ಮೊದಲೆಲ್ಲ ಪ್ರೇಕ್ಷಕರು ಮನರಂಜನೆಗಾಗಿ ಚಿತ್ರಮಂದಿರ ಮತ್ತು ಟಿವಿ ಮೇಲೆ ಅವಲಂಬಿತರಾಗಿದ್ದರು. ಅಲ್ಲಿ ಪ್ರದರ್ಶನಗೊಳ್ಳುವ ಸಿನಿಮಾ ಅಥವಾ ಕಾರ್ಯಕ್ರಮಗಳನ್ನು ನೋಡಿ ಎಂಜಾಯ್‌ ಮಾಡುತ್ತಿದ್ದರು. ಥಿಯೇಟರ್‌ನಲ್ಲಿ ಸಿನಿಮಾ ನೋಡುವುದು ಒಂದು ಸಾಮೂಹಿಕ ಕ್ರಿಯೆ. ಮನೆಯಲ್ಲಿ ಟಿವಿ ನೋಡಿದರೆ ಬಹುತೇಕ ಸಂದರ್ಭದಲ್ಲಿ ಕುಟುಂಬದವರು ಇದ್ದೇ ಇರುತ್ತಾರೆ. ಇವುಗಳಲ್ಲಿ ಪ್ರದರ್ಶನಗೊಳ್ಳುವ ದೃಶ್ಯಗಳಿಗೆ ಅದಾಗಲೇ ಒಂದು ಬಾರಿ ಸೆನ್ಸಾರ್‌ನವರು ಕತ್ತರಿ ಹಾಕಿರುತ್ತಾರೆ. ಹಾಗಾಗಿ ನೋಡುಗರಿಗೆ ಮಾರಕ ಎಂಬಂತಹ ಅಂಶಗಳಿರುವುದು ಕಡಿಮೆ. ಆದರೆ ಓಟಿಟಿಗಳ ಕಥೆಯೇ ಬೇರೆ.
ಮನರಂಜನೆ ಎಂಬುದು ಈಗ ತೀರಾ ಖಾಸಗಿ ಆಗಿದೆ. ಎಲ್ಲವೂ ಮೊಬೈಲ್‌ ಪರದೆಗೆ ಬಂದು ಕೂತಿದೆ. ಓಟಿಟಿಯಲ್ಲಿ ಈಗ ವೆಬ್‌ ಸರಣಿಗಳು ಜನಪ್ರಿಯತೆ ಪಡೆದುಕೊಂಡಿವೆ ಎಂದು ಮನೆಮಂದಿಯ ಜೊತೆಗೆ ಕುಳಿತು ಅವುಗಳನ್ನು ನೋಡುವ ಮುನ್ನ ಕೆಲವು ವಿಚಾರಗಳ ಬಗ್ಗೆ ಪ್ರೇಕ್ಷಕರು ಎಚ್ಚರಿಕೆ ವಹಿಸಬೇಕಿರುವುದು ಅತ್ಯಗತ್ಯ.
ಹಸಿಬಿಸಿ ದೃಶ್ಯಗಳು ಕಣ್ಣಿಗೆ ರಾಚುತ್ತವೆ!
