ಧ್ರುವ ಸರ್ಜಾ ಹಿಂದು ಧರ್ಮ, ಬ್ರಾಹ್ಮಣರ ವಿರೋಧಿಯಲ್ಲ: ಬಿಗ್ ಬಾಸ್ ಖ್ಯಾತಿಯ ಒಳ್ಳೆ ಹುಡುಗ ಪ್ರಥಮ್!

ಧ್ರುವ ಸರ್ಜಾ, ರಶ್ಮಿಕಾ ಮಂದಣ್ಣ ಅಭಿನಯದ 'ಪೊಗರು' ಸಿನಿಮಾ ಫೆ 19ರಂದು ಅದ್ದೂರಿಯಾಗಿ ರಿಲೀಸ್ ಆಗಿತ್ತು. ಕನ್ನಡ, ತೆಲುಗು, ತಮಿಳು ಭಾಷೆಗಳಲ್ಲಿ ರಿಲೀಸ್ ಆಗಿದ್ದ ಈ ಚಿತ್ರದಲ್ಲಿ ಬ್ರಾಹ್ಮಣರನ್ನು ಅವಹೇಳನ ಮಾಡಲಾಗಿದೆ ಎಂಬ ಆರೋಪ ಕೇಳಿಬಂದಿದೆ. ಈ ಬಗ್ಗೆ ನಟ / ನಿರ್ದೇಶಕ ಬಿಗ್ ಬಾಸ್ ಖ್ಯಾತಿಯ ಒಳ್ಳೆ ಹುಡುಗ ಪ್ರಥಮ್ ಪ್ರತಿಕ್ರಿಯೆ ನೀಡಿದ್ದಾರೆ. "ನೀವು ಧ್ರುವ ಸರ್ಜಾ ಅವರ ಯಾವುದೇ ಮಾತು, ಟ್ವೀಟ್ ನೋಡಿ, ಕೊನೆಯಲ್ಲಿ ಹೇಳೋದು ಜೈಆಂಜನೇಯ, ಜೈಶ್ರೀರಾಮ್ ಅಂತ. ಧ್ರುವ ಸರ್ಜಾ ಅವರು ಹಿಂದು ಧರ್ಮ, ಬ್ರಾಹ್ಮಣರ ವಿರುದ್ಧವಾಗಿದ್ದಾರಾ? ನೀವೇ ಯೋಚಿಸಿ? ರಾಕ್ಷಸಿ ಪ್ರವೃತ್ತಿ ತೋರಿಸುವಾಗ ತಪ್ಪಾಗಿದೆ, ದೃಶ್ಯ ತೆಗೆಯುವುದಾಗಿ ಎಂದು ನಂದ ಕಿಶೋರ್ ಹೇಳಿದ್ದಾರೆ. ವಿವಾದಬೇಡ. ಧ್ರುವ ಸರ್ಜಾರ ಶ್ರಮಕ್ಕೆ ಹಾರೈಸಿ" ಎಂದು ಪ್ರಥಮ್ ಹೇಳಿದ್ದಾರೆ.

"ಹಿಂದುಧರ್ಮ ನಿಂದನೆ ಯಾರೂ ಒಪ್ಪತಕ್ಕದಲ್ಲ. ನಾನು ಸಿನಿಮಾ ನಟ ಆಗೋಕೂ ಮುಂಚೆ ಒಬ್ಬ ದೇಶಭಕ್ತ, ಹಿಂದು‌‌. ನನಗೆ ದಲಿತರಾದಿಯಾಗಿ ಬ್ರಾಹ್ಮಣರು ಎಲ್ಲರೂ ನನ್ನವರೇ. ಒಂದು ಮನವಿ ಮಾಡ್ಕೊಳ್ತೀನಿ. ಆಗಿರೋ ತಪ್ಪನ್ನ ತಿದ್ದುವ ಕೆಲಸ ನಿರ್ದೇಶಕರಾದ ನಂದಕಿಶೋರ್ ಅವರು ಮಾಡುತ್ತಿದ್ದಾರೆ. ಧ್ರುವ ಕೂಡ ಆಂಜನೇಯನ ಪರಮ ಭಕ್ತ. ಚಿತ್ರತಂಡದ ಪ್ರಮುಖ ಸಾರಥಿ ನಂದ ಕಿಶೋರ್ ಕ್ಷಮೆ ಕೇಳಿದ್ದಾರೆ. ದಯವಿಟ್ಟು ಧ್ರುವರನ್ನು ಹಿಂದು ವಿರೋಧಿ, ಬ್ರಾಹ್ಮಣ ವಿರೋಧಿ ಅಂತ ಬಿಂಬಿಸುವುದನ್ನು ನಿಲ್ಲಿಸಿ" ಎಂದು ಪ್ರಥಮ್ ಹೇಳಿದ್ದಾರೆ.

Also Read-ಸೆನ್ಸಾರ್ ಮಂಡಳಿ ಮುಂದೆ 'ಪೊಗರು' ಸಿನಿಮಾ ವಿರುದ್ಧ ಬ್ರಾಹ್ಮಣ ಸಂಘಟನೆಗಳ ಪ್ರತಿಭಟನೆ!

ಮೈಸೂರು ಸೇರಿದಂತೆ ಕೆಲ ಭಾಗಗಳಲ್ಲಿ ಬ್ರಾಹ್ಮಣರು ಸೆನ್ಸಾರ್ ಮಂಡಳಿ ವಿರುದ್ಧ ಪ್ರತಿಭಟನೆ ಮಾಡಿದ್ದರು. ನಂದ ಕಿಶೋರ್ ಹಾಗೂ ಬ್ರಾಹ್ಮಣ ಸಮುದಾಯದ ರಾಜ್ಯಾಧ್ಯಕ್ಷ ಸಚ್ಚಿದಾನಂದಮೂರ್ತಿ ಅವರು ಸುದ್ದಿಗೋಷ್ಠಿ ಕರೆದಿದ್ದರು. ಆ ವೇಳೆ 'ಪೊಗರು' ಸಿನಿಮಾದ ಕೆಲವೊಂದಿಷ್ಟು ದೃಶ್ಯಗಳನ್ನು ಕತ್ತರಿಸುವುದಾಗಿ ನಂದ ಕಿಶೋರ್ ಭರವಸೆ ನೀಡಿದ್ದಾರೆ.