೆಲ್‌ ಬಾಟಂ'ನ ರಿಮೇಕ್ ಅಲ್ಲ ಅನ್ನೋದನ್ನು ಕಡ್ಡಿ ತುಂಡು ಮಾಡಿದಂತೆ ಅಲ್ಲಗಳೆದಿದ್ದಾರೆ. ಈ ಬಾಲಿವುಡ್‌ ಚಿತ್ರಕ್ಕೆ ನಿಖಿಲ್ ಅಡ್ವಾಣಿ ಬಂಡವಾಳ ಹೂಡುತ್ತಿದ್ದಾರೆ.


ಈ ಬಗ್ಗೆ ಕನ್ನಡ 'ಬೆಲ್‌ ಬಾಟಂ' ನಿರ್ದೇಶಕ ಜಯತೀರ್ಥ ಅವರಿಗೆ ಕೇಳಿದರೆ, 'ನಮ್ಮ ಸಿನಿಮಾದ ಟೈಟಲ್‌, ಥೀಮ್‌, ಪಾತ್ರ ಎಲ್ಲವನ್ನೂ ತೆಗೆದುಕೊಂಡಿದ್ದಾರೆ. ಆದರೆ, ರಿಮೇಕ್ ಅಲ್ಲ ಅಂತಿದ್ದಾರೆ. ಇದು ರಿಮೇಕಾ, ಫ್ರಿಮೇಕಾ ಅನ್ನೋದು ನಮಗೂ ಗೊತ್ತಿಲ್ಲ. 'ಒಂದು ಮೊಟ್ಟೆಯ ಕಥೆ'ಯ ಥೀಮ್‌ ಇಟ್ಟುಕೊಂಡು 'ಬಾಲಾ' ಸಿನಿಮಾ ಮಾಡಿದ್ರು. ಆದರೆ, ಎಲ್ಲಿಯೂ ಕ್ರೆಡಿಟ್‌ ನೀಡಲಿಲ್ಲ. ಈಗ ನಮ್ಮ ಸಿನಿಮಾದ ಟೈಟಲ್‌, ಥೀಮ್‌ ಇಟ್ಟುಕೊಂಡು ಬಾಲಿವುಡ್ ಸಿನಿಮಾ ಮಾಡಲಾಗುತ್ತಿದೆ. ಆದರೆ, ರಿಮೇಕ್ ಅಲ್ಲ ಅಂತ ಸ್ಪಷ್ಟಪಡಿಸಿದ್ದಾರೆ. ಅಸಲಿಗೆ, ಈ ಹಿಂದೆಯೇ ನಮ್ಮ ಸಿನಿಮಾದ ಹಿಂದಿ ರಿಮೇಕ್ ಹಕ್ಕುಗಳನ್ನು ಒಬ್ಬರು ಕೊಂಡುಕೊಂಡಿದ್ದಾರೆ. ಅವರಿಗೆ ಇದರಿಂದ ತೊಂದರೆ ಆಗಬಹುದು' ಎನ್ನುತ್ತಾರೆ.

ಹಿಂದಿ ಬೆಲ್ ಬಾಟಂನಲ್ಲಿ ಅಕ್ಷಯ್ ಕುಮಾರ್ ನಾಯಕ; ಕುತೂಹಲದಲ್ಲಿ ಹರಿಪ್ರಿಯಾ

'ನಮ್ಮದೇ ಬ್ರ್ಯಾಂಡ್‌ ಅನ್ನೇ ಇಟ್ಟುಕೊಂಡು ಇದು ಬೇರೆ ಅಂತಿದ್ದಾರೆ. ಅಕ್ಷಯ್‌ಕುಮಾರ್ ಅವರ ಟ್ವೀಟ್ ನೋಡಿದ ಮೇಲೆಯೇ ನನಗೂ ರಿಮೇಕ್ ಅಲ್ಲ ಅಂತ ಕನ್ಫರ್ಮ್ ಆಗಿದ್ದು. ನಮ್ಮ ಬಳಿ ರಿಮೇಕ್ ಹಕ್ಕುಗಳನ್ನು ತೆಗೆದುಕೊಂಡಿರುವವರ ಜತೆ ನಿರ್ಮಾಪಕರು ಮಾತನಾಡುತ್ತಿದ್ದಾರೆ. ನಮ್ಮ ಸಿನಿಮಾದ ಎಲ್ಲ ಅಂಶಗಳನ್ನು ತೆಗೆದುಕೊಂಡು ಈಗ ಸಿನಿಮಾನೇ ಬೇರೆ ಅಂತಿದ್ದಾರೆ. ಅದು ನಮ್ಮದೇ ಕಾಪಿ ರೈಟ್‌ ಅನ್ನೋದು ಸರಿ ಅಲ್ಲ. ಹಾಗಂತ, ಶೀರ್ಷಿಕೆಯಿಂದ ಪ್ರತಿಯೊಂದು ಅಂಶಗಳನ್ನು ಬಳಸಿಕೊಳ್ಳುವುದು ಎಷ್ಟು ಸರಿ' ಎಂಬುದು ಜಯತೀರ್ಥ ಅವರ ಪ್ರಶ್ನೆ.

ಬೆಲ್‌ ಬಾಟಮ್‌ 2 ಸಿದ್ಧತೆಯಲ್ಲಿರೆಟ್ರೋ ಸ್ಟಾರ್‌

ಕನ್ನಡದ 'ಬೆಲ್‌ ಬಾಟಂ'ನಲ್ಲಿ ಡಿಟೆಕ್ಟೀವ್ ದಿವಾಕರ ಅನ್ನೋ ಪಾತ್ರದಲ್ಲಿ ನಿರ್ದೇಶಕ ರಿಷಭ್ ಶೆಟ್ಟಿ ನಟಿಸಿದ್ದರು. ನಾಯಕಿಯಾಗಿ ಹರಿಪ್ರಿಯಾ ನಟಿಸಿದ್ದರು. ಟಿ.ಕೆ. ದಯಾನಂದ ಬರೆದ ಈ ಕಥೆಗೆ ಸಂತೋಷ್‌ಕುಮಾರ್ ಬಂಡವಾಳ ಹೂಡಿದ್ದಾರೆ. ಈ ಸಿನಿಮಾ ನೂರು ದಿನಗಳ ಯಶಸ್ವಿ ಪ್ರದರ್ಶನ ಕಂಡಿದ್ದಲ್ಲದೆ, ತಮಿಳು, ಹಿಂದಿ ಸೇರಿದಂತೆ ಹಲವು ಭಾಷೆಗಳಿಗೆ ರಿಮೇಕ್ ಹಕ್ಕುಗಳ ಮಾರಾಟವಾಗಿತ್ತು.