ಸದ್ಯಕ್ಕಂತೂ ಭಾರತದಲ್ಲಿ ವೆಬ್‌ ಸಿರೀಸ್‌ಗಳಿಗೆ ಸೆನ್ಸಾರ್‌ನ ಹಂಗಿಲ್ಲ. ಹಾಗಾಗಿ ಎಲ್ಲವನ್ನೂ ಮುಕ್ತವಾಗಿ ತೋರಿಸುತ್ತಿದ್ದಾರೆ ನಿರ್ದೇಶಕರು. ಇತ್ತೀಚೆಗೆ ಬಂದಿರುವ ಬಹುತೇಕ ವೆಬ್‌ ಸರಣಿಗಳನ್ನು ಗಮನಿಸಿದರೆ ಅವುಗಳಲ್ಲಿ ಹಸಿಬಿಸಿ ದೃಶ್ಯಗಳು ಕಾಮನ್‌ ಎಂಬಂತೆ ಆಗಿಬಿಟ್ಟಿವೆ. ಕಥೆಗೆ ಅವಶ್ಯಕ ಎಂಬ ಕಾರಣಕ್ಕೆ ಬೆಡ್‌ರೂಮ್‌ ಸನ್ನಿವೇಶಗಳನ್ನು ಮುಲಾಜಿಲ್ಲದೆ ಬಿತ್ತರಿಸಲಾಗುತ್ತದೆ. ಇನ್ನು, ಇದರಲ್ಲಿ ಅಭಿನಯಿಸುವ ಕೆಲವು ನಟ-ನಟಿಯರು ಕೂಡ ಯಾವುದೇ ಹಿಂಜರಿಕೆ ಇಟ್ಟುಕೊಟ್ಟದೆ ಬೆತ್ತಲಾಗಿ ಕ್ಯಾಮರಾ ಎದುರಿಸುತ್ತಿದ್ದಾರೆ. ಒಂದು ವೇಳೆ ನೀವು ಮಕ್ಕಳ ಜೊತೆ ಕುಳಿತು ವೆಬ್‌ ಸೀರಿಸ್‌ ನೋಡುತ್ತಿದ್ದರೆ ಅಚಾನಕ್‌ ಆಗಿ ಇಂಥ ದೃಶ್ಯಗಳು ಕಣ್ಣಿಗೆ ರಾಚುತ್ತವೆ. ಮಕ್ಕಳ ಕೈಗೆ ಮೊಬೈಲ್‌ ನೀಡಿದರೆ ಅವರು ಕೂಡ ಇಂಥ ವೆಬ್‌ ಸರಣಿಗಳ ಲೋಕಕ್ಕೆ ಎಂಟ್ರಿ ಪಡೆಯುತ್ತಾರೆ. ಈ ಬಗ್ಗೆ ಪೋಷಕರು ಎಚ್ಚರಿಕೆಯಿಂದ ಇರಬೇಕಾದ್ದು ಅನಿವಾರ್ಯ.
ವೆಬ್‌ ಸಿರೀಸ್‌ಗಳಲ್ಲಿ ನಟಿಸೋಕೆ ಸಜ್ಜಾದ್ರು ಸ್ಯಾಂಡಲ್‌ವುಡ್‌ನ ಸ್ಟಾರ್‌ ನಟರು!
ಕಿವಿಗೆ ಅಪ್ಪಳಿಸುತ್ತವೆ ಬೈಗುಳಗಳು!
ಸಂಭಾಷಣೆ ವಿಚಾರದಲ್ಲಿಯೂ ವೆಬ್‌ ಸೀರಿಸ್‌ಗಳಿಗೆ ಯಾವುದೇ ಮಿತಿ ಇಲ್ಲ. ಇದರಲ್ಲಿ ಬರುವ ಪಾತ್ರಗಳು ತಮಗೆ ಇಚ್ಛೆ ಬಂದಂತೆ ಮಾತನಾಡುತ್ತವೆ. ಸಿನಿಮಾ ಮತ್ತು ಕಿರುತೆರೆಯ ಪಾತ್ರಗಳ ರೀತಿಯಲ್ಲಿ ಇವುಗಳಿಗೆ ಯಾವುದೇ ಹಿಡಿತ ಇಲ್ಲ. ತೀರಾ ಅಶ್ಲೀಲ ಎಂಬಂತ ಪದಗಳನ್ನು ವೆಬ್‌ ಸರಣಿಯಲ್ಲಿ ತುಂಬ ಸುಲಭವಾಗಿ ಬಳಸಲಾಗುತ್ತಿದೆ. ನಿಮಗೆ ಅರ್ಥವೇ ಗೊತ್ತಿಲ್ಲದ ಹೊಸ ಹೊಸ ಬೈಗುಳಗಳನ್ನೂ ಕೇಳಿಸಿಕೊಳ್ಳಬೇಕಾದೀತು. ಕುಟುಂಬದವರ ಜೊತೆ ಕುಳಿತು ನೋಡಿದರೆ ಮುಜುಗರ ತಪ್ಪಿದ್ದಲ್ಲ. ಮಕ್ಳಳ ಜೊತೆ ನೋಡಿದರೆ ಅಪಾಯ ತಪ್ಪಿದ್ದಲ್ಲ. ಹಾಗಾಗಿ ನೀವು ನೋಡಲು ಇಚ್ಛಿಸಿರುವ ವೆಬ್‌ ಸಿರೀಸ್‌ ಯಾವ ರೀತಿಯದ್ದು ಎಂಬುದನ್ನು ಗಮನಿಸಿಕೊಂಡ ನಂತರವೇ ಮುಂದುವರಿಯುವುದು ಉತ್ತಮ.
'ಪಾತಾಳ್‌ ಲೋಕ್‌'ನಲ್ಲಿ ರಕ್ತ ಹರಿಸುತ್ತಿರುವ ನಟ ಅಭಿಷೇಕ್‌ ರಿಯಲ್‌ ಲೈಫ್‌ ಬಗ್ಗೆ ಈ ವಿಚಾರಗಳು ತಿಳಿದಿದೆಯೇ?
ಕ್ರೈಂ ದೃಶ್ಯಗಳಲ್ಲಿ ರಕ್ತದ ಓಕುಳಿ!
ಎಂಥ ರೌಡಿಸಂ ಸಿನಿಮಾ ಆದರೂ ಸಹ ಅದರಲ್ಲಿ ತೋರಿಸುವ ಕ್ರೈಂ ದೃಶ್ಯಗಳಿಗೆ ಸೆನ್ಸಾರ್‌ನವರು ಕತ್ತರಿ ಹಾಕಿರುತ್ತಾರೆ. ನೋಡುಗರ ಮನಸ್ಸಿನ ಮೇಲೆ ಪರಿಣಾಮ ಬೀರುವಂತಿರುವ ದೃಶ್ಯಗಳನ್ನು ಸಿನಿಮಾದಿಂದ ತೆಗೆದು ಹಾಕಲಾಗಿರುತ್ತದೆ. ಆದರೆ ವೆಬ್‌ ಸರಣಿಗಳಲ್ಲಿ ಎಲ್ಲವೂ ನೈಜವಾಗಿ ಮೂಡಿಬರಬೇಕು ಎಂಬ ಕಾರಣಕ್ಕೆ ಎಲ್ಲವನ್ನೂ ಹಸಿಹಸಿಯಾಗಿಯೇ ತೋರಿಸುವ ಟ್ರೆಂಡ್ ಜಾರಿಯಲ್ಲಿದೆ. ಕೊಲೆ, ಅತ್ಯಾಚಾರ ಮುಂತಾದ ದೃಶ್ಯಗಳನ್ನು ತೀರಾ ಭೀಕರವಾಗಿ ಚಿತ್ರಿಸಲಾಗುತ್ತಿದೆ. ಇದನ್ನು ನೋಡಿದವರಲ್ಲಿ ಕ್ರೂರ ಗುಣಗಳು ಜಾಗೃತಗೊಂಡರೂ ಅಚ್ಚರಿ ಏನಿಲ್ಲ. ಅದರಲ್ಲೂ ಮಕ್ಕಳ ಮೇಲೆ ಹೆಚ್ಚು ಪರಿಣಾಮ ಬೀರಲಿದೆ. ಹಾಗಾಗಿ ಮಕ್ಳಳ ಕೈಗೆ ಮೊಬೈಲ್‌ ಕೊಡುವ ಮುನ್ನ ಈ ಅಂಶಗಳ ಬಗ್ಗೆ ಗಮನ ಹರಿಸುವುದು ಒಳಿತು.
'ಪಾತಾಳ್‌ ಲೋಕ್‌' ವೆಬ್‌ ಸಿರೀಸ್‌ಗೆ ಭಾರಿ ಜನಮೆಚ್ಚುಗೆ! ಆದರೂ ಬ್ಯಾನ್‌ ಮಾಡಿ ಅಂತಿದ್ದಾರೆ ಕೆಲವರು!